សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្លែងនៅក្នុងកម្មវិធីបិទការប្រកួតប្រជែងស្នាដៃស្ថាបត្យកម្មសហគមន៍បៃតងឧទ្យានមេគង្គលែន កាលពីថ្ងៃចុងសប្ដាហ៍កន្លងទៅនេះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា កម្ពុជាមិនអាចនៅតែត្រឹមនេះបានទេ គឺត្រូវតែលូតលាស់ទៅមុខដើម្បីរស់បានដោយខ្លួនឯង និងអាចប្រកួតប្រជែងជាមួយបណ្ដាប្រទេសនានាលើពិភពលោក ហើយសង្ឃឹមថាកម្ពុជានឹងអាចធ្វើបាន ។
ឯកឧត្តមបានមានប្រសាសន៍បញ្ជាក់ថា កម្មវិធីប្រកួតជែងស្នាដៃស្ថាបត្យកម្មសហគមន៍បៃតងឧទ្យានមេគង្គលែននេះមិនគ្រាន់តែជាកម្មវិធីប្រកួតប្រជែងប៉ុណ្ណោះទេ ប៉ុន្តែជាការបង្ហាញនូវសិល្បៈនៃគំនិតរបស់និស្សិត និងស្ថាបត្យករពាក់ព័ន្ធទៅនឹងវិស័យស្ថាបត្យកម្ម ។
នាឱកាសនោះ ឯកឧត្តម ឧបនាយករដ្ឋមន្ត្រី សាយ សំអាល់ បានថ្លែងអំណរគុណដល់គណៈស្ថាបត្យករកម្ពុជាដែលបានផ្ដួចផ្ដើមរៀបចំកម្មវិធីប្រកួតប្រជែងនេះឡើង និងអរគុណដល់សិស្ស-និស្សិត ដែលបានចូលរួម ហើយនេះជាសក្ខីភាពមួយបង្ហាញឱ្យឃើញពីការចូលរួមកសាងនូវកម្លាំងរបស់ស្ថាបត្យករកម្ពុជា ដែលលទ្ធផលនៃការប្រកួតប្រជែងនេះជាលទ្ធផលមួយដ៏សំខាន់ និងជាគំរូដល់ក្រុមហ៊ុនឯកជនផ្សេងៗទៀតដែលធ្វើអាជីវកម្មផ្នែកស្ថាបត្យកម្ម ជាគំរូដល់បុរីផ្សេងៗឱ្យយល់ឃើញថា នេះហើយគឺជារឿងដែលត្រូវធ្វើ។
ឯកឧត្តម ឧបនាយករដ្ឋមន្ត្រី បានសង្កត់ធ្ងន់ថា ៖
« កិច្ចការនេះគឺជាការឆ្លើយតបដ៏មានប្រសិទ្ធភាពទៅនឹងគោលគំនិតរបស់រាជរដ្ឋាភិបាល ជាពិសេសគឺ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការប្រែក្លាយសង្គមជាតិកម្ពុជា តាមរយៈស្ថាបត្យកម្ម។ យុទ្ធសាស្ត្របញ្ចកោណប្រហែលជាត្រូវអនុវត្តក្នុងរយៈពេល ២៥ឆ្នាំ ឬ ៥ អាណត្តិ ដូច្នេះ នាឆ្នាំ២០៥០ យើងសង្ឃឹមថាប្រទេសកម្ពុជានឹងក្លាយជាប្រទេសដែលមានចំណូលខ្ពស់ ហើយវិស័យស្ថាបត្យកម្មគឺជាចំណែកមួយដ៏សំខាន់ក្នុងការជំរុញសម្រេចបាននូវចក្ខុវិស័យនេះ»។
ឯកឧត្តមបានបញ្ជាក់ថា នេះមិនគ្រាន់តែជាកម្មវិធីប្រកួតប្រជែងប៉ុណ្ណោះទេ ប៉ុន្តែជាការបង្ហាញនូវសិល្បៈនៃគំនិតរបស់និស្សិត និងស្ថាបត្យករពាក់ព័ន្ធទៅនឹងវិស័យស្ថាបត្យកម្ម។ កម្ពុជាមិនអាចនៅតែត្រឹមនេះបានទេ គឺត្រូវតែលូតលាស់ទៅមុខដើម្បីរស់បានដោយខ្លួនឯង និងអាចប្រកួតប្រជែងជាមួយបណ្ដាប្រទេសនានាលើពិភពលោក ហើយកម្ពុជានឹងអាចធ្វើបាន។ ការរៀបចំកម្មវិធីប្រកួតប្រជែងនេះ មិនត្រឹមតែឆ្លើយតបនូវគោលបំណងដ៏ពិសិដ្ឋរបស់កម្ពុជានោះទេ ប៉ុន្តែថែមទាំងបានចូលរួមជំរុញឱ្យកម្ពុជាឈានឆ្ពោះទៅមុខលើផ្នែកស្ថាបត្យកម្មផងដែរ។ កម្ពុជា ត្រូវការស្ថាបត្យករដែលមានសិល្បៈប្រពៃណីទំនៀមទម្លាប់ អរិយធម៌ មានមនោសញ្ជេតនា ដើម្បីឱ្យស្ថាបត្យកម្មមានភាពរស់រវើក មានគុណភាព និងសោភ័ណភាពស្របទៅនឹងបរិបទដែលសង្គមកម្ពុជានាពេលបច្ចុប្បន្នបានរស់ឡើងវិញពោរពេញដោយមនោសញ្ចេតនា។
ឯកឧត្តម ឧបនាយករដ្ឋមន្ត្រី សាយ សំអាល់ បានចាត់ទុកការចូលរួមប្រកួតប្រជែងក្នុងកម្មវិធីរបស់សិស្ស-និស្សិតនេះ ក៏ដូចជាស្ថាបត្យករថា ជាការចូលរួមដ៏ធំធេង ជាចំណុចចាប់ផ្ដើមនូវការផ្លាស់ប្ដូរនៃផ្នត់គំនិត និងជីវិតរបស់ប្រជាជនកម្ពុជា ហើយជនរួមជាតិកម្ពុជានឹងស្រឡាញ់គ្នាច្រើនជាងមុន ស្រឡាញ់ជីវិតខ្លួនឯង គ្រួសារ និងជីវិតអ្នកដទៃច្រើនជាងមុន។ នេះជាពេលដែលត្រូវរួមគ្នាកសាងកម្ពុជាឱ្យក្លាយជាភូមិឋានក្សេមក្សាន្ត ជាទ្រនំសុភមង្គល សម្រាប់ប្រជាពលរដ្ឋ ងាយស្រួលរស់នៅប្រកបដោយភាពសុខដុមរមនា មានលំនៅឋាន មានការងារ និងប្រាក់ចំណូលសមរម្យ មានម្ហូបអាហារហូបចុកគ្រប់គ្រាន់ និងទទួលបានការសិក្សាអប់រំគ្រប់ៗគ្នា ៕
Account
Security
Favourite Content