ទោះបីជាមិនបានបរិយាយលំអិតអំពីផែនការដ៏សំខាន់នេះ ប៉ុន្តែថ្មីៗនេះ ចិន បានធ្វើការបង្ហើបអំពីមហិច្ឆិតារបស់ខ្លួនក្នុងក្លាយខ្លួនទៅជាមហាអំណាចនៃការផលិតមនុស្សយន្តរ៉ូបូត ឬ humanoid robots ក្នុងទ្រង់ទ្រាយធំដូចទៅនឹងកម្រិតនៃការផលិតស្មាតហ្វូនដែរនៅត្រឹមឆ្នាំ២០២៥ប៉ុណ្ណោះ។

កាលពីសប្តាហ៍មុន ឯកសារមួយដែលមានឈ្មោះថា The Blueprint Document ត្រូវបានប្រកាសបង្ហាញជាសាធារណៈដោយក្រសួងឧស្សាហកម្ម និងព័ត៌មានវិទ្យារបស់ប្រទេសចិនដោយបានពណ៍នាផែនការដ៏អស្ចារ្យនេះថានឹងអាចក្លាយទៅជាពេលវេលាសម្រាប់ផ្លាស់ប្តូរពិភពលោកទាំងមូល ឬ Reshape the world។

នៅក្នុងអត្ថន័យខាងក្នុងមានភាពលំអិតតិចតួចតែមានមហិច្ឆិតាធំដែលចិនបានអះអាងថាខ្លួនមានសមត្ថភាពគ្រប់គ្រាន់ក្នុងការចាប់ផ្តើមដំណើរការផលិតកម្មដែលអាចផលិតរ៉ូបូតរូបរាងជាមនុស្ស (humanoid robots) ក្នុងកម្រិតទំនើបបំផុត និងក្នុងចំនួនដ៏ច្រើនដូចជាផលិតកម្មផលិតស្មានហ្វូននាពេលបច្ចុប្បន្ននេះដែរ។

នៅក្នុងឯកសារដដែលដែលត្រូវបានកាសែត The Bloomberg យកមកបកប្រែជាភាសាអង់គ្លេសទៀតនោះបានឲ្យដឹងដែរថា រ៉ូបូតរូបរាងជាមនុស្សទាំងនោះនឹងក្លាយទៅជាតំរូវការដ៏សំខាន់ និងការផលិតដ៏សកម្មបំផុតបន្ទាប់ពីផលិតផលបច្ចេកវិទ្យាផ្សេងទៀតដូចជាកំព្យូទ័រ ស្មាតហ្វូន និងរថយន្តដើរដោយថាមពលអគ្គិសនី។

នៅក្នុងពេលជាមួយគ្នានេះ ក្រុមហ៊ុនឯកជនបច្ចេកវិទ្យាធំៗជាច្រើនក៏ធ្លាប់បានបង្ហាញអំពីមហិច្ឆិតា និងការគាំទ្រនេះដែរ ជាក់ស្តែងដូចជាក្រុមហ៊ុន Fourier Intelligence ធ្លាប់បានអះអាងថា ខ្លួននឹងចាប់ផ្តើមផលិតរ៉ូបូតរូបរាងជាមនុស្សយន្តដែលមានឈ្មោះថា GR-1 ក្នុងទ្រង់ទ្រាយយ៉ាងច្រើននៅត្រឹមដំណាច់ឆ្នាំ២០២៣នេះប៉ុណ្ណោះ។

កាសែត The South China Morning Post បានពណ៍នាថា មនុស្សយន្តហោះ GR-1 នឹងអាចចាប់ផ្តើមដឹកជញ្ជូនចេញទៅឱ្យអតិថិជននៅក្នុងឆ្នាំ២០២៤ក្នុងចំនួនដល់ទៅរាប់ពាន់គ្រឿងដែលលក្ខណៈពិសេសរបស់មនុស្សយន្តនេះគឺអាចដើរបានក្នុងល្បឿនប្រមាណជា៥គីឡូម៉ែត្រក្នុងមួយម៉ោង ហើយអាចលើកទំនិញមានទំងន់ជាប់នឹងខ្លួនដល់ទៅ៥០គីឡូក្រាមទៀតផង។

នេះមិនមែនជាក្រុមហ៊ុនអ្នកផលិតមនុស្សយន្តតែមួយគត់ដែលបង្កើនកិច្ចខិតខំប្រឹងប្រែងរបស់ខ្លួនជាមួយនឹងគោលដៅនៃការផលិតទ្រង់ទ្រាយធំនោះទេ។
នៅសហរដ្ឋអាមេរិកវិញដូចជានៅក្រុមហ៊ុន Agility Robotics ជាដើម ក៏កំពុងបើកដំណើរការរោងចក្រផលិតមនុស្សយន្តនៅរដ្ឋ Oregon នៅចុងឆ្នាំនេះ ជាកន្លែងដែលខ្លួនគ្រោងនឹងផលិតមនុស្សយន្តរាប់រយប្រភេទដែលអាចធ្វើត្រាប់តាមចលនារបស់មនុស្សដូចជាការដើរ ការអង្គុយ និងកាន់កញ្ចប់ទំនិញ។

គួរឲ្យដឹងដែរថា Amazon ក៏កំពុងសាកល្បងមនុស្សយន្ត Digit របស់ Agility Robotics នៅមជ្ឈមណ្ឌលស្រាវជ្រាវ និងអភិវឌ្ឍន៍ក្បែរទីក្រុង Seattle ដើម្បីមើលពីរបៀបដែលវាអាចត្រូវបានប្រើដើម្បីធ្វើស្វ័យប្រវត្តិកម្មឃ្លាំងរបស់ខ្លួន ប៉ុន្តែវាស្ថិតក្នុងដំណាក់កាលសាកល្បងនៅឡើយ៕