សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅគេសង្កេតឃើញថា រៀងរាល់ពេលដែលកម្ពុជារៀបចំព្រឹត្តិការណ៍បោះឆ្នោតថ្នាក់ជាតិម្ដងៗ ការវិនិយោគក្នុងវិស័យអចលនទ្រព្យតែងមានការថមថយ ឬនៅទ្រឹងមុនបោះឆ្នោត និងមានសន្ទុះឡើងវិញនៅក្រោយការបោះឆ្នោត។ ប៉ុន្តែសម្រាប់ឆ្នាំ២០២៣នេះ បើទោះបីជាកម្ពុជារៀបចំព្រឹត្តិការណ៍បោះឆ្នោតក្ដី តែវានឹងមិនធ្វើឱ្យរង្គោះរង្គើ ឬមានបម្រែបម្រួលដល់វិស័យអចលនទ្រព្យនោះឡើយ ។
លោកឧកញ៉ា សំ សុខនឿន អគ្គនាយកក្រុមហ៊ុន KW Sam SN បានមានប្រសាសន៍ប្រាប់ AMS តាមទូរសព្ទឱ្យដឹងថា ជាការពិតណាស់នៅរៀងរាល់ពេលបោះឆ្នោតម្ដងៗ គេសង្កេតឃើញថាតែងតែមានការប្រែប្រួលចំពោះស្ថានភាពនៃវិស័យអលចនទ្រព្យ ដូចជាមុនបោះឆ្នោត អ្នកវិនិយោគនៅរង់ចាំមើលពីស្ថិរភាពនយោបាយ ហើយបន្ទាប់ពីបោះឆ្នោតរួចពួកគេក៏ចាប់ផ្ដើមសម្រុកក្នុងការបណ្ដាក់ទុនវិនិយោគលើគម្រោងរបស់ខ្លួនជាបន្តបន្ទាប់ ។
លោកឧកញ៉ាបន្តថា ៖
“សម្រាប់ឆ្នាំ២០២៣នេះ ថ្វីត្បិតតែកម្ពុជារៀបចំការបោះឆ្នោតមែន ប៉ុន្តែស្ថានភាពនៃការវិនិយោគនឹងមិនមានការប្រែប្រួលនោះទេនៅក្រោយការបោះឆ្នោត ពីព្រោះអី អ្នកនយោបាយក្នុងប្រទេសកម្ពុជាសុទ្ធតែជាអ្នកនយោបាយដែលមានភាពចាស់ទុំ និងមានបទពិសោធន៍។ ម្យ៉ាងវិញទៀត អ្នកវិនិយោគនានាគាត់ដឹងច្បាស់រួចទៅហើយថាការបោះឆ្នោតឆ្នាំ២០២៣នេះ គណបក្សដែលដឹកនាំរាជរដ្ឋាភិបាលសព្វថ្ងៃនេះ នឹងឈ្នះឆ្នោតហើយដឹកនាំប្រទេសបន្តទៀត។”
លោកឧកញ៉ាបន្ថែមថា ៖
“ស្ថានភាពវិនិយោគ និងវិស័យអចលនទ្រព្យក្នុងប្រទេសកម្ពុជានាពេលបច្ចុប្បន្ននេះ មិនអាស្រ័យលើនយោបាយក្នុងប្រទេសនោះទេ តែដូចយើងបានដឹងស្រាប់ហើយថា បច្ចុប្បន្នវិបត្តិសេដ្ឋកិច្ចពិភពលោករួមជាមួយនឹងវិបត្តិសង្គ្រាមរវាងរុស្ស៊ី និងអ៊ុយក្រែនបានជះឥទ្ធិពលដល់វិស័យអចលនទ្រព្យ ដូច្នេះហើយ នៅក្រោយការបោះឆ្នោតថ្នាក់ជាតិនេះបើសិនជាស្ថានភាពសេដ្ឋកិច្ចពិភពលោកមិនទាន់ប្រសើរ ក៏វានឹងមិនធ្វើការវិនិយោគនៅកម្ពុជាប្រសើរដែរ ប៉ុន្តែបើសិនជាស្ថានភាពសេដ្ឋកិច្ចពិភពលោកបានប្រសើរវិញនោះ យើងក៏ជឿថា ស្ថានភាពនៃការវិនិយោគនៅក្នុងប្រទេសកម្ពុជានឹងប្រសើរដូចគ្នាដែរ។”
អ្នកនាង គឹម គិនកេសា នាយិការងប្រតិបត្តិនៃក្រុមហ៊ុន CBRE Cambodia បានលើកឡើងផងដែរថា ការវិនិយោគអចលនទ្រព្យនៅក្នុងប្រទេសកម្ពុជានៅតែពឹងផ្អែកសំខាន់លើប្រភពទុនពីខាងក្រៅ ហើយបើសិនជាអ្នកវិនិយោគពីខាងក្រៅនៅតែមិនទាន់ចូលមកកម្ពុជាច្រើនដូចមុនកូវីដ១៩នោះទេ វិស័យអចលនទ្រព្យនៅកម្ពុជានឹងមិនទាន់អាចរីកស្ទុះងើបឡើងដូចនៅមុនវិបត្តិកូវីដ១៩នោះទេ ៕
Account
Security
Favourite Content