ព្រែកជីកហ្វូណនតេជោ ត្រូវបានគណៈរដ្ឋមន្ត្រីសម្រេចទទួលយកគម្រោងវិនិយោគកាលពីថ្ងៃទី១៩ ខែឧសភា​ ឆ្នាំ២០២៣កន្លងទៅថ្មីៗនេះ តាមរយៈកិច្ចប្រជុំពេញអង្គ។ នេះជាគម្រោងវិនិយោគផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ ដែលនឹងសម្រួលដល់ការដឹក​ជញ្ជូន​តាម​​ផ្លូវទឹក​ពីភ្នំពេញ តាមទន្លេបាសាក់ ឆ្ពោះទៅកាន់សមុទ្រនាខេត្តកែប​ ខណៈដែលសម្ដេចនាយករដ្ឋមន្ត្រីបានសម្រេចបង្កើតគណៈកម្មការ​អន្តរក្រសួងមួយកាលពីថ្ងៃទី៧ ខែមិថុនាកន្លងទៅ ដើម្បីទទួលបន្ទុកលើការងារនេះក្រោមការប៉ានស្មានចំណាយថវិកាប្រមាណ ១,៧ពាន់ លាន​ដុល្លារអាមេរិក។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឱ្យដឹងថា ព្រែកជីកហ្វូណនតេជោនេះមាន​ប្រវត្តិសាស្ត្រ​តាំង​ពីអាណាចក្រហ្វូណន ខណៈដែលគម្រោងមួយនេះនឹងតភ្ជាប់សម័យអតីតកាល មកសម័យបច្ចុប្បន្ន ដើម្បីបម្រើផលប្រយោជន៍ក្នុងវិស័យ​ដឹកជញ្ជូនតាមផ្លូវទឹកពីភ្នំពេញទៅដល់ខេត្តកែបតែម្ដង និង​ចេញពីកែបទៅកំពត ឬទៅផែព្រះសីហនុតែម្ដង។

ឯកឧត្តម ស៊ុន ចាន់ថុល បានមានប្រសាសន៍ថា ៖

“យើងបានសិក្សាលំអិតណាស់ ២៦ខែពី​ប្រព័ន្ធនេះ ដោយប្រើបច្ចេកវិទ្យាទំនើប ប្រើដ្រូន ប្រើ​ផ្កាយរណប ធ្វើយ៉ាងណាកុំឱ្យប៉ះពាល់ដល់បរិស្ថាន។ សម្រាប់ផ្នែកបច្ចេកទេស គឺយើងធ្វើបាន ដោយសារយើងសិក្សាលម្អិតណាស់ ព្រោះ​យើងបារម្ភថាបើយើងធ្វើព្រែក​ជីកនេះ ទឹកប្រៃពីសមុទ្រនឹងហូរចូលទឹកសាប ទឹកសាបពីមេគង្គ​នឹងហូរចូលទៅសមុទ្រ។ ប៉ុន្តែជា​ដំណោះ​ស្រាយ យើងមានទ្វារទឹក៣ ទ្វារទឹកមួយទប់ទឹក​នៅព្រែក​តាកែវ ដែលតភ្ជាប់ជាមួយនឹងទន្លេមេគង្គ មួយទៀតនៅតាកែវដើម្បីគ្រប់គ្រងទឹក និងមួយ​ទៀត​នៅ​កែប​ដើម្បីទប់កុំឱ្យទឹកប្រៃហូរចូលមកទឹកសាប។”

ដោយឡែកពាក់ព័ន្ធទៅនឹងផ្នែកច្បាប់វិញ ឯកឧត្តម ស៊ុន ចាន់ថុល បានបញ្ជាក់ថា មិនមានអ្វីចោទជាបញ្ហានោះដែរ ដោយយោងតាម​កិច្ចព្រម​ព្រៀង​ទន្លេមេគង្គឆ្នាំ១៩៩៥ គឺកម្ពុជា ក៏ដូចជាប្រទេសតាមដងទន្លេមេគង្គមានសិទ្ធិប្រើប្រាស់ដៃទន្លេរបស់ខ្លួន ដោយគ្រាន់តែជូនដំណឹង ឬ​ពិគ្រោះ​យោបល់ជាមួយគណៈកម្មការទន្លេមេគង្គប៉ុណ្ណោះ។

ឯកឧត្តមទេសរដ្ឋមន្ត្រីបានបញ្ជាក់ថា ព្រែកជីកមួយនេះមិនត្រឹមតែជាកន្លែងតភ្ជាប់ប្រវត្តិសាស្ត្រនោះទេ ប៉ុន្តែក៏ជាកន្លែងជួយរំដោះទឹក ដែល​អាច​ជោរជន់នៅខែវស្សា។ រីឯខែប្រាំង កសិករក៏មានទឹកប្រើប្រាស់គ្រប់គ្រាន់តាមរយៈ ការទប់ទឹកកុំឱ្យហូរចេញ។ ព្រែកជីកហ្វូណននេះដែរ នឹងក្លាយជាកាតាលីករជួយជំរុញការធ្វើពាណិជ្ជកម្មក្នុងស្រុកជាមួយនឹងតម្លៃដឹកជញ្ជូនទាប ជាពិសេសនឹងរុញឱ្យខេត្តកែប ក្លាយជាគោលដៅ​ពាណិជ្ជកម្មថ្មីមួយទៀតសម្រាប់កម្ពុជា។

គួរបញ្ជាក់ថា ការសាងសង់​គម្រោងផ្លូវទឹកថ្មីនេះត្រូវបានប៉ាន់ស្មានថានឹងចំណាយទុនវិនិយោគប្រមាណ ១ ៧០០លានដុល្លារអាម៉េរិក និងប្រើ​រយៈពេលសាងសង់ប្រមាណ ៤ឆ្នាំ។ តាមការសិក្សាអស់រយៈពេលសរុប ២៦ខែកន្លងមកបានបង្ហាញថា ផ្លូវទឹកថ្មីនេះមានប្រវែង ១៨០​គីឡូ​ម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែក​តាឯក នៃទន្លេបាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្ត​រហូត​ដល់សមុទ្រ ខេត្តកែប ដោយឆ្លងកាត់ខេត្ត ៤ រួមមាន ៖ ខេត្តកណ្តាល តាកែវ កំពត និងខេត្តកែប ដែលមានប្រជាជន​សរុបប្រមាណ ១,៦លាននាក់ រស់នៅអមសងខាង​ផ្លូវទឹកនេះ។

ផ្លូវទឹកនេះមានទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែក​ខាងក្រោមប្រមាណ ៨០ម៉ែត្រ មានជម្រៅទឹក​ប្រមាណ ៥,៤ម៉ែត្រ ( ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ ) មានគន្លងនាវាចរណ៍ចំនួន ២គន្លង អាចចេញ-ចូល និងជៀសគ្នា​បាន​ដោយសុវត្ថិភាព​៕