សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេល៤ខែកន្លងមកនេះ ការនាំចូលសម្ភារៈសំណង់មួយចំនួនឃើញថាចាប់ផ្ដើមមានកំណើនគួរឱ្យកត់សម្គាល់ ជាក់ស្ដែងការនាំចូលដែក និងដែកថែបចូលមកកម្ពុជាមានកំណើនរហូតដល់ ៣០,៦ភាគរយ ។ នេះបើតាមស្ថិតិពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជាចេញផ្សាយកាលពីពេលថ្មីៗនេះ ។
បើតាមស្ថិតិរបាយការណ៍របស់អគ្គនាយកដ្ឋាននេះបានបង្ហាញឱ្យដឹងថា ក្នុងរយៈពេល៤ខែចាប់ពីខែ មករា ដល់ដំណាច់ខែមេសា ឆ្នាំ២០២៤ កម្ពុជាបាននាំចូលដែក និងដែកថែបមានទឹកប្រាក់រហូតដល់១៦៨លានដុល្លារអាមេរិក មានកំណើន ៣០,៦ភាគរយធៀបនឹងរយៈពេលដូចគ្នាកាលពីឆ្នាំ២០២៣ដែលមានទឹកប្រាក់ត្រឹមតែ១២៩លានដុល្លារអាមេរិកប៉ុណ្ណោះ ។
របាយការណ៍ដដែលនេះ បានឱ្យដឹងថា សម្ភារៈធ្វើពីដែក ឬក៏ដែកថែប ក៏ឃើញថាមានកំណើនគួរឱ្យកត់សម្គាល់ផងដែរ ដោយរយៈពេលដូចគ្នានេះដែរ ការនាំចូលសម្ភារៈធ្វើពីដែក ឬក៏ដែកថែប មានកំណើនដល់ទៅ ៤៥,៤ភាគរយ មានទឹកប្រាក់ប្រមាណ ២២៤,៨១លានដុល្លារអាមេរិក ខណៈរយៈពេលដូចគ្នាកាលពីឆ្នាំមុនការនាំចូលមានទឹកប្រាក់ត្រឹមប្រមាណ១៥៤លានដុល្លារអាមេរិក ។
ការនាំចូលនូវសម្ភារៈទាំងនេះ ក៏បានបង្ហាញពីសកម្មភាពនៃវិស័យសំណង់នៅក្នុងប្រទេសកម្ពុជាចាប់ផ្ដើមមានសកម្មភាពឡើងវិញនៅក្នុងឆ្នាំ២០២៤នេះ ដោយរំពឹងថានឹងទទួលបានការវិនិយោគឡើងវិញជាបន្តបន្ទាប់ក្រោយពីសកម្មភាពនៃវិស័យនេះបានថមថយអស់រយៈពេលប៉ុន្មានឆ្នាំកន្លងមក ។
បើតាមអ្នកនាង គឹម គិនកេសា នាយិកាគ្រប់គ្រងប្រចាំប្រទេសកម្ពុជានៃក្រុមហ៊ុន CBRE បានឱ្យដឹងថា ក្នុងឆ្នាំ២០២៤នេះ សកម្មភាពនៃការសាងសង់បានចាប់ផ្ដើមឡើងវិញជាពិសេសសម្រាប់សំណង់លើគម្រោងដែលបានជាប់គាំងកាលពីអំឡុងវិបត្តិកូវីដ១៩ និងវិបត្តិសេដ្ឋកិច្ចសកល ។ សម្រាប់គម្រោងសាងសង់ថ្មីៗ ក្រៅពីគម្រោងសាធារណ មិនទាន់ឃើញមានគម្រោងធំៗឯកជនច្រើនដូចមុននោះទេ ។
អ្នកនាងបន្តថា កម្ពុជាត្រូវការពេលវេលាដើម្បីដោះស្រាយគម្រោងអភិវឌ្ឍន៍ដែលជួបប្រទះនឹងបញ្ហាប្រឈមឱ្យរួចរាល់ ក៏ដូចជាស្វែងរកវិនិយោគិនក៏ដូចជាអតិថិជនមកទិញនូវគម្រោងដែលបានសាងសង់លើសតម្រូវការកាលពីមុនវិបត្តិកូវីដ១៩ ដូចជាគម្រោងខុនដូ អាផាត់មិន ផ្សារទំនើបជាដើម ។
ជាការកត់សម្គាល់ ក្នុងពេលគម្រោងសំណង់ធំៗ មិនមានលេចជារូបរាងច្រើនដូចមុន ប៉ុន្តែសកម្មភាពសាងសង់ដាច់ដោយដុំ ក៏ដូចជារោងចក្រដែលត្រូវប្រើប្រាស់ដែកមានកំណើនខ្ពស់ ជាពិសេសនៅតំបន់ជាយក្រុង និងតំបន់ផ្លូវក្រវាត់ក្រុង ដូច្នេះហើយទើបឃើញតួលេខនៃការនាំចូលដែក និងដែកថែបមកកាន់ប្រទេសកម្ពុជាមានកំណើនខ្ពស់ ៕
Account
Security
Favourite Content