សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Global Times បានរាយការណ៍ថា ចិន បានបញ្ចេញគំរូរថភ្លើងល្បឿនលឿនបំផុតថ្មីមួយ ដែលមានសមត្ថភាពអាចក្លាយជារថភ្លើងល្បឿនលឿនជាងគេបំផុតនៅលើពិភពលោក។
កាលពីថ្ងៃអាទិត្យកន្លងទៅនេះ ចិន បានបញ្ចេញគំរូរថភ្លើងល្បឿនលឿនបំផុតថ្មីមួយមានឈ្មោះថា CR450 ដែលបានដាក់បង្ហាញនៅទីក្រុងប៉េកាំង។ គំរូរថភ្លើងល្បឿនលឿនបំផុតមួយនេះត្រូវបានដាក់បង្ហាញចំនួន ២ គ្រឿងគឺ CR450AF និង CR450BF។ ក្នុងពេលដំណើរការ គេរំពឹងថា ល្បឿនរបស់រថភ្លើងនេះនឹងឈានដល់ ៤០០ គីឡូម៉ែត្រក្នុងមួយម៉ោង ដែលធ្វើឱ្យវាក្លាយជារថភ្លើងល្បឿនលឿនបំផុតនៅលើពិភពលោក។
យោងតាមក្រុមហ៊ុនផ្លូវដែករបស់រដ្ឋ China Railway បានឲ្យដឹងថា គំរូរថភ្លើង CR450 អាចនឹងកាត់បន្ថយពេលវេលាធ្វើដំណើរបន្ថែមទៀត ដែលធ្វើឱ្យការធ្វើដំណើរតភ្ជាប់ពីតំបន់មួយទៅតំបន់មួយទៀតកាន់តែងាយស្រួលសម្រាប់អ្នកដំណើរ។ ក្រុមហ៊ុនបានបន្ថែមថា ល្បឿនសាកល្បងជាក់ស្តែង គំរូរថភ្លើង CR450 បានឈានដល់ ៤៥០ គីឡូម៉ែត្រក្នុងមួយម៉ោង ជាមួយនឹងផ្នែកដំណើរការសំខាន់ៗដូចជា ល្បឿនប្រតិបត្តិការ ការប្រើប្រាស់ថាមពល សំលេងខាងក្នុង និងចម្ងាយហ្វ្រាំងជាដើម។
លើសពីនេះ គំរូរថភ្លើង CR450 ជាមួយនឹងល្បឿនលឿនជាងរថភ្លើងល្បឿនលឿនដែលកំពុងដំណើរការនាពេលបច្ចុប្បន្ន CR400 Fuxing ត្រឹមអតិបរមា ៣៥០ គីឡូម៉ែត្រក្នុងមួយម៉ោង។ ក្រុមហ៊ុនបានលើកឡើងថា រថភ្លើងល្បឿនលឿន CR450 នឹងបន្ថយប្រតិកម្មអវិជ្ជមាន ២២ ភាគរយ និងកាត់បន្ថយទម្ងន់ ១០ ភាគរយបើប្រៀបធៀបទៅនឹងរថភ្លើង CR400 ។ ដើម្បីធានាបាននូវសុវត្ថិភាព និងភាពធន់ក្នុងល្បឿនលឿន សម្ភារៈទំនើបៗដូចជា Carbon Fiber ក៏ត្រូវបានដាក់បញ្ចូលផងដែរ ដើម្បីកាត់បន្ថយទម្ងន់ដែលរក្សាបាននូវភាពរឹងមាំ។ ការច្នែប្រឌិតថ្មីនៃគម្រោង CR450 នឹងជួយជំរុញការច្នៃប្រឌិត និងឯករាជ្យភាពផ្នែកបច្ចេកវិទ្យាផ្លូវដែករបស់ប្រទេសចិន ដោយពង្រឹងបន្ថែមទៀតក្នុងនាមជាអ្នកដឹកនាំមួយរបស់ពិភពលោកក្នុងវិស័យបច្ចេកវិទ្យារថភ្លើងល្បឿនលឿន។
គួរឲ្យបញ្ជាក់ដែរថា ចិន ធ្លាប់បានសាងសង់បណ្តាញផ្លូវដែកល្បឿនលឿនបំផុត និងវែងជាងគេបំផុតរបស់ពិភពលោក ហើយក៏បានត្រៀមខ្លួនរួចជាស្រេចក្នុងការផ្តល់សេវាកម្មផ្លូវដែកដែលមានល្បឿនកាន់តែលឿន កាត់បន្ថយពេលវេលា មានផាសុកភាព និងប្រសិទ្ធភាព។ ក្នុងរយៈពេល ១៥ ឆ្នាំកន្លងមកនេះ ប្រទេសចិនបានសាងសង់បណ្តាញផ្លូវដែកសរុបប្រវែងជាង ១៦០ ០០០ គីឡូម៉ែត្ររួមមាន ទាំងបណ្តាញផ្លូវដែកធម្មតា និងផ្លូវដែកល្បឿនលឿនបំផុត។ ទីភ្នាក់ងារព័ត៌មានស៊ីនហួរបានរាយការណ៍ថា គិតត្រឹមខែកញ្ញា ឆ្នាំ២០២៤ បណ្តាញផ្លូវដែកល្បឿនលឿនរបស់ចិនមានប្រវែងលើសពី ៤៦ ០០០ គីឡូម៉ែត្រ ស្មើនឹងប្រមាណជាង ៧០ ភាគរយនៃប្រវែងផ្លូវរថភ្លើងល្បឿនលឿនសរុបក្នុងពិភពលោក៕
Account
Security
Favourite Content