សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កណ្ដាល ៖ បន្ទាប់ពីក្រុមការងារជំនាញរបស់ក្រសួងរៀបចំដែនដី នគរូបនីយកម្ម និងសំណង់ បានវាស់វែងចុះបញ្ជីដីធ្លី និងបិទផ្សាយជាសាធារណនូវក្បាលដីរួចរាល់ ក្រសួងក៏បានប្រគល់តួនាទីឱ្យអាជ្ញាធរតាមបណ្ដាខេត្តប្រគល់បណ្ណកម្មសិទ្ធិដីធ្លីជូនពលរដ្ឋជាបន្តបន្ទាប់ ជាក់ស្ដែងកាលពីថ្ងៃចុងសប្ដាហ៍កន្លងទៅនេះ ក្រសួងរៀបចំដែនដី តាមរយៈអាជា្ញធរខេត្តកណ្ដាល បានចែកបណ្ណកម្មសិទ្ធិជាង ១១០០០បណ្ណជូនដល់ពលរដ្ឋក្នុងក្រុងអរិយក្សត្រ ខេត្តកណ្ដាល។
បើតាមប្រភពពីរដ្ឋបាលក្រុងអរិយក្សត្របានឱ្យដឹងថា បណ្ណកម្មសិទ្ធិឬ វិញ្ញាបនបត្រសម្គាល់អចលនវត្ថុចំនួន ១១ ៣៣២ បណ្ណ បានប្រគល់ជូនពលរដ្ឋមកពី១០ភូមិ ៣សង្កាត់ក្រុងអរិយក្សត្រ រួមមានភូមិលើ ភូមិស្វាយជ្រុំ ភូមិបារាជ ក្នុងសង្កាត់ស្វាយជ្រុំ ភូមិព្រែកតាកូវ ភូមិព្រែកល្វា និងភូមិព្រែកបង្កង ក្នុងសង្កាត់ព្រែកតាកូវ និងភូមិជ្រោយខ្សាច់ ភូមិបាក់ដាវលើ ភូមិបាក់ដាវក្រោម ភូមិព្រែកជ្រូក សង្កាត់បាក់ដាវ ។
ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល នៅក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុនោះ បានមានប្រសាសន៍ថា ការចែកបណ្ណកម្មសិទ្ធិដីធ្លី ជូនពលរដ្ឋនាពេលនេះ ជាការរួមចំណែកយ៉ាងសំខាន់ក្នុងការដោះស្រាយបញ្ហាទំនាស់ដីធ្លី ដែលធ្លាប់តែកើតឡើងកន្លងមក ក៏ជាការផ្ដល់ឱ្យពលរដ្ឋមានសិទ្ធិកាន់កាប់ដីធ្លីរបស់ខ្លួនស្របតាមច្បាប់ត្រឹមត្រូវ ។
ឯកឧត្តបានមានប្រសាសន៍ថា ការទទួលបានបណ្ណកម្មសិទ្ធិដីធ្លីប្រើប្រាស់តាមច្បាប់របស់ប្រជាពលរដ្ឋនាពេលនវ បានស្ដែងឱ្យឃើញពីការគិតគូយ៉ាងហ្មត់ចត់របស់រាជរដ្ឋាភិបាល ដែលមានសម្ដេចធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងអនុវត្តយ៉ាងសកម្មលើគោលនយោបាយដីធ្លី ជូនពលរដ្ឋ និងដើម្បីផលប្រយោជន៍របស់ប្រជាពលរដ្ឋយ៉ាងពិតប្រាកដ ។
ឯកឧត្តម ឈឿន ប៊ុណ្ណារ័ត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារសម្របសម្រួលដោះស្រាយវិវាទដីធ្លី ខេត្តកណ្ដាល ក្នុងឱកាសនោះ បានមានប្រសាសន៍ដែរថា ពលរដ្ឋដែលទទួលបានបណ្ណកម្មសិទ្ធិដីធ្លី ត្រូវគិតគូរទុកដាក់ថែរក្សាឱ្យបានល្អ ព្រោះថា បណ្ណកម្មសិទ្ធិដីធ្លី គឺពិតជាមានសារសំខាន់ និងមានតម្លៃណាស់ ក្នុងការសម្គាល់សិទ្ធិកាន់កាប់ ការទិញលក់ បញ្ចាំ ដីធ្លីរបស់ខ្លួនស្របតាមច្បាប់ ពិសេសដីធ្លីមានបណ្ណកម្មសិទ្ធិត្រឹមត្រូវគឺបញ្ជាបានថា ដីមានសុវត្ថិភាព ទទួលស្គាល់ដោយអាជ្ញាធរ ចៀសផុតពីការរំលោភបំពាន កាត់បន្ថយជម្លោះ និងថែមទាំងងាយស្រួលក្នុងការទិញលក់ផងដែរ ។
ការប្រគល់វិញ្ញាបនបត្រសម្គាល់ម្ចាស់អចលនវត្ថុនេះមិនមែន មានតែខេត្តកណ្ដាលទេ ពោលគឺបណ្ដាខេត្តផ្សេងៗទៀតដែលបានវាស់វែងចុះបញ្ជី និងបិទផ្សាយជាសាធារណរួចនឹងត្រូវប្រគល់ជូនពលរដ្ឋបន្តបន្ទាប់ ដើម្បីឱ្យពលរដ្ឋយកបណ្ណកម្មសិទ្ធិនៅទៅប្រើប្រាស់តាមតម្រូវការចាំបាច់របស់ពួកគាត់ ។
ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានលើកឡើងផងដែរថា ការប្រគល់វិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ ក្រោយបញ្ចប់ការវាស់វែង ចុះបញ្ជីដីធ្លី គឺជាការបញ្ចប់ទំនាស់ដីធ្លីនៅទូទាំងប្រទេស ហើយមិនចង់ឱ្យពលរដ្ឋនៅមានបញ្ហាដីធ្លីតកូនតចៅបន្តទៀតនោះទេ ។ ចក្ខុវិស័យរបស់ក្រសួងក៏ដូចជារាជរដ្ឋាភិបាល គឺការបង្កើតបរិយាកាសឱ្យពលរដ្ឋរស់នៅក្នុងសុខសាន្ត មិនចង់ឱ្យពលរដ្ឋឈ្លោះទាស់ទែងគ្នារឿងដីធ្លីរឿងព្រំដីនៅជាប់គ្នាទៀតឡើយ ៕
Account
Security
Favourite Content