ភ្នំពេញ  ៖ ដោយមើលឃើញថា មួយរយៈ​ចុងក្រោយនេះ​មាន​ការរឹបអូស​ផ្ទះពីសំណាក់​ម្ចាស់​បុរីមួយចំនួន​ពីអ​តិថិ​ជន​​ដែល​មិនមានលទ្ធភាពបង់​ប្រាក់បន្ត សម្ដេច​អគ្គ​មហាសេនា​បតីតេជោ ហ៊ុន សែន នាយករដ្ឋមន្ត្រី​នៃព្រះរាជាណាចក្រកម្ពុជា​បាន​ណែនាំឱ្យ​ម្ចាស់​បុរី​ព្យាយាមរកដំណោះស្រាយ​ជាមួយអតិថិជនជៀស​វាង​ការរឹបអូស​ផ្ទះពីអតិថិជន។

សម្ដេច​តេជោ ហ៊ុន សែន នៅក្នុងពិធីសំណេះសំណាល​ជាមួយកម្មករ​-កម្មការិនីរោងចក្រ​នៅខេត្តកំពង់ឆ្នាំង​នៅព្រឹកថ្ងៃទី០៩ ខែមិថុនា ឆ្នាំ២០២៣ ​បានមានប្រសាសន៍ថា ក្នុងវិស័យ​ធនាគារ និងមីក្រូហិរញ្ញវត្ថុ បានរៀបចំ​ឥណទាន​ឡើង​វិញ​ជូនអតិថិជនរបស់ខ្លួន​រាប់សែន​គណនី ដូច្នេះ​ម្ចាស់បុរី​នានា​គប្បីរៀបចំឥណទានឡើងវិញ​ជូន​អ្នក​ទិញ​​ផ្ទះរបស់ខ្លួន​ផងដែរ។ បើ​អតិថិជន​បង់មួយខែ​៥០០ដុល្លារ​អាមេរិក ក្នុងពេល​ដែល​មាន​ភាព​ពិបា​ក​ដូច​បច្ចុប្បន្ន​នេះ ម្ចាស់បុរីគួររៀបចំឱ្យ​គាត់បង់រយៈពេលវែង​បន្តទៀតដោយបង់ត្រឹម​៣៥០ដុល្លារអាមេរិក​ក្នុង​មួយ​​ខែ​ ដែលអាចជៀស​វាងការរឹបអូស​ពីអតិថិជន ។

សម្ដេច​បន្តថា ៖

“ការរឹបអូស​ផ្ទះអតិថិជន​បានបន្សល់ទុកនូវ​ការ​ឈឺចាប់​ទៅដល់​ម្ចាស់​ផ្ទះដែលទិញ​អស់​រយៈ​ពេ​ល​​​ជាច្រើន​ឆ្នាំ ​និ​ងបានបង់​អស់រាប់ម៉ឺនដុល្លារ​តែ​ត្រូវ​បានម្ចាស់បុរី​រឹបអូស​យកវិញ​ដោយមិនមាន​ការជូនប្រាក់​កាស​​ខ្លះជូនគាត់។​ សម្រាប់ការ​រៀបចំឥណទាន​ឡើងវិញជូនអតិថិជន​ទិញផ្ទះ​ក៏មិនធ្វើឱ្យខាតបង់​ដល់​ម្ចាស់បុរីដែរ​ មែនទែន​ទៅ​ម្ចាស់​បុរី​មានតែចំណេញទៅវិញទេ ដោយការប្រាក់​​នៅតែការ​ប្រាក់ដដែល ហើយ​បានអូសបន្លាយ​ការ​បង់​បន្តដល់​អតិថិជន។”

សម្ដេច​បានស្នើ​ឱ្យ​ក្រុមហ៊ុន​អភិវឌ្ឍន៍​លំនៅឋាន ជាពិសេសអ្នក​ឧកញ៉ា ​លី ហួរ​ ប្រធានសមាគម​អ្នកអភិវឌ្ឍន៍​លំនៅឋាន​កម្ពុជា​ ធ្វើកិច្ចការ​ងារ​ជាមួ​យសមាជិក​របស់ខ្លួន​ទៅលើ​បុរីនានា​។

