សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្នេរខ្សាច់កម្សាន្តសាធារណៈកម្រិតខ្ពស់ឈ្មោះ ឆ្នេរតេជោសន្តិភាពកែប ត្រូវបានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាចេញសេចក្ដីសម្រេចដាក់ឱ្យអនុវត្តបន្តលើការអភិវឌ្ឍរមណីយដ្ឋានមួយនេះ ដូច្នេះនៅពេលឆាប់ៗខាងមុខ ខេត្តកែបនឹងមានឆ្នេរខ្សាច់ថ្មីមួយទៀត ដែលនឹងជួយទាក់ទាក់ភ្ញៀវទេសចរបរទេសនិងក្នុងស្រុក ក៏ដូចជាទាក់ទាញវិនិយោគិនចូលតំបន់នេះបន្ថែមទៀត ។
យោងតាមសេចក្ដីសម្រេចរបស់គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាបានសម្រេចដាក់ឱ្យអនុវត្តបន្តគម្រោងអភិវឌ្ឍរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ «ឆ្នេរតេជោសន្តិភាពកែប» សម្រាប់សាធារណជន និងទេសចរស្ថិតនៅភូមិថ្មី សង្កាត់ព្រៃធំ ក្រុងកែបខេត្តកែប ដែលមានបណ្ដោយប្រវែង ២ ៧០០ម៉ែត្រ ។
បើតាមសេចក្ដីសម្រេចដដែលនេះបានបង្ហាញគម្រោងប្លង់អភិវឌ្ឍន៍ឆ្នេរនេះ ដោយអភិវឌ្ឍន៍ឆ្នេរខ្សាច់កម្សាន្តសាធារណៈម្រិតខ្ពស់ មានទទឹង៣០ម៉ែត្រ និងតំបន់សុវត្ថិភាពហែលទឹកសមុទ្រកម្សាន្ត សាងសង់ជញ្ជាំងទប់ដីការពារឆ្នេរសមុទ្រធ្វើពីបេតុងអារម៉េស្របតាមបណ្ដោយឆ្នេរសមុទ្រ ,ផ្លូវថ្មើជើងចំនួន២គន្លង មានទទឹងប្រវែង៣ម៉ែងត្រ ដោយមានផ្លុវសម្រាប់ជនមានពិការភ្នែកនៅចំកណ្ដាលស្របតាមបណ្ដោយឆ្នេរសមុទ្រ ,មានផ្លូវជិះកង់ចំនួន២គន្លង មានទទឹងប្រវែង៣ម៉ែត្រ ស្របតាមបណ្ដោយឆ្នេរសមុទ្រ ,មានសួនច្បារទទឹងប្រវែងយ៉ាងតិច៥០ម៉ែត្រ ដោយត្រូវរៀបចំចាក់ខ្សាច់បំពេញបន្ថែម ស្របតាមស្ថានភាពដីរដ្ឋជាក់ស្ដែងតាមបណ្ដោយឆ្នេរសមុទ្រ ។
នៅក្នុងគម្រោងនេះដែរ ក៏មានអភិវឌ្ឍន៍វិថី និងអនុវិថីចូលឆ្នេរសមុទ្រចំនួន៥ខ្សែ ដែលមានផ្លូវថ្មើជើង ផ្លូវថ្មើជើងសម្រាប់ជនមានពិការភ្នែក និងផ្លូវជិះកង់ ។ អភិវឌ្ឍន៍រង្វង់មូលគយគន់ទេសភាពចំនួន ២កន្លែង ក្នុងនោះរង្វង់មូលទី១ មានអង្កត់ផ្ចិតប្រវែង៩៩ម៉ែត្រ ស្ថិតនៅចុងវិថីចូលឆ្នេរសមុទ្រទី១ ដែលគ្រោងតម្កល់រូបចម្លាក់លោកយាយជំទាវម៉ៅក្នុងទម្រង់មេទ័ពជាញជ័យ និងរង្វង់មូលទី២មានអង្កត់ផ្ចិត៩៩ម៉ែត្រដូចគ្នា ស្ថិតនៅចុងវិថីចូលឆ្នេរសមុទ្រទី២ ដែលគ្រោងរក្សាទុកជាលម្អសាធារណៈ សម្រាប់ប្រារព្ធពិធីបុណ្យ និងពិព័រណ៍នានា ។
គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រ ក៏មានគ្រោងនឹងអភិវឌ្ឍន៍ទំនប់រលកធ្វើពីបេតុងអារម៉េ និងថ្មសម្រាប់ការពារឆ្នេរខ្សាច់ សម្រាប់កម្សាន្តសាធារណៈ មានបណ្ដោយប្រវែង១៣៨ម៉ែត្រ និងមានអង្កត់ផ្ចិតប្រវែង១៨ម៉ែត្រស្ថិតនៅចុងរង្វង់មូលទី១ ។ នៅក្នុងគម្រោងក៏មានការអភិវឌ្ឍចំណតរថយន្តសាធារណៈ និងបន្ទប់ទឹកសាធារណៈដែលភ្ជាប់ជាមួយនឹងហាងកាហ្វេនៅទីតាំងក្បែររង្វង់មូលគយគន់ទេសភាពទាំងពីរទីតាំងសម្រាប់សាធារណជនមកលម្ហែកម្សាន្តឆ្នេរ ក្នុងនាមជាហេដ្ឋារចនាសម្ព័ន្ធគាំទ្រ ។
គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា នឹងរៀបចំប្លង់លម្អិតសម្រាប់សាងសង់សួនច្បារសាធារណៈ និងដាំដើមឈើលើដីចំណីឆ្នេរសមុទ្រ និងប្លង់លម្អិតសម្រាប់រៀបចំឆ្នេរខ្សាច់កម្សាន្តសាធារណៈកម្រិតខ្ពស់ ព្រមទាំងសេចក្ដីណែនាំសម្រាប់ការអនុវត្តការប្រើប្រាស់ និងការថែរក្សាស្របតាមច្បាប់ និងបទប្បញ្ញត្តិជាធរមាន ។
ភ្ជាប់ទៅនឹងគម្រោងអភិវឌ្ឍន៍តំបន់កម្សាន្តឆ្នេរដ៏អស្ចារ្យមួយនេះ ភ្នាក់ងារអចលនទ្រព្យប្រចាំខេត្តកែប និងកំពតបានបង្ហាញពីសុទិដ្ឋិនិយមខ្ពស់ចំពោះការអភិវឌ្ឍឆ្នេរសមុទ្រខេត្តកែបនេះ ស្របនឹងគម្រោងព្រែកជីកហ្វូណនតេជោក៏ទើបនឹងបើកការដ្ឋានសាងសង់កាលពីដើមខែសីហា ឆ្នាំ២០២៤នេះ ។
លោក លឹម រដ្ឋា ភ្នាក់ងារទិញលក់ដីធ្លីនៅក្នុងខេត្តកែប និងកំពតបានលើកឡើងថា ការអភិវឌ្ឍតំបន់ឆ្នេរកម្សាន្តថ្មីក្នុងទឹកដីខេត្តកែប នឹងធ្វើឱ្យខេត្តកែបកាន់តែមានតំបន់ទេសចរណ៍ថ្មីៗបន្ថែម ហើយភ្ញៀវទេសចរជាតិ និងបរទេសអាចមកលេងកែបបានយូរជាងមុន និងច្រើនជាងមុន ធ្វើឱ្យតម្រូវការសេវាកម្មទេសចរណ៍ក៏កើនជាងមុនដែរ ។
លោកបន្តថា តាមរយៈការអភិវឌ្ឍឆ្នេរខ្សាច់កម្សាន្ត និងគម្រោងព្រែកជីកហ្វូណនតេជោ នឹងជំរុញឱ្យសក្ដានុពលដីធ្លីនៅខេត្តកែប និងខេត្តកំពត ដែលនៅជាប់គ្នានេះកាន់តែប្រសើរ ជាពិសេស ការអភិវឌ្ឍលើរីសតដែលជាតំបន់កម្សាន្តបែបកែច្នៃ និងលំនៅឋានលម្ហែលក្ខណៈគ្រួសារកាន់តែច្រើនបន្ថែមទៀត ៕
Account
Security
Favourite Content