សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលនៃព្រះរាជាណាចក្រកម្ពុជាបានបង្ហាញផែនការក្នុងការអភិវឌ្ឍនគរូបនីយកម្មនៅតាមបណ្ដាខេត្ត ដោយនឹងរៀបចំកសាងបុរីជនបទនៅតាមទីជនបទតាមបណ្ដាខេត្តនានា ដើម្បីឱ្យការរស់នៅរបស់ប្រជាពលរដ្ឋបានសមរម្យ។
ថ្លែងនៅក្នុងពិធីបិទសន្និបាតបូកសរុបការងាររបស់ក្រសួងអភិវឌ្ឍន៍ជនបទកាលពីរសៀលថ្ងៃទី២០ មីនា ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានមានប្រសាសន៍ថា ពីមុនធ្លាប់តែឭបុរី១០០ខ្នង បុរីទន្លេបាសាក់ ដូច្នេះ បន្តិចទៀតក៏នឹងមានបុរីជនបទ ដែលបុរីជនបទនេះ គឺសំដៅដល់ការរៀបចំភូមិឋានរបស់ប្រជាពលរដ្ឋឱ្យមានសណ្ដាប់ធ្នាប់ សោភ័ណភាព ងាយស្រួលរស់នៅ ។
សម្ដេចធិបតីបានមានប្រសាសន៍បន្តថា រាជរដ្ឋាភិបាលនឹងរៀបចំផ្លូវ ហេដ្ឋារចនាសម្ព័ន្ធ សាលារៀន មន្ទីរពេទ្យកសាងប្រព័ន្ធទឹកស្អាត ដែលនេះគឺជាគោលការណ៍រាជរដ្ឋាភិបាលបានធ្វើ និងបន្តធ្វើក្នុងអាណត្តិនេះ។
ក្រៅពីផែនការអភិវឌ្ឍទីជនបទ រាជរដ្ឋាភិបាលក៏មានបំណងប្រែក្លាយទីប្រជុំជនទាំងអស់ទៅជាទីក្រុងប្រកបដោយសោភ័ណភាព មានសណ្តាប់ធ្នាប់ និងមានបរិស្ថានល្អ ដែលប្រជាជនមានមោទនភាពក្នុងការរស់នៅជាលក្ខណៈបុគ្គល និងគ្រួសារ ស្របនឹងសហសម័យកម្ពុជា ។
នៅក្នុងកិច្ចប្រជុំក្រុមប្រឹក្សាគណៈស្ថាបត្យករកម្ពុជា ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ បានជំរុញគណៈស្ថាបត្យករកម្ពុជាឱ្យរៀបចំផែនការយុទ្ធសាស្ត្ររបស់ខ្លួនប្រកបដោយភាពរស់រវើក និងគ្រប់ជ្រុងជ្រោយ ព្រមទាំងលើកទឹកចិត្តគណៈស្ថាបត្យករកម្ពុជា និងគណៈវិស្វករកម្ពុជា គិតគូរច្នៃប្រឌិតអភិវឌ្ឍជំនាញរបស់ខ្លួនឱ្យកាន់តែប្រសើរ ដើម្បីមានលទ្ធភាពរួមចំណែកកសាងធនធានមនុស្សប្រកបដោយគុណភាព ៕
Account
Security
Favourite Content