បរទេស៖ យោងទៅតាមប្រភពព័ត៌មានពី NBC News បានរាយការណ៍ថា នាយករដ្ឋមន្ត្រីរុស្ស៊ីបានចុះហត្ថលេខាលើកិច្ចព្រមព្រៀងជាមួយនឹងចិន ដើម្បីពង្រឹងទំនាក់ទំនងទ្វេភាគីឱ្យកាន់តែស៊ីជម្រៅដែលមិនធ្លាប់មានពីមុនមក ទោះបីជាមានការមិនពេញចិត្តពីលោកខាងលិចក៏ដោយ។

កាលពីថ្ងៃពុធកន្លងទៅនេះ នាយករដ្ឋមន្ត្រីរុស្ស៊ី លោក Mikhail Mishustin ធ្វើដំណើរបំពេញទស្សនកិច្ចនៅទីក្រុងប៉េកាំង និងជួបពិភាក្សាជាមួយនឹងនាយករដ្ឋមន្ត្រីថ្មីចិន Li Qiang រួមទាំងប្រធានាធិបតីចិនលោក Xi Jinping ផងដែរ។​ ស្របពេលដែលកំពុងមានសង្គ្រាមជាមួយនឹងអ៊ុយក្រែន រុស្ស៊ីកាន់តែមានអារម្មណ៍ថាខ្លួនមានសម្ពាធពីទណ្ឌកម្មរបស់លោកខាងលិច ហើយសម្ពាធទណ្ឌកម្មមិនបានបង្ហាញពីសញ្ញានៃការធូរស្រាលនោះទេ ដោយក្រុមប្រទេស G7 បានប្រកាសចេញនូវបញ្ហាជាច្រើន។ ដូច្នោះហើយ ទីក្រុងមូស្គូចាំបាច់ត្រូវពឹងផ្អែកលើការគាំទ្រពីទីក្រុងប៉េកាំងសម្រាប់ការគាំទ្រលើប្រទេសរុស្ស៊ីតាមរយៈការផ្តល់ផ្គត់ផ្គង់តម្រូវការប្រេង និងឧស្ម័នដល់ចិន។

ក្នុងកិច្ចប្រជុំរវាងប្រទេសទាំងពីរ លោក Mishustin បាននិយាយប្រាប់នាយករដ្ឋមន្រ្តីចិនថា ទំនាក់ទំនងរវាងរុស្ស៊ី និងចិនក្នុងពេលនេះ គឺស្ថិតក្នុងកម្រិតស៊ីជម្រៅមួយដែលមិនធ្លាប់មានពីមុនមក ដោយកំណត់លក្ខណៈលើការគោរពផលប្រយោជន៍គ្នាទៅវិញទៅមក ដើម្បីរួមគ្នាឆ្លើយតបទៅនឹងបញ្ហាប្រឈម ការកើនឡើងនៃភាពចលាចលនៅលើឆាកអន្តរជាតិ និងសម្ពាធនៃទណ្ឌកម្មពីលោកខាងលិច។ លើសពីនេះ​ ប្រទេសចិនមានឆន្ទៈក្នុងការធ្វើការជាមួយនឹងរុស្ស៊ី ដើម្បីអនុវត្តកិច្ចសហប្រតិបត្តិការរួមគ្នារវាងប្រទេសទាំងពីរ រួមទាំងការលើកកម្ពស់កិច្ចសហប្រតិបត្តិការក្នុងវិស័យផ្សេងៗឆ្ពោះទៅកាន់កម្រិតថ្មីមួយផងដែរ។

គួរឲ្យបញ្ជាក់ផងដែរ ការចុះហត្ថលេខាលើអនុស្សរណៈការយោគយល់រួមមានកិច្ចព្រមព្រៀងដើម្បីពង្រឹងកិច្ចសហប្រតិបត្តិការវិនិយោគលើសេវាកម្មពាណិជ្ជកម្ម កិច្ចព្រមព្រៀងស្តីពីការនាំចេញផលិតផលកសិកម្មទៅកាន់ប្រទេសចិន និងកិច្ចព្រមព្រៀងស្តីពីកិច្ចសហប្រតិបត្តិការកីឡា។ មិនត្រឹមតែប៉ុណ្ណោះ ទីភ្នាក់ងារព័ត៌មាន Interfax បានរាយការណ៍ថា ការនាំចេញថាមពលរបស់រុស្ស៊ីទៅកាន់ចិនត្រូវបានគេព្យាករណ៍ថានឹងកើនឡើង ៤០ ភាគរយនៅឆ្នាំនេះ ហើយប្រទេសទាំងពីរកំពុងពិភាក្សាអំពីការផ្គត់ផ្គង់ឧបករណ៍បច្ចេកវិទ្យាមកកាន់រុស្ស៊ី។

ក្រៅពីនេះ ការប្រើប្រាស់រូបិយប័ណ្ណយ័ន និងរូប៊លរវាងប្រតិបត្តិការប្រទេសទាំងពីរមានការកើនឡើងខ្លាំងជិតបីភាគបួន។ ទីក្រុងមូស្គូបាននិយាយម្តងហើយម្តងទៀតថា ប្រាក់ដុល្លារអាមេរិក និងប្រាក់អឺរ៉ូមិនអាចពឹងផ្អែកបានទៀតទេ ដោយសារការប្រើប្រាស់រូបិយប័ណ្ណទាំងពីរក្នុងប្រតិបត្តិការឆ្លងព្រំដែន ត្រូវបានរងសម្ពាធពីទណ្ឌកម្មរបស់លោកខាងលិច។

