បរទេស៖ យោងតាមប្រភពព័ត៌ពីរ៉យទ័រ រាយការណ៍ថា មូលនិធិរូបិយវត្ថុអន្តរជាតិ IMF បានព្រមានអំពីផែនការរបស់លោកខាងលិចក្នុងការប្រើប្រាស់ប្រាក់ចំណេញពីការបង្កកទុនបម្រុងរបស់ ដែលអាចបំផ្លាញប្រព័ន្ធរូបិយវត្ថុពិភពលោក។

ចាប់តាំងពីមានជម្លោះរុស្ស៊ី-អ៊ុយក្រែនក្នុងខែកុម្ភៈ ឆ្នាំ ២០២២ បណ្តាប្រទេសលោកខាងលិច ជាពិសេសរដ្ឋអាម៉េរិក ចក្រភពអង់គ្លេស និងសហភាពអឺរ៉ុបបានបង្កកទ្រព្យសម្បត្តិប្រមាណ ៣០០ ពាន់លានដុល្លារ ដែលជាកម្មសិទ្ធិរបស់ធនាគារកណ្តាលរុស្ស៊ី។ សហរដ្ឋអាមេរិក និងបណ្តាប្រទេស សហភាពអឹរ៉ុបមួយចំនួនបានតស៊ូមតិក្នុងការរឹបអូសទ្រព្យសម្បត្តិទាំងនេះ ដើម្បីផ្តល់ហិរញ្ញប្បទានដល់វិស័យការពារជាតិអ៊ុយក្រែន និងការកសាងឡើងវិញប្រទេសឡើងវិញ។ ទោះបីជាយ៉ាងណាក្តី បារាំង អាល្លឺម៉ង់ និងសមាជិកសហភាពអឺរ៉ុបមួយចំនួនទៀតបានប្រឆាំងនឹងផែនការមួយនេះ ដោយបានព្រមានថា វិធានការបែបនេះអាចកំណត់ជាគំរូដ៏គ្រោះថ្នាក់ និងប៉ះពាល់ដល់ប្រាក់អឺរ៉ូយ៉ាងធ្ងន់ធ្ងរ។ ប្រទេសលោកខាងលិចមួយចំនួនបានស្នើឱ្យប្រើប្រាស់ការប្រាក់ដែលទទួលបានលើទ្រព្យសកម្មប៉ុណ្ណោះ ប៉ុន្តែវិធីសាស្រ្តនោះក៏មានការលំបាកផ្នែកច្បាប់ផងដែរ។

លោកស្រី Julie Kozack អ្នកនាំពាក្យមូលនិធិរូបិយវត្ថុអន្តរជាតិ IMF បាននិយាយនៅក្នុងសន្និសីទសារព័ត៌មានមួយថា វាពិតជាសំខាន់ណាស់ក្នុងការប្រើប្រាស់មូលនិធិក្នុងសកម្មភាពណាមួយដែលបានធ្វើឡើងមានមូលដ្ឋានច្បាប់គ្រប់គ្រាន់ និងមិនធ្វើឱ្យខូចដល់ដំណើរការនៃប្រព័ន្ធរូបិយវត្ថុអន្តរជាតិ ។ លោកស្រីបានសង្កត់ធ្ងន់ថា ការសម្រេចចិត្តណាមួយត្រូវតែធ្វើឡើងនៅក្នុងតុលាការ និងយុត្តាធិការស្របច្បាប់ ដោយសារការឈានដល់កិច្ចព្រមព្រៀងមួយអំពីមូលនិធិរុស្ស៊ីនឹងត្រូវបានពិភាក្សានៅកម្រិតកិច្ចប្រជុំថ្នាក់រដ្ឋមន្ត្រីរបស់ក្រុមប្រទេស G7 នៅប្រទេសអ៊ីតាលីនាពេលខាងមុខ។

មិនត្រឹមតែប៉ុណ្ណោះ មូលនិធិរូបិយវត្ថុអន្តរជាតិ IMF បានព្រមានម្តងហើយម្តងទៀតថា ផែនការរបស់លោកខាងលិចក្នុងការរឹបអូសទ្រព្យសម្បត្តិបង្កករបស់រុស្ស៊ីអាចនាំមកនូវហានិភ័យដែលមិនបានមើលឃើញទុកជាមុន។ ការជំរុញផែនការក្នុងការរឹបអូសទ្រព្យសម្បត្តិបង្កកដែលត្រូវបានដឹកនាំដោយសហរដ្ឋអាមេរិកបានបង្កឱ្យមានការបែកបាក់គ្នាក្នុងចំណោមឥស្សរជននយោបាយ G7 និង EU រួចទៅហើយ។ ទន្ទឹមនឹងនេះ សហរដ្ឋអាមេរិកដែលមានទ្រព្យសម្បត្តិត្រឹមតែ ៦ ពាន់លានដុល្លារប៉ុណ្ណោះក្នុងចំណោម ៣០០ ពាន់លានដុល្លារនៅក្នុងទ្រព្យសម្បត្តិបង្កករបស់រុស្ស៊ីនោះ កំពុងជំរុញសម្ព័ន្ធមិត្តរបស់ខ្លួនឱ្យមានការរឹបអូសទាំងស្រុង។​ មន្ត្រីលោកខាងលិចមួយចំនួនបានគាំទ្រគំនិតនេះ ដោយស្នើឱ្យផ្ទេរមូលនិធិទៅអ៊ុយក្រែន ឬយ៉ាងហោចណាស់ប្រើប្រាស់ការប្រាក់ដែលបង្កើតពីទ្រព្យសម្បត្តិបង្កកនោះ។

ទោះជាយ៉ាងណាក្តី វិធីសាស្រ្តនេះបានប្រឈមមុខនឹងការប្រឆាំងពីធនាគារកណ្តាលអឺរ៉ុប និងការរិះគន់ពី IMF ។ មិនត្រឹមតែប៉ុណ្ណោះ ទីក្រុងមូស្គូបានព្រមានម្តងហើយម្តងទៀតថា ការរឹបអូសយកមូលនិធិរបស់ខ្លួនស្មើរនឹងសកម្មភាពលួច ដែលនឹងធ្វើឱ្យប៉ះពាល់ដល់ទំនុកចិត្តជាសកលក្នុងប្រព័ន្ធហិរញ្ញវត្ថុលោកខាងលិចបន្ថែមទៀត។ រុស្ស៊ី​ក៏​បាន​ព្រមាន​ដែរ​ថា ខ្លួន​នឹង​ឆ្លើយតបទៅវិញ ​ប្រសិនបើ​មាន​វិធានការ​បែប​នេះ​កើតឡើងពិតមែន។ ថ្មីៗនេះផងដែរ តុលាការរុស្ស៊ីបានបញ្ជាឱ្យរឹបអូសទ្រព្យសម្បត្តិ និងភាគហ៊ុនរបស់ធនាគារ Deutsche Bank និង Commerzbank ក្នុងប្រទេសរុស្ស៊ី ដែលជាផ្នែកមួយនៃជម្លោះជុំវិញគម្រោងឧស្ម័នដែលត្រូវបានបញ្ឈប់ដោយសារទណ្ឌកម្មរសប់លោកខាងលិច៕