បរទេស៖ យោងតាមប្រភពព័ត៌មានពីបរទេសបានលើកឡើងថា ការដឹកជញ្ជូនជាសកលបានកើនឡើងជាលំដាប់ក្នុងរយៈពេលពីរទសវត្សរ៍ចុងក្រោយនេះទោះបីជាមានការរាតត្បាតដោយ និងត្រូវបានព្យាករណ៍ថា ដារដឹកជញ្ជូនកុងតឺន័រសកលនឹងកើនឡើងដល់ ៩៨៨ លាននៅឆ្នាំ ២០២៧។

បើយើងក្រឡេកមើលគម្រោងដែលប្រើដើមទុនធំៗក្នុងវិស័យដែនសមុទ្រ ការពង្រីកកំពង់ផែ និងការអភិវឌ្ឍន៍ឡើងវិញ និងការសាងសង់កំពង់ផែបានឈរនៅលំដាប់កំពូលនៃបញ្ជីគម្រោងដែលត្រូវបានអនុម័តសម្រាប់ការសាងសង់ក្នុងអំឡុងពេលប៉ុន្មានឆ្នាំកន្លងមកនេះ។ ទន្ទឹមនឹងនេះ ភាគច្រើននៃកំពង់ផែអាស៊ីស្ថិតនៅក្នុងបញ្ជីកំពង់ផែដឹកកុងតឺន័រដែលមមាញឹកបំផុតនៅលើពិភពលោកនៅឆ្នាំនេះ ជាពិសេសកំពង់ផែចំនួន ៧ ក្នុងចំណោមកំពង់ផែទាំងនេះមានទីតាំងនៅក្នុងប្រទេសចិន ដែលដឹកជញ្ជូនកុងតឺន័រសរុបជាង ២៥៧ លានក្នុងឆ្នាំ ២០២៣ ។ ខាងក្រោមនេះជាច្រកកំពង់ផែដឹកជញ្ជូនកុងតឺន័រដែលមមាញឹកបំផុតទាំង ១០ នៅលើពិភពលោក៖

១. កំពង់ផែសៀងហៃ: វាគឺជាកំពង់ផែដែលមមាញឹកជាងគេក្នុងពិភពលោកទាក់ទងនឹងបរិមាណចរាចរណ៍ទំនិញ និងកុងតឺន័រ។ ជារៀងរាល់ខែ កំពង់ផែនេះទទួលកប៉ាល់ដឹកកុងតឺន័រជាង ២ ០០០ គ្រឿជារៀងរាល់ខែ ហើយស្មើនឹងមួយភាគបួននៃពាណិជ្ជកម្មបរទេសសរុបរបស់ប្រទេសចិន។  ក្នុងឆ្នាំ ២០២៣ ការធ្វើចរាចរណ៍កុងតឺន័រនៅកំពង់ផែសៀងហៃបានកើនឡើងលើសពី ៤៩ លានកុងតឺន័រ ដែលកើនឡើងបន្ថែម ១,៧ លានទូឆ្នាំ ២០២២។

២. កំពង់ផែសិង្ហបុរី: កំពង់ផែសិង្ហបុរីមួយនេះមានទំនាក់ទំនងផ្សារភ្ជាប់ទៅកាន់កំពង់ផែជាង ៦០០ នៅក្នុងប្រទេសចំនួន ១២៣ ។ គម្រោងសាងសង់កំពង់ផែនេះត្រូវបានចំណាយ ២,៦១ ពាន់លានដុល្លារ និងត្រូវបានបញ្ចប់ក្នុងខែមិថុនា ឆ្នាំ ២០២៥។ នៅឆ្នាំ ២០២៣ កំពង់ផែសិង្ហបុរីធ្វើចរាចរណ៍កុងតឺន័រចំនួន ៣៩,០១ លានទូ ដែលកើនឡើង ៤,៦ ភាគរយពីឆ្នាំ ២០២២ ។

