សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជធានីភ្នំពេញ នៅតែជាតំបន់ដែលមានសក្ដានុពលក្នុងការទាក់ទាញគម្រោងវិនិយោគលើអគារខ្ពស់ៗ ក្នុងនាមជាតំបន់ប៉ូលសេដ្ឋកិច្ចទី១របស់កម្ពុជា។ ជាក់ស្ដែង ក្នុងរយៈពេល១ឆ្នាំ ភ្នំពេញទទួលបានការវិនិយោគលើគម្រោងអគារខ្ពស់ៗសរុបចំនួន៨៣គម្រោង ។ នេះបើតាមរបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ ។
នៅក្នុងរបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានបង្ហាញថា គិតចាប់ពីខែតុលា ឆ្នាំ២០២៤ ដល់ខែកញ្ញា ឆ្នាំ២០២៥ ការវិនិយោគលើគម្រោងអគារខ្ពស់ចាប់ពី៥ជាន់ ដល់៩ជាន់ មានចំនួន៥៩គម្រោង អគារកម្ពស់ចាប់ពី១០ជាន់ ដល់ ១៩ជាន់ មានចំនួន១៣គម្រោង អគារខ្ពស់កម្ពស់ចាប់ពី ២០ជាន់ ដល់ ២៩ជាន់ មានចំនួន ០៥គម្រោង អគារកម្ពស់ចាប់ពី៣០ជាន់ ដល់ ៣៩ជាន់ មានចំនួន១គម្រោង និងអគារកម្ពស់ចាប់ពី៤០ជាន់ ឡើងទៅ មានចំនួន០៥គម្រោង ។
ក្រៅពីការវិនិយោគលើអគារខ្ពស់ របាយការណ៍ក៏បានបង្ហាញផងដែរពីគម្រោងបុរីដែលបានវិនិយោគក្នុងរយៈពេល១ឆ្នាំ ពោល គឺរាប់ចាប់ពីខែតុលា ឆ្នាំ២០២៤ ដល់ ខែកញ្ញា ឆ្នាំ ២០២៥ មានចំនួន២៨ គម្រោង ហើយបើគិតពីដើមឆ្នាំ២០០៥ ដល់ខែសីហា ឆ្នាំ២០២៥ មានចំនួនរហូតដល់ ៤៧៥គម្រោង ។
ពាក់ព័ន្ធជាមួយនឹងវិស័យសំណង់ទាំងមូល ចាប់ពីខែតុលា ឆ្នាំ២០២៤ ដល់ខែកញ្ញា ឆ្នាំ ២០២៥ ក្នុងរាជធានីភ្នំពេញ មានការស្នើសុំលិខិតអនុញ្ញាតសាងសង់សរុប៦៥៣គម្រោង ដែលមានផ្ទៃក្រឡាសំណង់សរុប ៤ ៣៨៧ ៤៥២ម៉ែត្រក្រឡា គិតជាទុនវិនិយោគសរុបប្រមាណជាជិត ២ពាន់លានដុល្លារអាម៉េរិក ។
តាមការសង្កេតជាក់ស្ដែង តំបន់មួយចំនួនក្នុងរាជធានីភ្នំពេញ ជាពិសេសនៅតំបន់តាមបណ្ដោយផ្លូវព្រះមុនីវង្ស ឃើញមានសំណង់អគារខ្ពស់ៗបានចាប់ផ្ដើមរីកដុះដាលជាបន្តបន្ទាប់ ក្នុងនោះខណ្ឌបឹងកេងកង ត្រូវបានចាត់ទុកជាតំបន់ដែលមានភាពទាក់ទាញក្នុងការវិនិយោគ និងអភិវឌ្ឍន៍លើវិស័យសំណង់អគារខ្ពស់ៗច្រើនជាងគេ ដោយក្នុងតំបន់នោះសំណង់អគារខ្ពស់ៗ បាន និងកំពុងសាងសង់យ៉ាងមមាញឹក ដើម្បីបំពេញតម្រូវការអ្នកប្រើប្រាស់នៅពេលបច្ចុប្បន្ន និងអនាគត ។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញផងដែរថា គិតត្រឹមឆ្នាំ២០២៥នេះ នៅទូទាំងប្រទេសកម្ពុជាទាំងមូល មានអគារខ្ពស់ដែលមានកម្ពស់ចាប់ពី៥ជាន់ឡើងទៅចំនួន ៣ ២៥៤អគារ ហើយរាជធានីភ្នំពេញ មានចំនួនអគារខ្ពស់ច្រើនជាង ដែលមានចំនួន ១៩៥៤អគារ បន្ទាប់មកគឺខេត្តព្រះសីហនុ មានសំណង់អគារខ្ពស់ ចំនួន ៧៧៣ អគារ និងខេត្តបន្ទាយមានជ័យ មានសំណង់អគារខ្ពស់ ចាប់ពី៥ជាន់ឡើងទៅចំនួន ៤០០អគារ ។
លោក ខន គង្គា អគ្គនាយកនៃក្រុមហ៊ុនអចលនទ្រព្យ ERA Cambodia បានមានប្រសាសន៍ថា បច្ចុប្បន្ននេះ ការវិនិយោគលើអគារខ្ពស់ ដែលមានទីផ្សារខុនដូផងដែរនោះ គឺនៅតែមានជាហូរហែរ ប៉ុន្តែសម្រាប់អ្នកដែលមានទុនគ្រប់គ្រាន់ មានភាពងាយស្រួល និងមិនមានបញ្ហាប្រឈមនោះទេ ។ ប៉ុន្តែ សម្រាប់អ្នកដែលមានគម្រោងវិនិយោគលើអគារខ្ពស់ (ខុនដូ ) ដែលមិនមានទុនគ្រប់គ្រាន់អាចនឹងមានភាពរារែក ដោយសារតែទីផ្សារខុនដូនៅកម្ពុជា នៅតែមិនមានភាពច្បាស់លាស់នៅឡើយ ៕
Account
Security
Favourite Content