ភ្នំពេញ ៖  ភូមិ​វប្បធម៌​​ដែល​បិទ​នៅខេត្តសៀមរាប​អស់​រយៈ​ពេលប៉ុន្មានឆ្នាំមកហើយនោះ នឹង​បើក​បង្ហាញ​ឡើ​ងវិ​​ញ​សម្រាប់ភ្ញៀវទេសចរជាតិ​ និងអន្តរជាតិ ដែល​ឆ្លងកាត់ព្រលានយន្តហោះអន្តរជាតិ​តេជោ ដោយ​ក្រុ​មហ៊ុ​ន​អ​ភិ​វ​ឌ្ឍ​ន៍​ព្រលានយន្តហោះ នឹងបង្កើតភូមិ​វប្បធម៌​នៅក្នុងអាកាសយានដ្ឋានផ្ទាល់តែម្ដង ដើ​ម្បីប​ង្ហាញ​ភ្ញៀវ​ទេស​ច​រ ជា​ពិ​សេស​​ទេសចរអន្តរជាតិដែលឆ្លងកាត់​អាកាសយានដ្ឋាន ។​

បើតាមលោកឧកញ៉ា ​ឆារស៍ វ៉ាន់ នាយក​គ្រប់គ្រង​នៃ​ក្រុមហ៊ុន​ខេមបូឌា អ៊ែរផត អ៊ិនវេសមិន​ឯ.ក ( CAIC) បា​ន​​​​​បញ្ជាក់ថា ក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ​ នឹង​រៀបចំ​រចនាឡើងវិញនូវ​ភូមិ​វប្បធម៌ ដែ​ល​​​​ពីមុន​បាន​បើក​ទទួលភ្ញៀវទេសចរ​នៅខេត្ត​សៀមរាប​​ និង​បានបិទវិញនោះនៅព្រលាន​យន្ត​ហោះ​អន្ត​រ​ជា​តិ​​តេជោ ។​ ការ​បង្កើតភូមិ​វប្បធម៌នៅក្នុង​អាកាសយានដ្ឋានអន្តរជាតិតេជោ គឺដើម្បីជួយផ្សព្វផ្សាយ​ពីវ​ប្ប​ធម៌របស់​កម្ពុជា ជាពិសេស​ភ្ញៀវទេសចរ​បរទេស​ដែលឆ្លងកាត់អាកាសយានដ្ឋាន​បានសិក្សាស្វែង​យល់​ពី​អំ​ពី​វប្បធម៌ និង​ប្រវត្តិសាស្ត្ររបស់​កម្ពុជា ។

លោកឧកញ៉ា​បានបញ្ជាក់ថា​ នៅពេល​គម្រោង​អាកាស​យានដ្ឋានអន្តរជាតិ​តេជោ​បើកដំណើរការ​សម្រាប់​ដំណាក់​កាលទី​១ រំពឹង​ថាអាចនឹងទទួលបាន​អ្នកដំណើរ​ឆ្លងកាត់​រហូតដល់១៣​លាននាក់​ក្នុងមួយ​ឆ្នាំ ដោយ​អាកាស​យានដ្ឋានមួយនេះ អាច​មានសមត្ថភាព​ទទួល​យន្តហោះធុនធំៗ​ដូចជា​ប្រភេទ​ Airbus A380 និង​ប្រភេទ​ Boeing 747 ជាដើម ។​

បើមិនមានការប្រែប្រួល​នោះទេ គម្រោងអាកាសយានដ្ឋានអន្តរជាតិតេជោ​នឹងអាច​ដាក់ដំណើរការ​នូវ​​អំឡុង​ខែ​កក្កដា ឆ្នាំ២០២៥ ខាងមុខនេះសម្រាប់ដំណាក់​កាលទី១ ដោយ​ចាប់ផ្ដើមបើក​ប្រតិបត្តិការ​ទទួលជើងហោះហើរ​ពី​គោលដៅនានា ។ ទន្ទឹមនឹង​ការ​ដាក់ដំណើរការនូវ​អាកាសយានដ្ឋានអន្តរជាតិតេជោនេះដែរ ប្រតិបត្តិការ​អាកាសយដ្ឋានអ​ន្តរ​ជា​តិ​​ភ្នំពេញ (ពោធិ៍ចិនតុង ) នឹងផ្អាកដំណើរការ ឬបិទលែ​ងមានសកម្មភាពតែម្ដង ។

លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ​ Advance Real Estate បានមានប្រសាសន៍ថា បើសិនជា​អាកាស​យានដ្ឋានអន្តរជាតិភ្នំពេញបិទ​លែង​ដំណើរការ​ដូច​ដែល​ព័ត៌មានធ្លាប់​លើក​ឡើង​មក​មែននោះ បណ្ដា​អាជីវកម្មនានានៅតាមបណ្ដោយផ្លូវ​សហព័ន្ធរុស្ស៊ី ជាពិសេសនៅទល់មុខ​អាកាសយានដ្ឋានអន្តរជាតិ​នឹងរងផលប៉ះពាល់​ភ្លាមៗ​ ប៉ុន្តែ​បើសិនជា​ទីតាំង​ព្រលានយន្តហោះអន្តរជាតិភ្នំពេញ មានគម្រោង​ថ្មីៗណា​មួយ​កើតឡើងវិញនោះ​ ទីតាំង​នៅក្បែរ​នោះ​នឹង​មានសក្ដានុពល​ខ្ពស់​ ។

គួរ​បញ្ជាក់ថា​ គម្រោងអភិវឌ្ឍន៍​អាកាស​យានដ្ឋានអន្តរជាតិ​តេជោ​ ត្រូវបានប៉ាន់​ស្មាន​ថានឹ​ងចំណាយ​ទឹកប្រាក់​ក្នុងការសាងសង់​ប្រមាណ ១,៥ពាន់លានដុល្លារអាមេរិក​ ហើយវា​នឹង​ក្លាយជាអាកាសយានដ្ឋាន​ធំ​​មួយ​ក្នុង​ចំណោម​អាកាសយានដ្ឋាន​នានា​នៅលើ​ពិភពលោក ។ មកដល់ពេលនេះ​ក្រុមហ៊ុនអភិវឌ្ឍន៍​អាកាស​យាន​ដ្ឋាន​មួយនេះ​ក៏បាន និងកំពុង​ត្រៀមខ្លួនក្នុងការ​ដាក់ដំណើរការ​នៅពេលខាងមុខឆាប់ៗនេះ ខណៈ​ហេដ្ឋា​រចនាសម្ព័ន្ធ​តភ្ជាប់ទៅកាន់​អាកាសយានដ្ឋានក៏បានរួចរាល់ស​ម្រាប់​ដាក់ដំណើរការ ។

គិតមកដល់ពេលនេះ កម្ពុជា​មានអាកាសយានដ្ឋាន​ដាក់ដំណើរការ​ចំនួន​៤ រួមមាន​អាកាសយានដ្ឋានអន្តរ​ជាតិ​ភ្នំពេញ អាកាស​យានដ្ឋានអន្តរជាតិសៀមរាប​អង្គរ អាកាស​យានដ្ឋានអន្តរជាតិ​​ខេត្តព្រះសីហនុ និងអាកាស​យានដ្ឋានអន្តរជាតិតារាសាគរ​ខេត្តកោះកុង ដែលទើប​បាន​ដាក់ដំណើរការ​កាលពីចុងឆ្នាំ២០២៤​កន្លងទៅនេះ ៕