សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការវិនិយោគលើឧស្សាហកម្មរោងចក្រកាត់ដេរសម្លៀកបំពាក់នៅក្នុងប្រទេសកម្ពុជាមានការកើនឡើងជាបន្តបន្ទាប់ ដែលបានរួមចំណែកក្នុងការផ្ដល់ការងារ និងប្រាក់ចំណូលដល់កម្មករនិយោជិតកម្ពុជារាប់សិបម៉ឺននាក់ផងដែរ។
ថ្លែងនៅក្នុងពិធីសំណេះសំណាលជាមួយកម្មករ កម្មការិនី នៅក្នុងតំបន់សេដ្ឋកិច្ចពិសេសរ៉ូយ៉ាល់ភ្នំពេញ កាលពីពេលកន្លងទៅថ្មីៗនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថាកាលពីឆ្នាំ១៩៩៧ ចំនួនរោងចក្រនៅក្នុងប្រទេសកម្ពុជាមានតែ៦៤រោងចក្រប៉ុណ្ណោះ ដែលបានផ្ដល់ឱកាសការងារដល់កម្មករ-កម្មការិនីសរុបចំនួន៨ម៉ឺននាក់។ កាលនោះដែរ ប្រាក់ខែកម្មករនិយោជិតរបស់យើងជាមធ្យមបានតែ៤០ដុល្លារអាមេរិកប៉ុណ្ណោះក្នុងមួយខែ ហើយទំហំនៃការនាំចេញក្នុងវិស័យនេះដែរ ក៏មានត្រឹមតែ២៧០លានដុល្លារអាមេរិកទេ ។ ប៉ុន្តែមកដល់ពេលនេះរោងចក្រនៅទូទាំងប្រទេសកម្ពុជាមានចំនួនរហូតដល់ ១ ៣២៦រោងចក្រជាមួយនឹងកម្មករនិយោជិតសរុបចំនួន៨៤ម៉ឺននាក់ ។
សម្ដេចតេជោបន្តថា ៖
“បើនិយាយពីរោងចក្រសហគ្រាសទូទាំងប្រទេសគិតត្រឹមឆ្នាំ២០២៣នេះ មានចំនួនរហូតដល់១ម៉ឺន៧ពាន់រោងចក្រសហគ្រាស និងមានកំលាំងពលកម្មសរុបចំនួន១,៥លាននាក់ ដែលចំនួននេះគឺមានការកើនឡើងខ្ពស់ធៀបនឹងយើងចាប់ផ្ដើមដំបូងក្នុងឆ្នាំ១៩៩៧ ដែលធ្វើឱ្យទំហំនៃការនាំចេញរបស់យើងកាន់តែធំ និងបានកើនឡើងពីមួយឆ្នាំទៅមួយឆ្នាំ ពីព្រោះថាទីផ្សារនាំចេញរបស់កម្ពុជាមិនពឹងផ្អែកលើទីផ្សារតែមួយនោះទេ ដោយយើងមានទីផ្សារកាន់តែច្រើន។”
សម្ដេចតេជោមានប្រសាសន៍ថា ៖
“ទីក្រុងភ្នំពេញ ជាតំបន់ដែលមានរោងចក្រច្រើនជាងគេក្នុងចំណោមបណ្ដាខេត្តរាជធានី ដូច្នេះហើយទើបខ្ញុំបានចង្អុរបង្ហាញឱ្យអភិវឌ្ឍន៍ហេដ្ឋារចនាសម្ព័ន្ធចាំបាច់ដើម្បីទាក់ទាញវិនិយោគទៅកាន់បណ្ដាខេត្ត ហើយបើមិនដូច្នោះទេ អ្នកពីខេត្តនឹងសម្រុកចូលទីក្រុងភ្នំពេញ ដែលអាចជាលំបាកសម្រាប់ភ្នំពេញ។ អញ្ចឹងហើយបានជាឥឡូវនេះមានរោងចក្រនៅតាមបណ្ដាខេត្តជាច្រើន ដូចជា កណ្ដាល កំពង់ចាម តាកែវ កំពត កំពង់ស្ពឺ ពោធិ៍សាត់ ក្រុងព្រះសីហនុ កោះកុង ស្វាយរៀង កំពង់ឆ្នាំងជាដើម។”
សម្ដេចតេជោបន្ថែមថា ៖
“សម្រាប់ការនាំចេញវិញ បើទោះបីជាទីផ្សារនៃប្រទេសមួយចំនួនមានបញ្ហាក៏មិនធ្វើឱ្យការនាំចេញរបស់កម្ពុជាមានបញ្ហា ឬធ្លាក់ចុះនោះដែរ។ ការនាំចេញទៅប្រទេសមួយមានបញ្ហា តែយើងអាចនាំចេញទៅប្រទេសជាច្រើនទៀត ដូច្នេះហើយ ទើបយើងមើលឃើញថាការនាំចេញរបស់យើងនៅតែកើនដោយមិនមានការថមថយនោះទេ។”
បើតាមរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងផងដែរថា ក្នុងចំណោមកម្មករនិយោជិតដែលកំពុងបម្រើការងារក្នុងប្រទេសចំនួន ១,៥លាននាក់ក្នុងមួយឆ្នាំទទួលបានប្រាក់បៀរត្សរ៍ប្រមាណ ៤,៥៥ពាន់លានដុល្លារអាមេរិក ដែលចំនួននេះបានជួយលើកកម្ពស់ដល់សេដ្ឋកិច្ចជាតិ និងគ្រួសាររបស់កម្មករនិយោជិតផងដែរ។
ចំនួនរោងចក្រនៅក្នុងប្រទេសកម្ពុជាក៏រំពឹងថា នឹងកើនឡើងជាបន្តបន្ទាប់ ជាក់ស្ដែងបើតាមសេចក្ដីប្រកាសព័ត៌មានជាបន្តបន្ទាប់របស់ក្រុមប្រឹក្សាអភិវឌ្ឍន៍កម្ពុជាបានឃើញថា ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគរោងចក្រជាច្រើនក្នុងមួយខែៗ ដោយរោងចក្រទាំងនោះ មានទីតាំងនៅតាមបណ្ដាខេត្តនិងរាជធានីភ្នំពេញ ហើយក្នុងនោះដែរ ខេត្តកំពង់ស្ពឺហាក់ទទួលបានគម្រោងវិនិយោគរោងចក្រនេះច្រើនជាងគេ។ ក្រៅពីនោះ តំបន់សេដ្ឋកិច្ចពិសេសដែលរាជរដ្ឋាភិបាលបង្កើតឡើងនៅតាមបណ្ដាខេត្តក៏ឃើញថាទទួលបានគម្រោងវិនិយោគរោងចក្រច្រើនផងដែរ៕
Account
Security
Favourite Content