សម្ដេច​មានប្រសាសន៍ ៖

“ខ្ញុំឮមកថា អតិថិជនមិន​បានបង់ខែនេះ ស្រាប់តែរឹបអូស​យក​វិញ ដោយខ្ញុំមិនទាន់ដឹងថាពិត ឬមិនពិតទេ ប៉ុន្តែ​បើសិនជា​ការពិតមែននោះ គឺគ្រោះថ្នាក់ណាស់​សម្រាប់សេដ្ឋកិច្ច​កម្ពុជា ក្នុង​នោះអ្នកទិញផ្ទះតែម្ដង ដោយ​គាត់បង់អស់រាប់ម៉ឺនដុល្លារហើយ បែរជាត្រូវ​រឹបអូស​យកទទេ ដោយមិនមានប្រាក់​សំណងខ្លះមកវិញ។”

សម្ដេច​តេជោក៏បានប្រាប់ទៅ​ម្ចាស់បុរី​នានាពិចារណាក្នុងការផ្ដល់ផ្ទះជូនទៅ​ម្ចាស់វិញ ក្នុងក​រ​ណីរឹ​ប​អូ​ស​រ​រួច​ហើយ ឬក៏​អាចផ្ដល់​ជាប្រាក់​កាស​ខ្លះដល់ម្ចាស់ផ្ទះដែល​ម្ចាស់បុរីរឹបអូសនោះ ហើយក៏សូមឱ្យបញ្ឈប់​ការ​រឹប​អូស​​ចំពោះ​អ្នកដែលគ្រោង​នឹង​រឹបអូស​ដោយសារតែម្ចាស់ផ្ទះមិនមានលទ្ធភាពបង់​ក្នុងពេលនេះ ដោយសា​រ​តែ​កត្តាសេដ្ឋកិច្ច ​​និងហិរញ្ញវត្ថុ។

យ៉ាងណាក៏ដោយ នេះក៏ជា​មេរៀន​មួយ​សម្រាប់អ្នកដែលទិញផ្ទះបង់រំលស់ឱ្យ​ពិចារណា​ដិតដល់​មុននឹងសម្រេច​ទិញផ្ទះដោយ​បង់រំលស់ ដូចជាការ​សិក្សាច្បាស់លាស់​ដោយខ្លួន​ឯងលើប្រាក់ចំណូល​ និងចំណាយ​ប្រចាំខែ​ ដោយក្នុងនោះ​ដែរ ​អ្នកជំនាញ​ហិរញ្ញវត្ថុក៏បានណែនាំកន្លងមកថា បើចង់ទិញផ្ទះដោយបង់រំលស់​ត្រូវបង់​ត្រឹម​ ៣០​ភាគរយ​នៃ​ប្រាក់ចំណូល​របស់ខ្លួន​ប៉ុណ្ណោះ មានន័យថា ​បើ​រកបាន​ចំណូល១០០០ដុល្លារ​សូមរកទិញផ្ទះរំលស់​ដែល​បង់ត្រឹម​៣០០ដុល្លារអាមេរិក ​ឬក្រោមនេះ​ ប៉ុន្តែធាតុពិតជាក់ស្ដែង​ អ្នកទិញផ្ទះបង់រំលស់​ខ្លះ​ហ៊ានទិញផ្ទះ​ដោយរំលស់​ស្មើនឹង​៥០​ភាគរយ​នៃចំណូល និងមានខ្លះទៀត​៧០ភាគរយ​នៃចំណូលដែលជា​ហានិភ័យ​ខ្ពស់​ចំពោះ​បញ្ហា​វិបត្តិ​ហិរញ្ញវត្ថុគ្រួសារ​ ៕