សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កែប ៖ កំពង់ផែទេសចរណ៍កោះទន្សាយ ក្នុងខេត្តកែប ដែលរហូតមកដល់ពេលនេះសម្រេចបានលទ្ធផលសាងសង់ប្រមាណ៩០ភាគរយហើយ ដោយនឹងគ្រោងបញ្ចប់នៅពេលដ៏ខ្លីខាងមុខនេះ ។ សមិទ្ធផលថ្មីមួយនេះ នឹងេះជួយជំរុញសក្ដានុពលដល់តំបន់កាន់តែប្រសើរឡើងថែមទៀត ខណៈដែលរាជរដ្ឋាភិបាលគ្រោងនឹងបើកការដ្ឋានសាងសង់ព្រែកជីកហ្វូណនតេជោនៅចុងឆ្នាំ២០២៤នេះផងដែរ ។
បើតាមឯកឧត្តម សោម ពិសិដ្ឋ អភិបាលខេត្តកែប បានមានប្រសាសន៍ថា សមិទ្ធផលជាប្រវត្តិសាស្រ្តរបស់ខេត្តកែបមួយនេះបានជួយលើកកម្ពស់វិស័យទេសចរណ៍របស់ខេត្តកែប ជាពិសេសសម្រាប់ប៉ូលអភិវឌ្ឍន៍ទេសចរណ៍តំបន់ប្រជុំកោះទាំងនេះ ស្ថិតក្នុងផែនការមេអភិវឌ្ឍន៍ទេសចរណ៍ខេត្តកែបឆ្នាំ២០២៣- ២០៣៥ ក្នុងការប្រែក្លាយខេត្តកែបជាគោលដៅទេសចរណ៍ធម្មជាតិ និងសមុទ្រ ជាតំបន់សម្រាកកម្សាន្តបែបប្រណិតកម្រិតខ្ពស់។
ឯឧត្តមបន្តថា កំពង់ផែបែបស្តង់ដារមួយនេះ នឹងជួយរុញសក្តានុពលតាមបណ្តាកោះទាំង១២ និងថ្មប៉ប្រះទឹក១ ឱ្យកាន់តែមមាញឹកក្នុងការទទួលស្វាគមន៍ភ្ញៀវទេសចរ ហើយបន្ថែមពីនោះកំពង់ផែកោះទន្សាយនេះបានជួយឱ្យប្រជាពលរដ្ឋដែលរស់នៅលើកោះកាន់តែងាយស្រួលក្នុងការរស់នៅ និងបានជួយលើកកម្ពស់សេដ្ឋកិច្ចគ្រួសារ តាមរយៈវិស័យទេសចរណ៍។
អ្នកប្រកបរបរក្នុងវិស័យអចលនទ្រព្យក្នុងខេត្តកែបបានបង្ហាញពីភាពរីករាយចំពោះសមិទ្ធផលក្នុងទឹកដីខេត្តកែបនេះ ដែលនឹងអាចធ្វើឱ្យវិនិយោគិនក៏ដូចជាប្រជាពលរដ្ឋពីតំបន់ផ្សេងចាប់អារម្មណ៍ក្នុងការស្វែងរកដីធ្លីសម្រាប់អភិវឌ្ឍន៍ វិនិយោគ និងទិញសម្រាប់ទុកសង់ផ្ទះលំហែនាពេលអនាគត ។
លោក ជិន ណារិន ភ្នាក់ងារអចលនទ្រព្យប្រចាំខេត្តកែប និងកំពត បានប្រាប់ AMS ឱ្យដឹងថា ទោះបីជាស្ថានភាពអចលនទ្រព្យនៅក្នុងប្រទេសកម្ពុជាជួបបញ្ហាប្រឈមយ៉ាងណាក្ដី តែសម្រាប់ទឹកដីខេត្តកែបនៅតែទទួលបានការចាប់អារម្មណ៍ពីសំណាក់អ្នកវិនិយោគ ជាពិសេសអ្នកវិនិយោគខ្នាតតូចៗ ដូចជាអ្នកទិញដីសម្រាប់សង់រីសត ផ្ទះសំណាក់ និងអ្នកទិញដីសម្រាប់ទុកសង់ផ្ទះលំហែសម្រាប់ខ្លួនឯងជាដើម ។
លោកបន្តថា អ្នកវិនិយោគ និងប្រជាពលរដ្ឋពីតំបន់ផ្សេងៗបានចាប់អារម្មណ៍លើទឹកដីខេត្តកែបតាំងពីរាជរដ្ឋាភិបាលប្រកាសពីការអភិវឌ្ឍគម្រោងព្រែកជីកហ្វូណនតេជោមក ឃើញថាមានអ្នកចាប់អារម្មណ៍ និងស្វែងរកទិញទុកច្រើន ហើយរហូតមកដល់នេះ ដីធ្លីនៅក្នុងខេត្តកែបត្រូវបានគេទិញទុកច្រើនសម្រាប់លក់បន្ត ឬក៏សម្រាប់អភិវឌ្ឍន៍នៅពេលអនាគត។
ដោយឡែក លោក លឹម រដ្ឋា ភ្នាក់ងារទិញលក់អចលនទ្រព្យមួយរូបប្រចាំខេត្តទេសចរណ៍មួយនេះក៏បានលើកឡើងដោយសុទិដ្ឋិនិយមថា វិស័យដីធ្លីនៅក្នុងខេត្តនេះ កាន់តែរើបឡើងវិញ ជាពិសេសនៅពេលដែលមានសមិទ្ធផលសំខាន់ៗក្នុងខេត្តសាងសង់រួចរាល់ ដូចជា គម្រោងផ្លូវជាតិលេខ៣៣ តភ្ជាប់ពីស្រុកកំពង់ត្រាចទៅទីរួមខេត្តកំពតដោយកាត់តាមខេត្តកែប រួមជាមួយនឹងសមិទ្ធផលសំខាន់ៗមួយចំនួនទៀតនៅក្នុងខេត្ត ៕
Account
Security
Favourite Content