សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមថ្ងៃទី២ ខែសីហា ឆ្នាំ២០២៤នេះ នៅសល់តែ៣ថ្ងៃទៀតប៉ុណ្ណោះ គម្រោងព្រែកជីកហ្វូណនតេជោ នឹងបើកការដ្ឋានសាងសង់ជាផ្លូវការក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ។ ស្របនឹងព្រឹត្តិការណ៍បើកការដ្ឋានសាងសង់ព្រែកជីកនេះ កាន់តែខិតជិតមកដល់ប្រជាពលរដ្ឋកម្ពុជាបានផ្ទុះការគាំទ្រលើគម្រោងមួយនេះ ដែលជាគម្រោងប្រវត្តិសាស្ត្រសម្រាប់ប្រព័ន្ធដឹកជញ្ជូនផ្លូវទឹករបស់កម្ពុជា ។
យោងតាមបណ្តាញទំនាក់ទំនងអេឡិចត្រូនិករបស់សម្ដេចមហាបវធិបតី ហ៊ុន ម៉ាណែត បានបង្ហាញឱ្យឃើញថា សិស្ស -និស្សិត មន្ត្រីរាជការ តាមបណ្ដាអង្គភាពនានាបានចេញសារគាំទ្រភ្លូកទឹកភ្លូកដី ក្នុងនោះមានទាំងសាលារៀនរដ្ឋ និងឯកជនជាច្រើន ក៏បាននិពន្ធបទចម្រៀងទាក់ទងនឹងព្រែកជីកប្រវត្តិសាស្ត្រមួយនេះផងដែរ ។ ទន្ទឹមនឹងព្រឹត្តិការណ៍ដ៏មហស្ចារ្យនេះដែរ រាជរដ្ឋាភិបាលក៏បានចេញសេចក្ដីសម្រេច អនុញ្ញាតឱ្យសិស្-សនិស្សិត បុគ្គលិក កម្មករនិយោជិត និងមន្ត្រីរាជការទូទាំងប្រទេសបានឈប់សម្រាកមួយថ្ងៃ នៅថ្ងៃទី៥ សីហ ២០២៤ ដើម្បីអបអរសាទរការបើកការដ្ឋានសាងសង់ព្រែកជីកហ្វូណនតេជោ ។
បើតាមការគ្រោងទុកក្នុងពិធីបើកការដ្ឋានសាងសង់ព្រែកជីកហ្វូណនតេជោដែលប្រព្រឹត្តទៅនៅថ្ងៃទី០៥ ខែសីហា ឆ្នាំ២០២៤ នឹងមានអ្នកចូលរួមប្រមាណជាង ១ម៉ឺននាក់នៅទីតាំងផ្ទាល់ ហើយនៅតាមសាលារៀន វត្តអារាម តាមក្រសួងស្ថាប័ននានាទូទាំងប្រទេសក៏បានត្រៀមគង ស្គរ រគាំងដើម្បីត្រៀមវាយ គោះ អបអរសាទរនៅព្រឹកថ្ងៃបើកការដ្ឋាននោះវេលាម៉ោង៩ និង៩នាទីព្រឹក ថ្ងៃទី៥ សីហានោះផងដែរ ។
ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានលើកឡើងចំពោះមុខវិនិយោគិនជាច្រើនដែលបានមកទស្សនកិច្ចនៅកម្ពុជា ពីគម្រោងព្រែកជីកហ្វូណនតេជោដោយបញ្ជាក់ថា កម្ពុជានឹងមានផ្លូវដឹកជញ្ជូនថ្មីមួយទៀតនាពេលឆាប់ៗនេះ ។
ឯកឧត្តមបានលើកឡើងថា ព្រែកជីកហ្វូណនតេជោ ជាផ្លូវដឹកជញ្ជូនមួយដែលអាចតភ្ជាប់ផ្លូវដឹកជញ្ជូនទឹកសាបទៅកាន់សមុទ្រទឹកប្រៃ ហើយពេលនោះនឹងធ្វើឱ្យការដឹកជញ្ជូននៅក្នុងប្រទេសកម្ពុជាមានជម្រើសកាន់តែច្រើន ដែលអាចដឹកតាមគោក ផ្លូវជាតិលេខ៤ ឬផ្លូវល្បឿនលឿនភ្នំពេញ-ក្រុងព្រះសីហនុ, ផ្លូវដែកភ្នំពេញ-ក្រុងព្រះសីហនុ ,ភ្នំពេញ-បាត់ដំបង-ប៉ោយប៉ែត ឬក៏អាចដឹកតាមផ្លូវទឹក ភ្នំពេញទៅកាន់កំពង់ផែខេត្តកែប តាមព្រែកជីកដែលនឹងបើកការដ្ឋាននៅពេលខាងមុខឆាប់ៗនេះ ភ្ជាប់ទៅកាន់កំពង់ផែទឹកជ្រៅខេត្តកំពត និងបន្តទៅកាន់កំពង់ផែទឹកជ្រៅក្រុងព្រះសីហនុ ។
លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាបានមានប្រសាសន៍ថា គម្រោងព្រែកជីកហ្វូណនតេជោ នឹងសម្រួលដល់ការដឹកជញ្ជូននៅក្នុងប្រទេសកម្ពុជា ហេតុនេះហើយទើបរាជរដ្ឋាភិបាលបានខិតខំធ្វើយ៉ាងណាឱ្យគម្រោងនេះចេញជារូបរាង ។
លោកឧកញ៉ាបន្តថា នៅក្នុងប្រទេសកម្ពុជាក៏ដូចជាលើពិភពលោកមានមធ្យោបាយដឹកជញ្ជូនសំខាន់ៗ ៤ប្រភេទ រួមមានផ្លូវទឹក ផ្លូវថ្នល់ ផ្លូវដែកនិងផ្លូវអាកាស ប៉ុន្តែមធ្យោបាយដែលនិយមជាងគេនិងមានតម្លៃទាបជាងគេនោះ គឺផ្លូវទឹក ។ ការដឹកជញ្ជូនតាមផ្លូវទឹកមិនត្រឹមតែអស់តម្លៃតិចទេ ប៉ុន្តែ អាចដឹកបានច្រើនទៀតផង ដូច្នេះហើយទើបគ្រប់ប្រទេសទាំងអស់តែងតែមានកំពង់ផែ របស់ខ្លួនដើម្បីសម្រួលដល់ការដឹកជញ្ជូនរបស់ខ្លួន ៕
Account
Security
Favourite Content