សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតចាប់ពីឆ្នាំ២០១៨ ដល់ឆ្នាំចុង២០២៤ ទុនវិនិយោគក្នុងគម្រោងអភិវឌ្ឍន៍អចលនវត្ថុនៅកម្ពុជា មានទំហំទឹកប្រាក់ចំនួន ៧,២ពាន់លានដុល្លារអាម៉េរិក ដែលក្នុងនោះទុនវិនិយោគក្នុងស្រុកមានរហូតដល់ ៨៣ភាគរយ ស្មើនឹងប្រមាណ ៦ពាន់លានដុល្លារអាមេរិក និងទុនវិនិយោគមកពីក្រៅប្រទេសមានចំនួនត្រឹមតែ ១៧ភាគរយប៉ុណ្ណោះ ឬស្មើនឹងប្រមាណ១,២ពាន់លានដុល្លារអាមេរិក ។ នេះបើតាមឯកសារយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០២៥-២០៣០ របស់រាជរដ្ឋាភិបាលកម្ពុជាចេញផ្សាយកាលពីចុងសប្ដាហ៍កន្លងទៅនេះ ។
នៅក្នុងរបាយការណ៍នេះបានបង្ហាញឱ្យដឹងថា ចាប់ពីឆ្នាំ២០១៨ ដល់ចុងឆ្នាំ២០២៤ គម្រោងអភិវឌ្ឍន៍អចលនវត្ថុ ដែលទទួលបានអាជ្ញាបណ្ណមានចំនួន ៣៦៥គម្រោង ក្នុងនោះ គម្រោងអភិវឌ្ឍន៍លំនៅឋានមានលក្ខណៈបុរី និងអគារសហកម្មសិទ្ធិមានចំនួនច្រើនជាងគេ ។ គិតត្រឹមចុងឆ្នាំ២០២៤ គម្រោងអភិវឌ្ឍន៍លំនៅឋានជាលក្ខណៈបុរី មានចំនួន៥៩ភាគរយនៃគម្រោងអភិវឌ្ឍន៍អចលនវត្ថុដែលទទួលបានអាជ្ញាបណ្ណសរុប ។
គួររម្លឹកថា កាលពីមុនឆ្នាំ២០២០ វិស័យអចលនទ្រព្យកម្ពុជាបានហក់ឡើងដល់កំពូល ដោយការវិនិយោគមានទាំងក្នុង និងក្រៅប្រទេស និងស្ទើរតែគ្រប់ផ្នែកនៃវិស័យអចលនទ្រព្យដូចជាដីឡូត៍ ផ្ទះល្វែង អគារខ្ពស់ៗ និងបានរាលដាលដល់បណ្ដាខេត្តមួយចំនួនក្រៅពីរាជធានីភ្នំពេញ ។ លុះដល់ឆ្នាំ២០២០ ដោយសារតែវិបត្តិកូវីដ១៩ចូលមកដល់ ធ្វើឱ្យការវិនិយោគពីខាងក្រៅប្រទេសបានធ្លាក់ចុះមួយកម្រិត និងពឹងលើការវិនិយោគក្នុងប្រទេសវិញ ជាពិសេសការវិនិយោគលើបុរី និងដីឡូត៍ ។
អ្នកជំនាញនៃវិស័យអចលនទ្រព្យកម្ពុជាជាច្រើនបានលើកឡើងថា ទោះបីជាស្ថិតនៅក្នុងដំណាក់កាលនៃវិបត្តិកូវីដ១៩ និងវិបត្តិសេដ្ឋកិច្ចសកល តែការវិនិយោគក្នុងវិស័យអចលនទ្រព្យនៅកម្ពុជានៅតែបន្ត ដោយផ្ដោតការវិនិយោគសម្រាប់អ្នកក្នុងស្រុក ក្នុងនោះមានលំនៅឋានផ្ទាល់ដី បុរី និងដីឡូត៍ ហើយអ្នកវិនិយោគភាគច្រើនជាអ្នកក្នុងស្រុក ។
លោក ឌិត ចណ្ណា អគ្គនាយកក្រុមហ៊ុន អចលនទ្រព្យ ឡាក់គី បានមានប្រសាសន៍ថា ការវិនិយោគលើអចលនទ្រព្យក្នុងប្រទេសកម្ពុជា បច្ចុប្បន្ននេះនៅតែមាន ប៉ុន្តែស្ថិតក្នុងការប្រុងប្រយ័ត្ន ជាពិសេសលើអចលនទ្រព្យដែលមិនសូវមានតម្រូវការ ។ ដោយឡែក ការទិញ – លក់ ឬដោះដូរអចលនទ្រព្យ ក៏នៅតែបន្តមានដូចគ្នា ជាពិសេសប្រភេទអចលនទ្រព្យណាដែលមានតម្លៃក្រោមទីផ្សារ ជាក់ស្ដែងការទិញលក់ដីធ្លី និងផ្ទះសម្បែង បើម្ចាស់ទ្រព្យដាក់លក់ក្រោមតម្លៃទីផ្សារ នឹងមានអ្នកទិញសម្រាប់ទុកចំណេញនៅពេលអនាគត ។
សូមជម្រាបដែរថា តាមរយៈកម្មវិធីពិសេសជំរុញការវិនិយោគខេត្តព្រះសីហនុ និងកម្មវិធីពិសេសជំរុញការវិនិយោគក្នុងភូមិភាគឦសាន ក៏បានទាក់ទាញការវិនិយោគលើវិស័យអចលនទ្រព្យមួយកម្រិតទៀត ជាក់ស្ដែងអគារជាប់គាំងជាច្រើនគម្រោងនៅខេត្តព្រះសីហនុ បានចាប់ផ្ដើមដំណើរការឡើងវិញ ក្រោយកម្មវិធីពិសេសជំរុញការវិនិយោគនេះបានដាក់ឱ្យដំណើរការកាលពីដើមឆ្នាំ២០២៤កន្លងមក ៕
Account
Security
Favourite Content