៣. កំពង់ផែ Ningbo-Zhoushan: កំពង់ផែ Ningbo-Zhoushan ស្ថិតនៅមុទ្រចិនខាងកើត ដោយត្រូវបានរួមបញ្ចូលគ្នារវាងកំពង់ផែ Ningbo និងកំពង់ផែ Zhoushan ទៅជាមជ្ឈមណ្ឌលដឹកជញ្ជូនទំនិញរួមគ្នាមួយក្នុងឆ្នាំ ២០០៦ ។ មិនត្រឹមតែប៉ុណ្ណោះ វាគឺជាកំពង់ផែទឹកជ្រៅទំនើប ដែលមានស្ថានីយចំណតសរុបចំនួន ១៩១ ក្នុងនោះមានស្ថានីយចំណតទឹកជ្រៅចំនួន ៣៩។ នៅឆ្នាំ ២០២៣ កំពង់ផែ Ningbo-Zhoushan ធ្វើចរាចរណ៍កុងតឺន័រចំនួនសរុបជាង ៣៥,៣ លានទូ ដែលកើនឡើង ៥,៩ ភាគរយពីឆ្នាំ ២០២២។

៤. កំពង់ផែ Shenzhen: កំពង់ផែនេះមានទីតាំងនៅខេត្តក្វាងតុង ភាគខាងត្បូងប្រទេសចិន និងលាតសន្ធឹងលើឆ្នេរសមុទ្រប្រវែង ២៦០ គីឡូម៉ែត។ កំពង់ផែ Shenzhen មានស្ថានីយកុងតឺន័រសំខាន់ៗចំនួន៥, ប្រតិបត្តិករឃ្លាំងជាង ១០០, ក្រុមហ៊ុនផ្តល់សេវាកម្មតាមសមុទ្រ ៨០, និងក្រុមហ៊ុនដឹកជញ្ជូនជាង ២ ០០០ ដោយក្នុងនេះក្រុមហ៊ុនដឹកជញ្ជូនប្រហែល ៤០ មានទីស្នាក់ការកណ្តាលនៅកំពង់ផែ Shenzhen។ លើសពីនេះ កំពង់ផែនេះគឺជាកន្លែងបណ្តាញកុងតឺន័រអន្តរជាតិប្រហែល ១៣០។ នៅឆ្នាំ ២០២៣ កំពង់ផែ Shenzhen ធ្វើចរាចរណ៍កុងតឺន័រចំនួនសរុបជាង ២៦,៨៩​ លានទូ។

៥. កំពង់ផែ Qingdao: កំពង់ផែនេះមានទីតាំងនៅសមុទ្រលឿង ហើយវាគឺជាកំពង់ផែសមុទ្រខាងចរាចរណ៍គ្រឿងប្រើប្រាស់ ឬ ឧបករណ៍ប្រព័ន្ធទំនើបៗជាច្រើន។ បន្ថែមពីនេះ កំពង់ផែនេះត្រូវបានចាត់ទុកថាជាកំពង់ផែធំបំផុតរបស់ពិភពលោកសម្រាប់រ៉ែដែក និងកំពង់ផែប្រេងឆៅធំបំផុតរបស់ប្រទេសចិន។ លើសពីនេះ កំពង់ផែ Qingdao គឺជាផ្នែកមួយនៃគំនិតផ្តួចផ្តើមខ្សែក្រវាត់ និងផ្លូវ (BRI) ដែលតភ្ជាប់ទ្វីបអាស៊ីបូព៌ា និងទ្វីបអឺរ៉ កំពង់ផែនេះត្រូវបានចាត់ទុកថាជាកំពង់ផែធំបំផុតរបស់ពិភពលោកសម្រាប់រ៉ែដែក និងកំពង់ផែប្រេងឆៅធំបំផុតរបស់ប្រទេសចិន។ កំពង់ផែនេះត្រូវបានតភ្ជាប់ទៅកំពង់ផែជាង ៤៥០ ក្នុង ១៣០ ប្រទេស និងតំបន់ជុំវិញពិភពលោក។ នៅឆ្នាំ ២០២៣ កំពង់ផែ Qingdao ធ្វើចរាចរណ៍កុងតឺន័រចំនួនសរុបជាង ២៦,៣៩​ លានទូ ដែលកើនឡើង ២,៨ ភាគរយពីពីឆ្នាំ ២០២២។

