សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅគេសង្កេតឃើញថា តម្លៃដីធ្លីនៅតំបន់ណាមួយតែងមានការចាប់អារម្មណ៍ និងតម្លៃហក់ឡើងបន្ទាប់ពីមានការអភិវឌ្ឍហេដ្ឋារចនាសម្ព័ន្ធថ្មីៗ ជាក់ស្ដែងដូចដែលបានឃើញស្រាប់នៅជុំវិញរាជធានីភ្នំពេញនេះ នៅពេលមានគម្រោងអភិវឌ្ឍន៍ ហេដ្ឋារចនាសម្ព័ន្ធនៅកន្លែងណានោះ ដីធ្លីនៅតំបន់នោះ តែងមានកំណើនឡើងជាមួយការចាប់អារម្មណ៍ពីសំណាក់អ្នកវិនិយោគ និងអ្នកអភិវឌ្ឍន៍ ។
បើយើងក្រលេកទៅមើលគម្រោងអភិវឌ្ឍន៍ផ្លូវក្រវ៉ាត់ក្រុងទី៣ បានធ្វើឱ្យតម្លៃដីធ្លីហក់ឡើង និងមានការទិញលក់ច្រើនជាងមុនពេលគម្រោងប្រកាស ហើយនៅពេលគម្រោងនេះចាប់ផ្ដើមសាងសង់ក៏ឃើញថាតម្លៃដីធ្លីនៅតាមបណ្ដោយផ្លូវនោះក៏ហក់ឡើងមួយកម្រិតទៀត ក្នុងនោះដែរក៏ឃើញថាសកម្មភាពនៃការអភិវឌ្ឍនានានៅតាមបបណ្ដាយផ្លូវក្រវ៉ាតក្រុងទី៣ក៏ចាប់ផ្ដើមមានច្រើនផងដែរ ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងនៅក្នុងពិធីបើកសម្ពោធសកលវិទ្យាល័យភូមិន្ទវិចិត្រសិល្បៈថា ដីធ្លីនៅជុំវិញសកលវិទ្យាល័យភូមិន្ទវិចិត្រសិល្បៈក៏ដូចជានៅក្នុងទីក្រុងរបណជ្រោយចង្វារមានតម្លៃ ដោយសារតែការអភិវឌ្ឍហេដ្ឋារចនាសម្ព័ន្ធ ជាក់ស្ដែងក្នុងតំបន់ទីក្រុងរណបជ្រោយចង្វារមានផ្លូវល្អៗតភ្ជាប់ពីភ្នំពេញ មានស្ពានថ្មីៗឆ្លងទន្លេសាបតភ្ជាប់តំបន់ត្រើយខាងលិច និងត្រើយខាងកើតជាដើម ។
សម្ដេចតេជោមានប្រសាសន៍ថា តាមពិតទៅសំណង់អគារមួយត្រូវចំណាយលុយច្រើនទៅលើថ្លៃដី ខណៈដែលតម្លៃនៃការសាងសង់អគារអស់តិចជាងតម្លៃដី ។
លោកឧកញ៉ា ឃាង ពុទ្ធី ប្រធានក្រុមប្រឹក្សាសមាគមអ្នកជំនាញអចលនទ្រព្យកម្ពុជា (CREA) បានលើកឡើងផងដែរថា ទោះបីជាស្ថិតនៅក្នុងស្ថានភាពនៃវិបត្តិបែបណាក្ដី សម្រាប់តម្លៃដីធ្លីនៅតែអាចមានហាងឆេង និងឡើងថ្លៃបន្ថែម ជាពិសេសនៅតំបន់ណាដែលមានការអភិវឌ្ឍហេដ្ឋារចនាសម្ព័ន្ធ ដូចជាតំបន់នៅតាមបណ្ដោយផ្លូវជាតិលេខ៧ដែលទើបបើកការដ្ឋានស្ថាបនាលើកម្រិតគុណភាពផ្លូវ និងគម្រោងហេដ្ឋារចនាសម្ព័ន្ធថ្មីៗ ហើយសម្រាប់តំបន់ដែលមិនមានការអភិវឌ្ឍហេដ្ឋារចនាសម្ព័ន្ធ ក៏ឃើញថាមិនទាន់មានការឡើងថ្លៃនោះដែរ ។
គួរកត់សម្គាល់ថា នៅក្នុងរយៈពេលប៉ុន្មានចុងក្រោយនេះ ទោះបីជាស្ថិតនៅក្នុងវិបត្តិកូវីដ១៩ ដែលរដ្ឋាភិបាលត្រូវចំណាយខ្ពស់ទៅលើការទប់ស្កាត់កូវីដ១៩ និងទប់ស្កាត់ការធ្លាក់ចុះសេដ្ឋកិច្ចផងដែរនោះ ក៏រដ្ឋាភិបាលនៅតែសន្សំថវិកា ដើម្បីអភិវឌ្ឍន៍ហេដ្ឋារចនាសម្ព័ន្ធសំខាន់ៗនៅតាមបណ្ដាខេត្ត និងផ្លូវជាតិសំខាន់ៗ ។ ការអភិវឌ្ឍហេដ្ឋារចនាសម្ព័ន្ធទាំងនេះ ក្រៅពីការសម្រួលដល់ការធ្វើដំណើររបស់ពលរដ្ឋ ក៏ដូចជាភ្ញៀវទេសចរ ក្នុងនោះអ្នកវិនិយោគក៏បានធ្វើឱ្យដីធ្លីនៅតាមបណ្ដោយផ្លូវនេះមានសកម្មភាពអភិវឌ្ឍ ដែលជួយជំរុញឱ្យតម្លៃដីធ្លីកើនឡើងបន្ថែមទៀត៕
Account
Security
Favourite Content