បរទេស៖ យោងតាមប្រភពព័ត៌មានពីរ័យទ័រ បានរាយការណ៍ថា ក្រសួងពាណិជ្ជកម្មចិន បានប្តេជ្ញាថានឹងចាត់វិធានការចាំបាច់ដើម្បីការពារផលប្រយោជន៍របស់ខ្លួនបន្ទាប់ពីសហរដ្ឋអាមេរិកបានរឹតបន្តឹងការត្រួតពិនិត្យលើការនាំចេញក្នុងគោលបំណងទប់ស្កាត់ឧស្សាហកម្មគ្រឿងបង្គុំឈីបរបស់ចិន។

កាលពីថ្ងៃចន្ទ ក្រសួងពាណិជ្ជកម្មអាមេរិកបានប្រកាសថា ខ្លួននឹងហាមឃាត់ការនាំចេញឧបករណ៍ផលិតបន្ទះឈីប ២៤ ប្រភេទ, កម្មវិធីសូហ្វវែរចំនួន ៣, និងអង្គចងចាំកម្រិតខ្ពស់បញ្ជូនទៅកាន់ប្រទេសចិន។ លើសពីនេះ អង្គភាពចិនចំនួន ១៤០ រួមមាន ក្រុមហ៊ុនផលិតឧបករណ៍ អ្នកផលិតបន្ទះឈីប និងក្រុមហ៊ុនវិនិយោគ ត្រូវបានបញ្ចូលទៅក្នុងបញ្ជីខ្មៅរបស់នាយកដ្ឋានពាក់ព័ន្ធនឹងតួនាទីរបស់ពួកគេក្នុងការអភិវឌ្ឍឧស្សាហកម្មគ្រឿងបង្គុំឈីបនៅក្នុងប្រទេសចិន។

នៅក្នុងសេចក្តីថ្លែងការណ៍មួយ ក្រសួងពាណិជ្ជកម្មអាមេរិកបានអះអាងថា ឧបករណ៍អេឡិចត្រូនិកចិនអាចប្រើនៅក្នុងប្រព័ន្ធអាវុធទំនើបជំនាន់ក្រោយ និងនៅក្នុងបញ្ញាសិប្បនិមិត្តដែលអាចបង្កហានិភ័យយ៉ាងខ្លាំងដល់សន្តិសុខជាតិរបស់សហរដ្ឋអាម៉េរិក។

ជាការឆ្លើយតប អ្នក​នាំ​ពាក្យ​ក្រសួងពាណិជ្ជកម្ម​ចិន​ លើកឡើង​ថា ​នេះ​ជា​សកម្មភាពដែលអាម៉េរិកប្រើអំណាចដាក់សម្ពាធលើសេដ្ឋកិច្ចចិន និង​ការ​អនុវត្ត​មិនមែន​ទីផ្សារ​ដូចជាការបំពានលើវិធានការត្រួតពិនិត្យការនាំចេញ និងអនុវត្តការគំរាមកំហែងឯកតោភាគីតែឯ​កឯង។ ចិន​ប្រឆាំង​យ៉ាង​ម៉ឺងម៉ាត់​ចំពោះ​ការអនុវត្ត​នេះ ហើយខ្លួននឹងចាត់វិធានការចាំបាច់ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួនយ៉ាងម៉ឺងម៉ាត់។ អ្នកនាំពាក្យរូបនេះបានសង្កេតឃើញថា ឧស្សាហកម្មគ្រឿងបង្គុំឈីបមានសកលភាវូបនីយកម្មខ្ពស់ ហើយសកម្មភាពឯកតោភាគីតែឯកឯងធ្វើឡើងដោយសហរដ្ឋអាមេរិកនឹងធ្វើឱ្យប៉ះពាល់ដល់គោលការណ៍ពាណិជ្ជកម្មសេរី។ នេះមានន័យថា តាមរយៈការរឹតបន្តឹងការនាំចេញទៅកាន់ប្រទេសចិន វាអាចប៉ះពាល់ដល់សមត្ថភាពរបស់ប្រទេសផ្សេងទៀតក្នុងការធ្វើពាណិជ្ជកម្មដោយសេរីជាមួយប្រទេសចិន ដែលធ្វើឲ្យសេដ្ឋកិច្ចពិភពលោកកាន់តែមានភាពតានតឹង។

គួរឲ្យ​បញ្ជាក់ដែរថា ការប្រណាំងប្រជែងខាងផ្នែកបច្ចេកវិទ្យាយោធាបានធ្វើឱ្យទំនាក់ទំនងរវាងសហរដ្ឋអាមេរិក និងចិនកាន់តែតានតឹង ខណៈដែលអាម៉េរិកកាន់តែព្រួយបារម្ភអំពីការឈ្លានពានរបស់ចិនមកលើកោះតៃវ៉ាន់នាពេលអនាគត។ ឧស្សាហកម្មឈីបរបស់ចិនត្រូវបានកំណត់គោលដៅដោយរដ្ឋបាលអាម៉េរិកជាបន្តបន្ទាប់ ដោយក្នុងអំឡុងពេលតំណែងដំបូងរបស់ Donald Trump គាត់បានហាមឃាត់ការនាំចេញឧបករណ៍ផលិតបន្ទះឈីបមួយចំនួនទៅកាន់ក្រុមហ៊ុន Semiconductor Manufacturing International Corp (SMIC) ដែលជាក្រុមហ៊ុនផលិតបន្ទះឈីបកំពូលរបស់ប្រទេសចិន។ បន្ទាប់មក ប្រធានាធិបតី Joe Biden បានរឹតបន្តឹងការត្រួតពិនិត្យការនាំចេញចំនួនពីរជុំបន្ថែមទៀត ខណៈពេលដែលចិនចាយលុយរាប់សិបពាន់លានដុល្លារ ដើម្បីជំរុញការផលិតគ្រឿងបង្គុំឈីបនៅក្នុងស្រុករបស់ខ្លួន។ មិនត្រឹមតែប៉ុណ្ណោះ សេតវិមានក៏បានជួបពិភាក្សាជាមួយប្រទេសជប៉ុន កូរ៉េខាងត្បូង និងតៃវ៉ាន់ ក្នុងគោលបំណងបង្កើតសម្ព័ន្ធផ្លូវការមួយហៅថា ‘‘Chip 4 Alliance’ ដែលទីក្រុងប៉េកាំងមើលឃើញថាជាការប៉ុនប៉ងរបស់ទីក្រុងវ៉ាស៊ីនតោន ដើម្បីមានអំណាចលើការផលិត និងខ្សែសង្វាក់ផ្គត់ផ្គង់ឈីបពិភពលោក។

កាលពី​២ឆ្នាំមុន ក្រុមហ៊ុនចិន SMIC បានទទួលជោគជ័យក្នុងការផលិតបន្ទះសៀគ្វីតាមស្តង់ដារបស្ចិមប្រទេសខ្ពស់បំផុត ទោះបីជាទទួលរងសម្ពាធពីអាម៉េរិកក៏ដោយ។ របកគំហើញនេះត្រូវបានបង្កើតឡើង ទោះបីជាទីក្រុងវ៉ាស៊ីនតោនហាមឃាត់ក្រុមហ៊ុនផលិតរបស់ហូឡង់ និងជប៉ុនមិនឲ្យផ្គត់ផ្គត់ឧបករណ៍ទំនើបបំផុតរបស់ពួកគេទៅលើ SMIC ក៏ដោយ៕