៦. កំពង់ផែ Busan: កំពង់ផែនេះគឺជាកំពង់ផែធំបំផុតនៅក្នុងប្រទេសកូរ៉េខាងត្បូង និងមានទីតាំងនៅមាត់ទន្លេ Naktong ។ កំពង់ផែ Busan មានស្ថានីយកុងតឺន័រចំនួន ៣៧ និងចំណតដឹកទំនិញទូទៅចំនួន ៨ ដែលមានចំណតសរុបចំនួន ១៩០ ។ ក្នុងឆ្នាំ ២០២៣ កំពង់ផែ Busan ធ្វើចរាចរណ៍កុងតឺន័រចំនួនសរុបជាង ២២,៧៥​ លានទូ ដែលកើនឡើង ៣,១ ភាគរយពីឆ្នាំ ២០២២។

៧. កំពង់ផែ Tianjin: កំពង់ផែ Tianjin គឺជាច្រកផ្លូវសមុទ្រដ៏សំខាន់ទៅកាន់រដ្ឋធានីប៉េកាំង និងជាកំពង់ផែធំបំផុតនៅភាគខាងជើងប្រទេសចិន។​ កំពង់ផែ Tianjin គ្របដណ្ដប់លើផ្ទៃដី ១២១ ០០០ ហិកតា ជាមួយនឹងស្ថានីយប្រតិបត្តិការ ១៤០ និងចំណតសាធារណៈ ៩៤។ ក្នុងឆ្នាំ ២០២៣ កំពង់ផែ Tianjin ធ្វើចរាចរណ៍កុងតឺន័រចំនួនសរុបជាង ២១,៨០​ លានទូ។

៨. កំពង់ផែ Guangzhou: វាគឺជាកំពង់ផែសមុទ្រដ៏សំខាន់នៃទីក្រុងក្វាងចូវភាគខាងត្បូងប្រទេសចិន ហើយកំពង់ផែ​នេះ​គឺ​ជា​ផ្នែក​មួយ​នៃ​ផ្លូវ​សូត្រ​សមុទ្រ​ដែល​តភ្ជាប់​ប្រទេស​ចិន​ទៅ​អឺរ៉ុប​តាម​រយៈ​ប្រទេស​ឥណ្ឌា Mombasa និង​ព្រែកជីកស៊ុយអេ។ ក្នុងឆ្នាំ ២០២៣ កំពង់ផែ Guangzhou ធ្វើចរាចរណ៍កុងតឺន័រចំនួនសរុបជាង ២០,៨០​ លានទូ ដែលជាការកើនឡើង ២,៥ ភាគរយពីឆ្នាំ ២០២២។

៩. កំពង់ផែហុងកុង: វាគឺជាកំពង់ផែទឹកជ្រៅដែលមានទីតាំងនៅទីក្រុងហុងកុង SAR នៅលើសមុទ្រចិនខាងត្បូង។ កំពង់ផែនេះអាចផ្ទុកនាវាគ្រប់ប្រភេទ ព្រោះវាប្រើប្រាស់ទឹកជ្រៅធម្មជាតិរបស់ Victoria Harbour ជាមួយនឹងការដឹកជញ្ជូនកុងតឺន័រចំនួន ៤០០ ទៅកាន់គោលដៅជាង ៥០០ កន្លែង។ ក្នុងឆ្នាំ ២០២៣ កំពង់ផែហុងកុងធ្វើចរាចរណ៍កុងតឺន័រចំនួនសរុបជាង ១៤,៣ លានទូ ដែលធ្លាក់ចុះ ១៤ ភាគរយពីឆ្នាំ ២០២២។

១០. កំពង់ផែ Rotterdam: កំពង់ផែនេះមានទីតាំងនៅជិតទីក្រុង Rotterdam ប្រទេសហូឡង់ និងធ្លាប់កាន់តំណែងជាកំពង់ផែដ៏មមាញឹកបំផុតរបស់ពិភពលោករហូតដល់ឆ្នាំ ២០០៤។ កំពង់ផែ Rotterdam គឺជាកំពង់ផែកុងតឺន័រដ៏មមាញឹកបំផុតនៅអឺរ៉ុប ដែលមានស្ថានីយកុងតឺន័រចំនួន ១៤ និងឃ្លាំងផ្ទុកកុងតឺន័រចំនួន ២០។ ក្នុងឆ្នាំ ២០២៣ កំពង់ផែ Rotterdam ធ្វើចរាចរណ៍កុងតឺន័រចំនួនសរុបជាង ១៣,៤ លានទូ ដែលធ្លាក់ចុះ ៧ ភាគរយពីឆ្នាំ ២០២២៕