សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្មីៗនេះ មានការផ្សព្វផ្សាយតាមបណ្ដាញសង្គមដោយគ្មានប្រភពច្បាស់លាស់ថា រាជរដ្ឋាភិបាលនឹងបើកការដ្ឋានសាងសង់ព្រែកជីកហ្វូណនតេជោនៅក្នុងអំឡុងខែមិថុនា ឆ្នាំ២០២៤ខាងមុខនេះ ដោយអ្នកលេងបណ្ដាញសង្គមបានយករូបភាពនៃការជីកប្រឡាយ ឬស្ដារប្រឡាយមកដាក់បញ្ចូលដែលធ្វើឱ្យមានការយល់ច្រឡំ។ យ៉ាងណាក្ដី បើតាមអ្នកនាំពាក្យនាំក្រសួងសាធារណការ និងដឹកជញ្ជូន បានបញ្ជាក់ថា រាជរដ្ឋាភិបាលនៅមិនទាន់បានកំណត់កាលបរិច្ឆេទនៃការបើកការដ្ឋានសាងសង់ព្រែកជីកជាប្រវត្តិសាស្ត្រនេះនៅឡើយ ។
បើតាមឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានថ្លែងប្រាប់ AMS Economy នៅរសៀលថ្ងៃទី ២៤ ខែឧសភា ឆ្នាំ២០២៤នេះថា រាជរដ្ឋាភិបាលនៅមិនទាន់កំណត់កាលបរិច្ឆេទក្នុងការបើកការដ្ឋានសាងសង់ព្រែកជីកហ្វូណនតេជោនោះទេ ប៉ុន្តែទោះជាយ៉ាងណា ឯកឧត្តមក៏បានបញ្ជាក់ថា គម្រោងព្រែកជីកជាប្រវត្តិសាស្ត្រមួយនេះ នឹងចាប់ផ្ដើមបើកការដ្ឋាននៅពេលឆាប់ៗខាងមុខ ដូចអ្វីដែលថ្នាក់ដឹកនាំកំពូលធ្លាប់បានលើកឡើង និងបញ្ជាក់នាពេលកន្លងមកនេះ ។
គម្រោងព្រែកជីកហ្វូណនតេជោ ទទួលបានការគាំទ្រពីប្រជាពលរដ្ឋគ្រប់ស្រទាប់វណ្ណៈ ដោយបានបញ្ចេញតាមរយៈការផ្លាស់ប្តូរប្រូហ្វាល់ក្នុងគណនីហ្វេសប៊ុករបស់ខ្លួន ហើយរាជរដ្ឋាភិបាលក៏បានបញ្ជាក់ពីការអនុវត្តន៍គម្រោងមួយនេះនាពេលឆាប់ៗនេះ ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានមានប្រសាសន៍លើកឡើងនាពេលកន្លងមកថា រាជរដ្ឋាភិបាលនឹងសាងសង់ព្រែកជីកនេះឱ្យទាល់តែបាន ហើយបើទោះបីជាគ្មានថវិកាវិនិយោគពីក្រៅប្រទេស សម្ដេចបានអំពាវនាវឱ្យវិនិយោគិនក្នុងស្រុកចូលរួមបណ្ដាក់ទុនវិនិយោគលើគម្រោងព្រែកជីកនេះ ពីព្រោះវាជាគម្រោងដែលផ្ដល់អត្ថប្រយោជន៍ខ្លាំងដល់សេដ្ឋកិច្ចប្រទេសកម្ពុជា និងជាគម្រោងដែលធ្វើឱ្យកម្ពុជាលែងពឹងដង្ហើមប្រទេសជិតខាងដកទៀតហើយ ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា ក៏បានបកស្រាយទៅកាន់ពិភពលោកពាក់ព័ន្ធនឹងគម្រោងព្រែកជីកនេះ ដោយឯកឧត្តមបានលើកឡើងថា កម្ពុជាបានប្រើប្រាស់ក្រុមអ្នកជំនាញបច្ចេកទេសជាន់ខ្ពស់កម្ពុជា និងក្រុមអ្នកជំនាញបច្ចេកទេស រួមទាំងទីប្រឹក្សាបច្ចេកទេសអន្តរជាតិចំនួន៤៨នាក់ ដើម្បីធ្វើការសិក្សាគម្រោងនេះយ៉ាងល្អិតល្អន់ និងគ្រប់ជ្រុងជ្រោយ ។
ឯកឧត្តមបន្តថា គម្រោងនេះមានប្រវែង១៨០គីឡូម៉ែត្រ ប៉ុន្តែវាមិនមែនមានន័យថា កម្ពុជានឹងជីកព្រែកថ្មីទាំងស្រុងនោះទេ ពីព្រោះជាព្រែកដែលមានស្រាប់ ហើយត្រូវបានប្រើប្រាស់ប្រមាណ២០០០ឆ្នាំកន្លងទៅហើយ ។ អ្វីដែលកម្ពុជាអនុវត្តនៅក្នុងគម្រោងនេះ គឺគ្រាន់តែពង្រីកទំហំទទឹង និងធ្វើឱ្យជ្រៅជាងមុន អាចអនុញ្ញាតឱ្យនាវាចំណុះ៣ពាន់តោន អាចធ្វើចរាចរណ៍ដោយត្រង់ពីរាជធានីភ្នំពេញទៅសមុទ្រក្នុងខេត្តកែប ហើយគម្រោងនេះមិនមានបច្ច័យប៉ះពាល់ដល់បរិស្ថានប្រទេសកម្ពុជា ឬបរិស្ថានឆ្លងកាត់ព្រំដែនវៀតណាមនោះទេ ៕
Account
Security
Favourite Content