សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពិភពលោកក្នុងបរិបទនៃការប្រកួតប្រជែងគ្នាខ្លាំងលើវិស័យឌីជីថលទាមទារឲ្យមានទាំងរវិស័យដ្ឋ និងឯកជន ជាពិសេសពលរដ្ឋចាំបាច់មានចំណេះដឹង និងការអនុវត្តកិច្ចការងារបានកាន់តែច្រើនជាមួយនឹងប្រព័ន្ធអេឡិចត្រូនិកដើម្បីធ្វើយ៉ាងណាឲ្យពួកគេមានកម្លាំងខ្លាំងក្នុងទីផ្សារ ទាំងក្នុងកម្រិតតំបន់ និងពិភពលោក។
រដ្ឋាភិបាលឌីជីថល ឬរដ្ឋាភិបាលអេឡិចត្រូនិក (Digital Government/ E-Government) សំដៅដល់ការប្រើប្រាស់ឧបករណ៍គមនាគមន៍បច្ចេកវិទ្យា ដូចជា កុំព្យូទ័រ និងអ៊ិនធឺណិត ដើម្បីផ្តល់សេវាសាធារណៈជូនដល់ប្រជាពលរដ្ឋ និងបុគ្គល (នីតិបុគ្គល និងរូបវន្តបុគ្គល) ដទៃទៀតនៅក្នុងប្រទេសមួយ ឬតំបន់មួយ។
រាជរដ្ឋាភិបាលកម្ពុជាអាណត្តិថ្មីក្នុងនិតិកាលទី៧នេះបានបង្ហាញនូវការយកចិត្តទុកដាក់យ៉ាងខ្លាំងចំពោះការអភិវឌ្ឍវិស័យបច្ចេកវិទ្យា និងឌីជីថលនេះ ដោយក្នុងចំណោមយុទ្ធសាស្ត្របញ្ចកោណទាំង៥សម្រាប់ផែនការអនុវត្តរយៈពេល២៥ឆ្នាំនោះក៏មានការដាក់ចេញនូវបញ្ចកោណធំមួយក្នុងការផ្តោតសំខាន់ទៅលើការអភិវឌ្ឍសេដ្ឋកិច្ច និងសង្គមឌីជីថលផងដែរ។
យុទ្ធសាស្ត្របញ្ចកោណដំណាក់កាលទី១ សម្រាប់រយៈពេល៥ ឆ្នាំដំបូងដើម្បីកំណើនការងារ សមធម៌ ប្រសិទ្ធភាព ចីរភាព និងដើម្បីកសាងមូលដ្ឋានគ្រឹះដ៏រឹងមាំសម្រាប់ការបន្តដំណើរឈានទៅសម្រេចបាននូវចក្ខុវិស័យកម្ពុជាឆ្នាំ២០៥០ ក្នុងនីតិកាលទី ៧ នៃរដ្ឋសភាត្រូវបានដាក់ឲ្យដំណើរការជាផ្លូវការតាំងតែកាលពីខែសីហាកន្លងមក។
យុទ្ធសាស្ត្របញ្ចកោណទាំង៥មានមុំធំៗចំនួន៥រៀងគ្នា ហើយផ្តោតទៅលើការអភិវឌ្ឍ និងការធ្វើឲ្យប្រសើរឡើងតាមវិស័យនានា។ ក្នុងនោះបញ្ចកោណទី១ ការអភិវឌ្ឍមូលដ្ឋានមនុស្ស, បញ្ចកោណទាំង២ការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង , បញ្ចកោណទី៣ ការអភិវឌ្ឍវិស័យឯកជន និងការងារ , បញ្ចកោណទី៤ ការអភិវឌ្ឍប្រកបដោយភាពធនុចីរភាព និងបរិយាបន្ន និងចុងក្រោយគឺបញ្ចកោណទី៥ គឺការអភិវឌ្ឍសេដ្ឋកិច្ច និងសង្គមឌីជីថល។
ការកសាងរដ្ឋាភិបាលឌីជីថល និងពលរដ្ឋឌីជីថល គឺជាកិច្ចការងារអាទិភាពដំបូង និងជាមុំទី១ នៃយុទ្ធសាស្ត្របញ្ចកោណទី៥ ដោយក្នុងនោះរដ្ឋាភិបាលបានដាក់ការតាំងចិត្តថានឹងធ្វើជាគំរូ និងនាំមុខគេក្នុងការអនុវត្តកិច្ចការងារឌីជីថលនេះមុនគេ។
តាមរយៈការធ្វើឌីជីថលភាវូបនីយកម្មកិច្ចការងារសាធារណៈដែលជាកិច្ចការងារចំបងរបស់ខ្លួននោះ រដ្ឋាភិបាលកម្ពុជាជឿជាក់ថា វានឹងផ្តល់ប្រសិទ្ធភាព និងអត្ថប្រយោជន៍កាន់តែខ្លាំងឡើងជូនប្រជាជន ក៏ដូចជាវិស័យឯកជន ហើយក៏ដូចជាការពង្រឹងអភិបាលកិច្ចផ្អែកលើទិន្នន័យផងដែរ។
ពលរដ្ឋកម្ពុជាមួយចំនួនធំបានត្រៀមខ្លួនរួចទៅហើយសម្រាប់កិច្ចខិតខំនេះ ខណៈដែលអាជីវកម្ម និងមុខជំនួញរបស់ពួកគេបានចាប់ផ្តើមងាកទៅលើបច្ចេកវិទ្យាឌីជីថលកាន់តែច្រើនឡើង ជាពិសេសក្នុងរយៈពេលប៉ុន្មានឆ្នាំចុងក្រោយនេះ ហើយជឿជាក់ថា ការកសាងរដ្ឋាភិបាលឌីជីថល និងពលរដ្ឋឌីជីថលនឹងអាចដំណើរការបានកាន់តែឆាប់រហ័សដើម្បីអាចឈានទៅដល់ការប្រកួតប្រជែងនិងទាញយកឳកាសជាច្រើនទៀតទាំងក្នុង និងក្រៅប្រទេស។
គួរឲ្យដឹងដែរថា គិតត្រឹមឆ្នាំ២០២២ ទំហំទីផ្សារឌីជីថលជាសកលត្រូវបានប៉ាន់ប្រមាណថាមានប្រហែល ៣២១ពាន់លានដុល្លារ ហើយគេរំពឹងថា វានឹងមានការកើនឡើងក្នុងអត្រាកំណើនប្រចាំឆ្នាំ (CAGR) ប្រហែល ១៣,១ភាគរយរៀងរាល់ឆ្នាំទៅដល់ឆ្នាំ២០២៨ ដែលទីផ្សារនេះនឹងអាចកើនឡើងទៅដល់ ៦៧១,៨៦ ពាន់លានដុល្លារ៕
Account
Security
Favourite Content