សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ក្រុមការងារដោះស្រាយអគារជាប់គាំងនៅខេត្តព្រះសីហនុ បានបន្តពិភាក្សាស្វែងរកដំណោះស្រាយបន្ថែមទៀត ដើម្បីធ្វើយ៉ាងណាជំរុញការអភិវឌ្ឍអគារជាប់គាំងទាំងនោះឱ្យមានដំណើរការឡើងវិញ។ ជាក់ស្ដែងនៅថ្ងៃទី ៣១ ខែតុលា ២០២៣ ក្រុមការងារដែលរួមមានក្រសួងសេដ្ឋកិច្ចនិងហិរញ្ញវត្ថុ ក្រសួងរៀបចំដែនដីនគរូបនីយកម្ម និងសំណង់ និង រដ្ឋបាលខេត្តព្រះសីហនុ បានពិភាក្សាស្វែងរកដំណោះស្រាយជុំវិញករណីនេះបន្ត ។
នៅក្នុងកិច្ចប្រជុំនោះ ឯកឧត្តម ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារដោះស្រាយគម្រោងវិនិយោគជាប់គាំងនៅក្នុងខេត្តព្រះសីហនុ បានបញ្ជាក់ថា រាជរដ្ឋាភិបាលបានដាក់ចេញវិធានការជាកញ្ចប់ ដើម្បីដោះស្រាយគម្រោងវិនិយោគជាប់គាំងក្នុងខេត្តព្រះសីហនុ ដោយផ្អែកតាមគោលការណ៍ ២៖ ទី១. ឱ្យអគារដែលសាងសង់មិនទាន់ចប់ អាចសាងសង់បញ្ចប់ និងទី២. ឱ្យអគារ ដែលបានសាងសង់ចប់ អាចមានសកម្មភាពវិនិយោគ ឬធុរកិច្ច ។
ឯកឧត្តម ឡុង ឌីម៉ង់ អភិបាលរង និងជា អ្នកនាំពាក្យរដ្ឋបាលសាលាខេត្តព្រះសីហនុ បានមានប្រសាសន៍ប្រាប់ AMS Economy ឱ្យដឹងផងដែរថា កិច្ចប្រជុំពិភាក្សានៅព្រឹកថ្ងៃទី ៣១ ខែតុលា ឆ្នាំ២០២៣ គឺ ពិភាក្សាទៅលើចរន្ត និងដំណោះស្រាយនូវអគារជាប់គាំងក្នុងខេត្តព្រះសីហនុបន្តទៀត ក្នុងនោះក្រុមការងារគ្រោងនឹងបង្កើតការិយាល័យទទួលពាក្យ នៅក្នុងរដ្ឋបាលខេត្តព្រះសីហនុ ដើម្បីឱ្យក្រុមការងារទទួលយកសំណុំបែបមួយចំនួន ហើយធ្វើការពិគ្រោះយោបល់ជាមួយភាគីពាក់ព័ន្ធទាំងអស់ក្នុងការពិចារណា និងរកដំណោះស្រាយ ។
គួរបញ្ជាក់ថា ខេត្តព្រះសីហនុ គឺជាខេត្តមួយ ដែលរាជរដ្ឋាភិបាលផ្តោតអាទិភាពខ្ពស់ ហើយម៉្យាងជាខេត្តដែលមានអគារច្រើន មានតម្លៃជាង ១ ០០០ លានដុល្លារអាមេរិក ដែលត្រូវជួយដោះស្រាយ ដើម្បីជំរុញសកម្មភាព សេដ្ឋកិច្ច និងធុរកិច្ច ជាពិសេស ប្រែក្លាយពីស្ថានភាពជាប់គាំងក្នុងអតីតកាលទៅជាស្ថានភាពរស់រវើក ប្រកបដោយថាមពលក្នុងពេលបច្ចុប្បន្ន និងអនាគត។ វិធានការដោះស្រាយគម្រោងវិនិយោគជាប់គាំង គឺជា “វិធានការជាកញ្ចប់ដែលត្រូវអនុវត្តដោយមានការចូលរួមពីក្រសួងស្ថាប័នពាក់ព័ន្ធ ជាតួអង្គតែមួយប្រកបដោយឆន្ទៈខ្ពស់ និងមានភាពសកម្ម ដែលត្រូវធ្វើឡើងតាមរយៈការទាក់ទាញវិនិយោគិន និងភ្ញៀវទេសចរ ការបង្កើតតម្រូវការទីផ្សារ សំដៅកាត់បន្ថយគម្រោងវិនិយោគជាប់គាំងជាអតិបរិមា និងការបង្កើតសកម្មភាពសេដ្ឋកិច្ចដ៏រស់រវើកឡើងវិញ ៕
Account
Security
Favourite Content