សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ជ័យជំនះរបស់ លោក Donald Trump ប្រធានាធិបតីអាមេរិកកាលពីសប្តាហ៍មុនបានធ្វើឲ្យមានការប្រែប្រួលយ៉ាងខ្លាំងទៅលើស្ថានភាពជាច្រើនរបស់ពិភពលោក បូករួមទាំងទីផ្សារហ៊ុន ទីផ្សារទំនិញ ក៏ដូចជានយោបាយអន្តរជាតិផងដែរ។ យ៉ាងណាក្តី អ្វីដែលគួរឲ្យចាប់អារម្មណ៍សម្រាប់អ្នកនិយមទិញលក់ និងតាមដានទីផ្សាររបស់លុយគ្រីបតូវិញ គិតត្រឹមសប្តាហ៍នេះតម្លៃលុយ Bitcoin បានហក់ឡើងយ៉ាងខ្លាំងទៅដល់កំណត់ត្រាមិនធ្លាប់មាន ពោលគឺលើសតម្លៃ៨០ ០០០ដុល្លារក្នុងមួយកាក់។
ជាដំណឹងល្អសម្រាប់អ្នកមានលុយគ្រីបតូកាន់ក្នុងដៃ ពីព្រោះថាវានឹងអាចបន្តកើនឡើងទៀត ខណៈដែលការចូលកាន់តំណែង និងការវិលត្រឡប់ទៅកាន់សេតវិមានវិញក៏កាន់តែជិតត្រូវបានធ្វើឡើងទៅហើយ។ កន្លងមកប្រធានាធិបតីអាមេរិកថ្មី លោក Donald Trump នៅក្នុងយុទ្ធនាការរបស់គាត់ក៏តែងតែបានធ្វើការសន្យាថានឹងធ្វើឲ្យទីផ្សារលុយគ្រីបតូរីកចម្រើនកាន់តែខ្លាំងក្លាបន្ថែមទៀត។
យោងតាមការចេញផ្សាយរបស់ទូរទស្សន៍ BBC បានឱ្យដឹងថា គិតតែក្នុងឆ្នាំនេះប៉ុណ្ណោះ តម្លៃទីផ្សាររបស់លុយគ្រីបតូដែលធំជាងគេបំផុតរបស់ពិភពលោក Bitcoin នេះបានបន្តកើនឡើងក្នុងអត្រាកំណើន៨០ភាគរយទៅហើយ ខណៈដែលលុយគ្រីបតូផ្សេងទៀតក៏កើនឡើងដូចគ្នាដែលមានដូចជា dogecoin ដែលកំពុងត្រូវបានគាំទ្រយ៉ាងខ្លាំងពីសំណាក់មហាសេដ្ឋីលោក Elon Musk ផងដែរ។
គួរឲ្យដឹងដែរថា លោក Trump បាននិយាយថា កិច្ចការងារដំបូងរបស់គាត់សម្រាប់វិស័យលុយឌីជីថលក្នុងនាមជាប្រធានាធិបតី គឺការបណ្តេញប្រធានគណៈកម្មការមូលបត្រ (SEC) លោក Gary Gensler ចេញពីតំណែង ។ លោក Gensler ត្រូវបានតែងតាំងដោយប្រធានាធិបតីអាមេរិកអាណត្តិចាស់គឺលោក Joe Biden ក្នុងឆ្នាំ២០២១ ។
នៅក្នុងយុទ្ធនាការការបោះឆ្នោតរបស់ លោក Trump លោកក៏បាននិយាយថា គាត់នឹងបង្កើតឃ្លាំងស្តុក Bitcoin បែបជាយុទ្ធសាស្ត្រ និងរៀបចំបង្កើតក្រុមការងារនិយតករហិរញ្ញវត្ថុដែលមានមុខងារងាយស្រួលក្នុងការប្រើប្រាស់ទ្រព្យសម្បត្តិឌីជីថលបែបនេះផងដែរ។ ជាក់ស្ដែង នៅក្រោយការប្រកាសលទ្ធផលឆ្នោតកាលពីសប្តាហ៍មុន សន្ទស្សន៍ភាគហ៊ុនសំខាន់ៗ រាប់ទាំងប្រាក់ដុល្លារ និងមូលបត្របំណុលអាមេរិកផងដែរ សុទ្ធតែទទួលបានកំណើនឡើងដូចគ្នានៅក្នុងតែរយៈពេលប៉ុន្មានថ្ងៃចុងប៉ុណ្ណោះ៕
Account
Security
Favourite Content