សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ជំរុញដល់ក្រសួង ស្ថាប័នពាក់ព័ន្ធ អាជ្ញាធរមូលដ្ឋាន ភូមិ ឃុំ ស្រុក ត្រូវរួមគ្នាដោះស្រាយបោសសម្អាតនូវករណីវិវាទដីធ្លីដែលនៅសេសសល់ទូទាំងខេត្តក្រចេះ មុននឹងបញ្ចប់ការវាស់វែងដីធ្លីបង្ហើយនៅទូទាំងខេត្តមួយនេះ
ក្រចេះ ៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានគូសបញ្ជាក់ថា ដល់ពេលវេលាហើយដែលក្រសួងស្ថាប័នពាក់ព័ន្ធ អាជ្ញាធរមូលដ្ឋានភូមិឃុំស្រុក ត្រូវរួមគ្នាដោះស្រាយបោសសំអាតនូវករណីវិវាទដីធ្លីដែលនៅសេសសល់នៅទូទាំងខេត្តក្រចេះមុននឹងបញ្ចប់ការវាស់វែងដីធ្លីបង្ហើយនៅទូទាំងខេត្ត ដែលនេះគឺជាការចូលរួមចំណែកបញ្ចប់បញ្ហាចម្រូងចម្រាស់ដ៏ធំមួយក្នុងសង្គមជាតិ ។ ការថ្លែងបែបនេះត្រូវបានធ្វើឡើងក្នុងកិច្ចប្រជុំពិភាក្សាបញ្ចប់ការដោះស្រាយវិវាទដីធ្លីនៅទូទាំងខេត្តក្រចេះ នាថ្ងៃចុងសប្ដាហ៍កន្លងទៅនេះនៅសាលាខេត្តក្រចេះ។
ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា ៖
«កិច្ចប្រជុំនាពេលនេះធ្វើឡើងក្នុងគោលបំណងដើម្បីផ្សព្វផ្សាយលទ្ធផលការងារដោះស្រាយវិវាទដីធ្លីនៅទូទាំងខេត្តក្រចេះដែលយើងបានខិតខំប្រឹងប្រែងដោះស្រាយរយៈពេលជិត ២ ឆ្នាំមកនេះ និងជំរុញឱ្យមានការចូលរួមដោះស្រាយករណីវិវាទដែលនៅសេសសល់ក្នុងខេត្តនេះបន្តទៀត»។
ឯកឧត្តមឧបនាយករដ្ឋមន្ត្រី បានគូសបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ ក៏ដូចជាគណៈកម្មាធិការសុរិយោដីថ្នាក់ជាតិ និងអាជ្ញាធរដោះស្រាយវិវាទដីធ្លី ត្រូវបានដឹកនាំដោយឯកឧត្តមផ្ទាល់ ហើយតាមរយៈយន្តការទាំង ៣ នេះ ជាលទ្ធផលបានចុះបញ្ជីដីធ្លីបានជាង ៤ លានក្បាលដីបន្ថែមទៀតនៅទូទាំងប្រទេសក្នុងរយៈពេលជិត២ ឆ្នាំមកនេះ។
ឯកឧត្តមឧបនាយករដ្ឋមន្ត្រី បានបញ្ជាក់ថា ៖
«យុទ្ធនាការចុះបញ្ជីដីធ្លីនេះបានចាប់ផ្ដើមឡើងតាំងពីឆ្នាំ១៩៨៩ ដែលកាលនោះបានបដិសេធការទាមទារ ការកាន់កាប់អចលនទ្រព្យមុនឆ្នាំ១៩៧៩ ហើយទទួលស្គាល់កម្មសិទ្ធិឯកជន»។
ក្រសួងរៀបចំដែនដី នគរូបនីយកម្ម និងសំណង់ ក្រុមការងារថ្នាក់ជាតិ គណៈកម្មាការសុរិយោដីទាំងថ្នាក់ជាតិ និងថ្នាក់ក្រោមជាតិ និងអជ្ញាធរជាតិដោះស្រាយទំនាស់ដីធ្លី បានឯកភាព និងសម្រេច ៖
ទី១. កំណត់ការដោះស្រាយបញ្ចប់ករណីទាមទារដីរដ្ឋពីបងប្អូនប្រជាពលរដ្ឋដែលបានតាំងទីស្នាក់នៅលើទីតាំងដីរបស់រដ្ឋ ដោយត្រូវអនុវត្តតាមគោលការណ៏ណែនាំរបស់រាជរដ្ឋាភិបាល
ទី២. សម្រេចជំរុញដោះស្រាយតាមគ្រប់យន្តការពីគ្រប់ថ្នាក់ គ្រប់ផ្នែក ពីអ្នកពាក់ព័ន្ធ ដើម្បីបិទបញ្ចប់ករណីវិវាទដែលនៅសេសសល់ទាំង ១៥ករណី។
ឯកឧត្តមឧបនាយករដ្ឋមន្ត្រី សាយ សំអាល់ បានសង្កត់ធ្ងន់ថា ៖
«យើងនឹងប្រារព្ធខួបលើកទី ៤០នៃការធ្វើកំណែទម្រង់ដីធ្លីនៅឆ្នាំ២០២៩ ដោយក្នុងនោះយើងនឹងបញ្ចប់ការចុះបញ្ជីដីធ្លីបង្ហើយនៅទូទាំងប្រទេសឲ្យបានមុនឆ្នាំ២០២៩ ខាងមុខ។ ដោយឡែកសម្រាប់ការចុះបញ្ជីដីធ្លីនៅទូទាំងខេត្តក្រចេះនៅសល់ក្បាលដីតិចតួចប៉ុណ្ណោះ។ តាមរយៈគណៈកម្មាធិការសុរិយោដី យើងបានកែសម្រួល និងតម្រូវតាមបច្ចេកទេសទៅលើការវាស់វែងទាំងអស់ដែលមានពីមុនមក»។
គួរកត់សម្គាល់ថា តាមរយៈអាជ្ញាធរដោះស្រាយវិវាទដីធ្លី កាលពី ១០ ឆ្នាំមុនមានករណីវិវាទដីធ្លីចំនួន ២ ម៉ឺនករណីនៅទូទាំងប្រទេស ប៉ុន្តែបច្ចុប្បន្នគឺបានដោះស្រាយអស់នៅសល់ត្រឹមតែប្រមាណ ៥០០ ករណីប៉ុណ្ណោះ៕
Account
Security
Favourite Content