សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គោលនយោបាយក្នុងការបង្កើតតំបន់សេដ្ឋកិច្ចពិសេសរបស់រាជរដ្ឋាភិបាលនៅតាមបណ្ដាខេត្តសក្ដានុពលបានទាក់ទាញវិនិយោគិនបណ្ដាក់ទុនជាហូរហែរដោយក្នុងនោះសម្រាប់តែខេត្តស្វាយរៀងមានការទាក់ទាញខ្លាំងលើរោងចក្រឧស្សាហកម្ម។ ជាក់ស្ដែង កាលពី១៦ឆ្នាំមុន ខេត្តមួយនេះមានរោងចកក្រត្រឹមតែ២ប៉ុណ្ណោះ និងមានកម្មករប្រមាណ២០០នាក់ ប៉ុន្តែដល់បច្ចុប្បន្នក្នុងខេត្តស្វាយរៀងទាំងមូលមានរោងចក្រជិត២០០រោងចក្រ និងមានកម្មករកំពុងបំពេញការងារប្រមាណជិត១០ម៉ឺននាក់។
ឯកឧត្តម ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា ថ្លែងក្នុងវេទិកាធុរកិច្ចកាលពីចុងសប្ដាហ៍កន្លងទៅនេះថា រាជរដ្ឋាភិបាលបានពង្រាយការវិនិយោគនៅតាមបណ្ដាខេត្តនានា ក្រៅពីរាជធានីភ្នំពេញ ដើម្បីឱ្យបងប្អូនកម្មករ កម្មការិនី តាមបណ្ដាខេត្តអាចធ្វើការនៅជិតផ្ទះ ដែលអាចចំណេញបាននូវថ្លៃស្នាក់នៅ និងការធ្វើដំណើរ។ ចាប់តាំងពីរាជរដ្ឋាភិបាលបានបង្កើតតំបន់សេដ្ឋកិច្ចពិសេសឃើញថា បណ្ដាវិនិយោគិនទាំងក្នុង និងក្រៅប្រទេសបានបណ្ដាក់ទុនវិនិយោគនៅក្នុងតំបន់សេដ្ឋកិច្ចទាំងនោះ ដែលធ្វើឱ្យកំណើនរោងចក្រនៅក្នុងតំបន់សេដ្ឋកិច្ចពិសេសមានការកើនឡើងជាបន្តបន្ទាប់។
ឯកឧត្តមបន្តថា កន្លងមកសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកកម្ពុជាបានជំរុញឱ្យយករោងចក្រថ្មីៗទៅដាក់នៅតាមបណ្ដាខេត្ត ដើម្បីឱ្យបងប្អូនកម្មករ កម្មការិនី អាចធ្វើការនៅជិតផ្ទះ ជួបជុំគ្រួសារ ដោយមិនគួរឱ្យគាត់ឡើងមកធ្វើការតែក្នុងរាជធានីភ្នំពេញនោះទេ ជាក់ស្ដែងតាមមកដល់បច្ចុប្បន្ននេះ រោងចក្រនៅក្នុងរាជធានីភ្នំពេញ មានតែប្រមាណ៣០ភាគរយប៉ុណ្ណោះ ចំណែក៧០ភាគរយផ្សេងទៀត គឺមានទីតាំងនៅខេត្តផ្សេងៗ ក្នុងនោះដែរស្វាយរៀងក៏ជាខេត្តដែលមានការទាក់ទាញខ្លាំងលើការវិនិយោគរោងចក្រនេះដែរ។
ឯកឧត្តមបន្ថែមថា សម្រាប់ខេត្តស្វាយរៀងឃើញថា មួយរយៈចុងក្រោយនេះមានរោងចក្រធុនធំៗមួយចំនួនបានបណ្ដាក់ទុន និងដំណើរការដូចជារោងចក្រផលិតកង់រថយន្តរោងចក្រដំឡើងកង់ រោងចក្រដំឡើងរថយន្ត និងមានរោងចក្រជាច្រើនទៀតកំពុងមានដំណើរការនៅក្នុងតំបន់សេដ្ឋកិច្ចនានាក្នុងខេត្តស្វាយរៀង ។
អ្នកជំនាញនៃវិស័យអចលនទ្រព្យប្រចាំខេត្តស្វាយរៀង លោក ថា ថេង បានមានប្រសាសន៍ថា ការកើនឡើងនៃរោងចក្រឧស្សាហកម្មនៅក្នុងខេត្តស្វាយរៀង បានធ្វើឱ្យតម្រូវការប្រើប្រាស់ដីសម្រាប់សង់រោងចក្រមានការកើនឡើងជាបន្តបន្ទាប់ ហើយក្រៅពីការផ្ដល់ការងារជូនកម្មករ កម្មការិនីហើយ ក៏មានសេវាកម្មផ្សេងទៀតសម្រាប់ផ្គត់ផ្គង់ដល់កម្មករ កម្មការិនី ដូចជា ផ្ទះជួល សម្រាប់កម្មករមកពីខេត្តផ្សេងៗក៏មានការកើនឡើងដែរ៕
Account
Security
Favourite Content