ទំនាក់ទំនងរវាងមហាយក្សចិននិងអាមេរិកគឺជាចំណែកនៃឬសគល់ដ៏សំខាន់មួយនៅក្នុងបញ្ហាវិបត្តិរបស់ពិភពលោកបច្ចុប្បន្នទោះបីជាពេលនេះពួកគេមិនមែនជាតួអង្គដោយផ្ទាល់ដែលចូលរួមពាក់ព័ន្ធក្តី។

គិតរាប់ពីជម្លោះពាណិជ្ជកម្មរហូតទៅដល់វិបត្តិជម្លោះនៅអ៊ុយក្រែន បញ្ហានៅកោះតៃវ៉ាន់ ព្រមទាំងបញ្ហាវិបត្តិសកលផ្សេងទៀតដូចជាអតិផរណា ជាពិសេសការដណ្តើមតំណែងគ្នាជាមហាអំណាចទី១របស់ពិភពលោកជាដើមសុទ្ធតែជាបញ្ហាដែលមានការជះឥទ្ធិពលខ្លាំងចេញពីទំនាក់ទំនងរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងប៉េកាំង។

ទំនាក់ទំនងដ៏រកាំរកូសចុងក្រោយរវាងគ្នាកើតឡើងចេញពីជម្លោះពាណិជ្ជកម្មកាលពីក្នុងអាណត្តិរបស់អតីតប្រធានាធិបតីអាមេរិកលោក Donald Trump កាលពីឆ្នាំ២០១៨ ដោយការចាប់ផ្តើមអនុវត្តពន្ធនាំចូលទំនិញនិងដាក់កំហិតតឹងរឹងចំពោះផលិតផលរបស់ប្រទេសចិន។

ចាប់តាំងពីពេលនោះមកសហរដ្ឋអាមេរិក និងចិនហាក់ដូចជាមិនអាចត្រឡប់មកស្ថានភាពដូចដើមវិញឡើយបូករួមទាំងបញ្ហាជម្លោះជាច្រើនបន្តបន្ទាប់គ្នាដូចជាបញ្ហាកូវីដដោយការចោទប្រកាន់ដាក់គ្នាទៅវិញទៅមុខចំពោះមូលហេតុនៃការកកើតនៃវិរុសកូវីដផងបន្ទាប់មកក៏បញ្ហាជម្លោះនៅអ៊ុយក្រែនផង ព្រមទាំងបញ្ហានៃការផ្គើនដាក់គ្នាជុំវិញបញ្ហានៅកោះតៃវ៉ាន់តាមរយៈការបំពេញទស្សនកិច្ចរបស់ប្រធានសភាអាមេរិកលោកស្រី Pelosi ទៅកាន់កោះតៃវ៉ាន់និងការធ្វើសមយុទ្ធយោធាជាច្រើនដងក្បែរដែនសមុទ្រក្បែរកោះតៃវ់ាន់ពីសំណាក់រដ្ឋាភិបាលក្រុងប៉េកាំងផង ក៏ដូចជាបញ្ហាមិនចុះសម្រុងគ្នាផ្សេងទៀតដែលកំពុងកើតឡើងនៅលើពិភពលោក។

ទោះបីជាយ៉ាងណាក្តី ប៉ុន្មានថ្ងៃចុងក្រោយនេះ ចិន និងអាមេរិក បានកំពុងធ្វើឲ្យពិភពលោកហាក់មានភាពរីករាយ និងក្តីសង្ឃឹមឡើងវិញបន្តិចក្រោយពេលដែលជំនួបដ៏កម្រកម្រិតកំពូលជាលើកដំបូងនៃរដ្ឋមន្ត្រីការបរទេសអាមេរិកដែលធ្វើដំណើរបំពេញទស្សនកិច្ចក្នុងប្រទេសចិនកាលពីថ្ងៃចន្ទដើមសប្តាហ៍។ លោក Antony Bliken បានជួបជាមួយនឹងប្រធានាធិបតីចិន លោក Xi Jinping ផង និងក្រុមមន្ត្រីជាន់ខ្ពស់ជាច្រើនទៀតរបស់ចិននៅក្នុងឱកាសនេះ។

ទោះបីស្ថានភាពអាក្រក់ទាំងអស់នឹងមិនអាចត្រឡប់ដូចដើមក្តី ប៉ុន្តែដំណើរទស្សនកិច្ចរយៈពេល២ថ្ងៃរបស់លោករដ្ឋមន្ត្រីការបរទេសលោក Antony Blinken នៅក្នុងទីក្រុងប៉េកាំងបានក្លាយទៅជាសញ្ញាជាវិជ្ជមានចំពោះទំនាក់ទំនងរវាងមហាយក្សទាំងពីរ  ក៏ដូចជាអ្វីដែលពិភពលោកកំពុងទន្ទឹងរង់ចាំជាយូរ និងនៅក្នុងពេលដែលវិបត្តិសេដ្ឋកិច្ចបានកំពុងរីករាលដាលនៅតាមតំបន់ជាច្រើនរបស់ពិភពលោករួចមកហើយនោះ។

លទ្ធផលនៃកិច្ចប្រជុំដែលគួរជាទីមោទនភាពដោយភាគីទាំងពីរបានឈានទៅដល់ការព្រមព្រៀងគ្នាក្នុងការបង្កើនស្ថេរភាពនៃទំនាក់ទំនងគ្រប់កម្រិតឡើងវិញនិងក៏ដូចជាបញ្ហាដែលមានជំហប្រឆាំងគ្នាជាច្រើនផងដែរ។ លើសពីនេះសហរដ្ឋអាមេរិកក៏នឹងធ្វើការរៀបចំដើម្បីទទួលស្វាគមន៍ដំណើរទស្សនកិច្ចរបស់លោករដ្ឋមន្ត្រីការបរទេសចិន លោកQin Gang នៅក្នុងរយៈពេលប៉ុន្មានសប្តាហ៍ខាងមុខនេះផង ជាពិសេសការព្រមព្រៀងគ្នាក្នុងការរៀបចំជំនួបកំពូលរវាងមេដឹកនាំប្រទេសទាំងពីរគឺលោកប្រធានាធិបតី Xi Jinping និងលោកប្រធានាធិបតី Joe Biden ឲ្យបាននៅក្នុងឆ្នាំនេះផង៕