លោក Mishustin បាននិយាយដែរថា ៧០ ភាគរយនៃប្រតិបត្តិការឆ្លងព្រំដែនរវាងរុស្ស៊ី និងចិន ត្រូវបានប្រើប្រាស់ជាប្រាក់រូប៊ល និងប្រាក់យ័ន ហើយការធ្វើប្រតិបត្តិការជារូបិយប័ណ្ណជាតិរបស់រុស្ស៊ីបានជំរុញដល់ពាណិជ្ជកម្មទ្វេភាគីយ៉ាងខ្លាំងដែលកំពុងតែឈានទៅដល់គោលដៅ ២០០ ពាន់លានដុល្លារនៅឆ្នាំនេះ។

កាលពីខែមុនកន្លងទៅនេះ ឧបនាយករដ្ឋមន្ត្រីរុស្ស៊ី Alexander Novak បានប្រកាសថា ទីក្រុងម៉ូស្គូនឹងប្តូរទៅជាការប្រើប្រាស់រូបិយប័ណ្ណជាតិក្នុងពាណិជ្ជកម្មថាមពលជាមួយដៃគូបរទេសទាំងអស់របស់ខ្លួន។ ប្រតិបត្តិការភាគច្រើននៅក្នុងវិស័យថាមពលនេះ ភាគច្រើនត្រូវបានធ្វើឡើងជាប្រាក់យ័ន និងប្រាក់រូប៊ល ហើយរុស្ស៊ីគ្រោងនឹងបោះបង់ចោលប្រាក់អឺរ៉ូ និងដុល្លារទាំងស្រុងក្នុងការនាំចេញថាមពល។ លើសពីនេះ ទីក្រុងម៉ូស្គូ និងទីក្រុងប៉េកាំងបានបង្កើនកិច្ចខិតខំប្រឹងប្រែងដើម្បីកាត់បន្ថយការពឹងផ្អែកលើប្រាក់ដុល្លារ និងប្រាក់អឺរ៉ូក្នុងពាណិជ្ជកម្មអន្តរជាតិ។ មិនត្រឹមតែប៉ុណ្ណោះ ប្រធានាធិបតីរុស្ស៊ី Vladimir Putin បានលើកឡើងថា ប្រាក់យ័នចិនមិនត្រឹមគួរតែប្រើប្រាស់នៅក្នុងប្រតិបត្តិការជាមួយចិនប៉ុណ្ណោះទេ ប៉ុន្តែគួរប្រើប្រាស់យ៉ាងទូលំទូលាយនៅក្នុងពាណិជ្ជកម្មបរទេសរបស់រុស្ស៊ីផងដែរ ដូចជា បណ្តាប្រទេសនៅអាហ្វ្រិក និងអាមេរិកឡាទីនជាដើម។ ស្របពេលនេះដែរ អ្នកបង្កើតគោលនយោបាយឥណ្ឌាក៏បានចាត់វិធានការក្នុងរយៈពេលប៉ុន្មានខែថ្មីៗនេះ ដើម្បីចៀសឆ្ងាយពីប្រាក់ដុល្លារទៅជាការប្រើប្រាស់ប្រាក់រូពី និងប្រាក់រូប៊លក្នុងពាណិជ្ជកម្មជាមួយទីក្រុងម៉ូស្គូផងដែរ។

យោងទៅតាមប្រភពដដែលបានលើកឡើងថា ការដាក់ទណ្ឌកម្មរបស់លោកខាងលិចប្រឆាំងនឹងរុស្ស៊ី គឺជាការផ្តល់ឱកាសថ្មីមួយសម្រាប់ចិន ហើយវាមិនគួរឱ្យភ្ញាក់ផ្អើលទេដែលចិននឹងរីករាយក្នុងការចូលរួមយ៉ាងសកម្មខាងផ្នែកសេដ្ឋកិច្ចជាមួយនឹងរុស្ស៊ី។ កាលពីខែមីនាកន្លងទៅនេះ ប្រធានាធិបតីចិនលោក Xi Jinping ធ្វើដំណើរបំពេញទស្សនកិច្ចនៅរុស្ស៊ី ហើយបានជួបពិភាក្សាជាមួយប្រធានាធិបតីរុស្ស៊ីលោក Vladimir Putin បន្ទាប់ពីបានប្តេជ្ញាចិត្តចំពោះភាពជាដៃគូគ្មានដែនកំណត់ មុនពេលមានសង្រ្គាមរុស្ស៊ី-អ៊ុយក្រែនទៅទៀត។ មិនត្រឹមតែប៉ុណ្ណោះ ទីក្រុងប៉េកាំងបានច្រានចោលការបញ្ចុះបញ្ចូលរបស់លោកខាងលិច ដើម្បីភ្ជាប់ភាពជាដៃគូរបស់ខ្លួនជាមួយទីក្រុងមូស្គូទៅកាន់ប្រទេសអ៊ុយក្រែន ដោយលើកឡើងថាទំនាក់ទំនងរបស់ពួកគេមិនបានបំពានលើច្បាប់អន្តរជាតិ ហើយចិនមានសិទ្ធិសហការជាមួយនឹងអ្នកណាដែលខ្លួនពេញចិត្ត និងមិនផ្តោតលើប្រទេសទីបីណាមួយឡើយ៕