កម្ពុជា ត្រូវបានគេស្គាល់តាមរយៈវិស័យកសិកម្ម ដែលក្នុងមួយឆ្នាំៗ ទិន្នផលកសិកម្មរបស់កម្ពុជាជាច្រើនមុខ ត្រូវបាននាំចេញទៅ​ផ្គត់ផ្គង់​តាម​ប្រទេសនានាលើពិភពលោក។ ដោយឡែក បើនិយាយពីវិស័យ​បច្ចេកវិទ្យា កម្ពុជាហាក់នៅឆ្ងាយជាងគេបន្តិចបើធៀបទៅនឹងប្រទេសជិតខាង។

គម្លាតនៃវិស័យបច្ចេកវិទ្យារបស់កម្ពុជាធៀបទៅនឹងប្រទេសក្បែរខាងបែបនេះមានចំណែកធំមកពីកង្វះខាតធនធានមនុស្សផ្នែកនេះ។ ប៉ុន្តែនេះ​ក៏មិនមែនបានន័យថាកម្ពុជាត្រូវបោះបង់ចោលគំនិតក្នុងការប្រកួតប្រជែងផ្នែកបច្ចេកវិទ្យានោះដែរ គ្រាន់តែថា ត្រូវការពេលវេលាបន្ថែម​ទៀត​ក្នុង​ការ​បណ្ដុះបណ្ដាលធនធានមនុស្សប៉ុណ្ណោះ។

ក្រុមហ៊ុន ArrowDot បានកកើតឡើងពីក្រុមអ្នកស្រាវជ្រាវកាលពីឆ្នាំ២០១២ រហូតបានក្លាយជាក្រុមហ៊ុនផ្លូវការនៅឆ្នាំ២០១៨។ ក្រុមហ៊ុននេះ​ផ្គត់ផ្គង់​សេវាកម្មបច្ចេកវិទ្យាដែលបម្រើឱ្យរោងចក្រ សហគ្រាស ឧស្សាហកម្មធំៗនៅក្នុងស្រុក។ ក្រុមហ៊ុននេះផងដែរ កើតចេញពីស្នាដៃកូនខ្មែរ ដែលវិវត្តខ្លួនជាបន្តបន្ទាប់រហូតបង្កើតបានជាផលិតផល និងសេវាកម្មជាច្រើនប្រភេទ។

លោក លឹម សង្វា ជាស្ថាបនិកក្រុមហ៊ុន ArrowDot បានរៀបរាប់ថា ៖

“ក្រុមហ៊ុនយើងបច្ចុប្បន្ន ធ្វើការលើប្រព័ន្ធស្វ័យប្រវត្តិកម្ម ប្រព័ន្ធរូបូត ក៏ដូចជាប្រព័ន្ធ IOT Internet of Thing ។ ដោយឡែក សេវាកម្មពីរប្រភេទដែលក្រុមហ៊ុនផ្ដោតលើគឺសេវាកម្មស្វ័យប្រវត្តិកម្ម និងប្រព័ន្ធ IOT ។

នៅក្នុងសេវាកម្មស្វ័យប្រវត្តិកម្ម ក្រុមហ៊ុនខាងលើបានបង្កើត និងតម្លើងប្រព័ន្ធស្វ័​យប្រវត្តិកម្មសម្រាប់​បម្រើនៅក្នុងរោងចក្រ សហគ្រាស​ឧស្សាហកម្មនានា ក៏ដូចជាប្រព័ន្ធបញ្ជាដើម្បីឱ្យរោងចក្រទាំង​នោះក្លាយជារោងចក្រដែលមានទំនើបកម្ម។”

សម្រាប់ប្រព័ន្ធ IOT ឯណោះវិញ ជាការផ្សារភ្ជាប់រវាងឧបករណ៍អេឡិចត្រូនិកនានាតាមរយៈ​អ៊ីនធឺណេត ដែលក្នុងនោះរួមបញ្ចូលទាំង censor វាស់នូវទិន្នន័យផ្សេងៗពីចម្ងាយ។ មានន័យថា នៅពេលដែលក្រសួង ស្ថាប័ន ឬបុគ្គល ចង់ដឹងពីទិន្នន័យទាក់ទងនឹងការប្រែប្រួលអាកាសធាតុ ទឹកជំនន់ និងហានិភ័យ នានាដែលវាស្ថិតនៅឆ្ងាយពីទីតាំងដែលកំពុងអនុវត្ត។ ពួកគេអាចទទួលបានទិន្នន័យទាំងនោះ ពីចម្ងាយដោយមិន​ចាំបាច់ធ្វើដំណើរទៅដល់ទីតាំងនោះទេ។ ជាក់ស្ដែង បច្ចេកវិទ្យាឆែកគុណភាពស្ពានរបស់ក្រុមហ៊ុនដែលថ្មីៗនេះមានផ្ទុះការចាប់អារម្មណ៍​ច្រើន។ បច្ចេកវិទ្យាថ្មីនេះមានបំពាក់នូវកាមេរ៉ា ក៏ដូចជា Censor ដែលអាចដឹងអំពីស្ថានភាពខ្សែកាប ស្ពាននៅខាងក្នុងបាន ដោយគ្រាន់តែ​បំពាក់​មាស៊ីននេះជាប់ទៅនឹងខ្សែកាបប៉ុណ្ណោះ។

លោក លឹម សង្វា បានឱ្យដឹងទៀតថា ៖

“យើងបង្កើតនូវក្នុងតម្លៃសមរម្យ ហើយគុណភាពខ្ពស់​ដែលយើងអាចប្រកួតប្រជែង​ជាមួយទីផ្សារ​អន្តរជាតិ បន្ថែមពីលើនោះទៀតក៏យើងផ្ដល់នូវការអប់រំជំនាញពាក់ព័ន្ធនឹងប្រព័ន្ធទាំងពីរនេះ ដែលក្នុងនោះយើងផ្ដល់ការអភិវឌ្ឍជំនាញ​ពិសេស​ដល់សិស្ស និស្សិត ក៏ដូចជាបុគ្គលិក និងអ្នកបច្ចេកទេសដែលគាត់ធ្វើការនៅតាមបណ្ដា​រោងចក្រសហគ្រាស​ផ្សេងៗផងដែរ។”

តាមរយៈបទពិសោធន៍ក្នុងវិស័យបច្ចេកវិទ្យាប្រមាណជិត ១០ឆ្នាំមកនេះ លោក លឹម សង្វា បានកំណត់ចក្ខុវិស័យសម្រាប់ ១០ឆ្នាំខាងមុខទៀត ដោយចង់នាំចេញផលិតផលបច្ចេកវិទ្យារបស់ខ្លួនទៅទីផ្សារខាងក្រៅប្រទេស។ សម្រាប់ពេលបច្ចុប្បន្ននេះ ផលិតផល និងសេវាកម្មរបស់​លោក​កំពុង​តែមានតម្រូវការខ្លាំងសម្រាប់ស្ថាប័ន រដ្ឋ និងឯកជន ជាពិសេសម្រាប់បម្រើឱ្យក្រសួងសាធារណៈការ និងដឹកជញ្ជូន៕