សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្មវិធីពិសេសជំរុញការវិនិយោគក្នុងខេត្តព្រះសីហនុ ដែលរាជរដ្ឋាភិបាលបានដាក់ចេញ និងប្រកាសឱ្យអនុវត្តកាលពីដើមឆ្នាំ២០២៤ នោះ ត្រូវបានបន្តរហូតដល់ដំណាច់ឆ្នាំ២០២៥ ហើយវិនិយោគិនដែលចូលទៅវិនិយោគ ឬធ្វើធុរកិច្ចនៅក្នុងខេត្តព្រះសីហនុ នឹងទទួលបានអត្ថប្រយោជន៍ពិសេសពីការវិនិយោគរបស់ខ្លួន ។
យោងតាមសេចក្ដីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុនៅរសៀលថ្ងៃទី២២ ខែមករា ឆ្នាំ២០២៥ បានឱ្យដឹងថា ក្នុងគោលបំណងដើម្បីជំរុញឱ្យមានសកម្មភាពវិនិយោគ និងធុរកិច្ចកាន់តែច្រើន និងមានសម្ទុះលឿនក្នុងខេត្តព្រះសីហនុបន្ថែមទៀត រាជរដ្ឋាភិបាលបានសម្រេចជាគោលការណ៍យល់ព្រមឱ្យបន្តអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤ រហូតដល់ដំណាច់ឆ្នាំ២០២៥ ។
សេចក្ដីជូនដំណឹងឱ្យដឹងថា តាមរយៈការសម្រេចនេះ ធុរជន និងវិនិយោគិនដែលស្នើសុំ និងអនុវត្តគម្រោង ឬសកម្មភាពក្នុងឆ្នាំ២០២៥ រួមមាន ១. គម្រោងវិនិយោគ ឬធុរកិច្ច ពាក់ព័ន្ធនឹងអគារជាប់គាំង ២. គម្រោងវិនិយោគ ឬធុរកិច្ចដែលមិនជាប់ពាក់ព័ន្ធនឹងអគារជាប់គាំង និង៣. ការពង្រីកគម្រោងវិនិយោគ ឬសកម្មភាពធុរកិច្ច ដែលមានស្រាប់នៅក្នុងខេត្តនឹងទទួលបាននូវអត្ថប្រយោជន៍ពិសេស ជាអាទិ៍ ការសម្រួលនីតិវិធី ការលើកទឹកចិត្តពិសេស និងការអនុគ្រោះនានា ។
ផ្អែកតាមការនេះដែរ ក្រុមការងារជំរុញការវិនិយោគក្នុងខេត្តព្រះសីហនុ ដែលជាយន្តការអន្តរក្រសួង ស្ថាប័ន និងបន្តភារកិច្ចដឹកនាំ សម្របសម្រួល និងអនុវត្តកម្មវិធីនេះ រួមទាំងវិធានការដោះស្រាយ គម្រោងវិនិយោគជាប់គាំង នៅក្នុងខេត្តព្រះសីហនុ ដោយដើរតួនាទីជា ច្រកចេញចូលតែមួយ ។ ក្នុងន័យនេះ ធុរជន វិនិយោគិន ដែលមានបំណងទទួលបាននូវអត្ថប្រយោជន៍ពិសេស អញ្ជើញដាក់ពាក្យសុំ ឬស្នើមកក្រុមការងារជំរុញការវិនិយោគក្នុងខេត្តព្រះសីហនុ ដើម្បីក្រុមការងារពិនិត្យ វាយតម្លៃ និងផ្ដល់ការអនុម័ត នៅការិយាល័យក្រុមការងារដែលមានអាសយដ្ឋាន ផ្លូវជាតិលេខ៤ ភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ឬនៅអគារមជ្ឈមណ្ឌលអភិវឌ្ឍធុរកិច្ច ជាន់ទី២១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ និងតាមរយៈលេខទូរសព្ទដែលមានតេលេក្រាម ០១២ ៩០២ ២០០ / ០៨៩ ៧២៦ ០២៨ និង ០១៦ ៣២១ ០១០ ៕
គួរបញ្ជាក់ថា តាមរយៈកម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ ២០២៤កន្លងមក ត្រឹមរយៈពេល១១ខែ មានគម្រោងចំនួន ២១៣គម្រោង ត្រូវបានសម្រេចជាគោលការណ៍ផ្ដល់ការលើកទឹកចិត្ត ការអនុគ្រោះ ការសម្រួលនីតិវិធី និងការសម្របសម្រួលដោះស្រាយវិវាទ ។ គម្រោងទាំងនេះ មានទុនវិនិយោគប្រមាណ ៦ ០២៦លានដុល្លារអាមេរិក និងអាចបង្កើតការងារ ឬត្រូវការកម្មករ និយោជិតរហូតដល់ជិត៤ម៉ឺនកន្លែង ។
បើតាមរបាយការណ៍របស់ក្រុមការងារជំរុញការវិនិយោគក្នុងខេត្តព្រះសីហនុ ឆ្នាំ ២០២៤ ក៏បានបង្ហាញឱ្យដឹងថា គម្រោងទាំង២១៣ ដែលបានផ្ដល់ការលើកទឹកចិត្តវិនិយោគក្នុងខេត្តព្រះសីហនុ រួមមាន គម្រោងពាក់ព័ន្ធនឹងអគារកំពុងជាប់គាំង មានចំនួន១០៣គម្រោង មានទុនវិនិយោគសរុប ២ ៥១០លានដុល្លារអាមេរិក គម្រោងពុំពាក់ព័ន្ធនឹងអគារជាប់គាំង មានចំនួន ៨៦គម្រោង មានទុនវិនិយោគប្រមាណ ២ ៦៩៩លានដុល្លារអាមេរិក គម្រោងពង្រីកការវិនិយោគមានចំនួន១៧គម្រោង មានទុនវិនិយោគចំនួន ៧៦៨លានដុល្លារអាមេរិក និងគម្រោងវិនិយោគ/ធុរកិច្ចដែលមានស្រាប់មានចំនួន ៧គម្រោង មានទុនវិនិយោគសរុបប្រមាណ៣០លានដុល្លារអាមេរិក ៕
Account
Security
Favourite Content