សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងទៅតាមប្រភពព័ត៌មានពីរ៉យទ័របានរាយការណ៍ថា ការងើបឡើងវិញនៃសេដ្ឋកិច្ចចិននឹងបង្កឱ្យមានការប្រកួតប្រជែងដ៏ខ្លាំងក្លាមួយនៅលើទីផ្សារថាមពលពិភពលោក ជាពិសេសតម្លៃថាមពលនៅសហភាពអឺរ៉ុបដែលកំពុងមានភាពមិនច្បាស់លាស់។
ការស្រាវជ្រាវរបស់ទីភ្នាក់ងារថាមពលអន្តរជាតិ IEA បានលើកឡើងថា កាលពីឆ្នាំមុនកម្រិតនៃការប្រើប្រាស់ហ្គាសនៅចិនបានថយចុះដោយសារតែសកម្មភាពឧស្សាហកម្មទាប និងកំណើនសេដ្ឋកិច្ចធ្លាក់ចុះ ដោយសារការរឹតបន្តឹងនៃការរាតត្បាតកូវីដ-១៩ និងការឡើងថ្លៃតម្លៃថាមពល។ ស្របពេលនោះដែរ អាកាសធាតុរដូវរងានៅអឺរ៉ុប រួមជាមួយនឹងវិធានការសន្សំសំចៃថាមពល លំហូរចូលឧស្ម័នធម្មជាតិរាវ (LNG) និងស្តុកឧស្ម័នគ្រប់គ្រាន់បានជួយប្លុកឱ្យឆ្លងកាត់រដូវរងាបានមួយគ្រា។ ការឡើងថ្លៃតម្លៃដែលមិនធ្លាប់មានពីមុនមកបាននាំឱ្យតម្រូវការហ្គាសរបស់អឺរ៉ុបមានការថយចុះ ១៣ ភាគរយ ខណៈដែលរដ្ឋាភិបាលប្រទេសនានាបានឆ្លើយតបយ៉ាងឆាប់រហ័សជាមួយនឹងគោលនយោបាយគ្រាអាសន្ន និងឧស្សាហកម្មបានកាត់បន្ថយការផលិតឡើងវិញ។
មិនត្រឹមតែប៉ុណ្ណោះ ហ្គាសរាវ LNG បានក្លាយជាថាមពលជំនួសហ្គាសរុស្ស៊ីដ៏សំខាន់នៅក្នុងសហភាពអឺរ៉ុប បន្ទាប់ពីប្រទេសនេះបានកាត់បន្ថយការផ្គត់ផ្គង់មកកាន់អឺរ៉ុបដោយសារតែទណ្ឌកម្មរបស់លោកខាងលិច។ កាលពីឆ្នាំ២០២២ កន្លងទៅនេះ តម្លៃនៃការធ្វើពាណិជ្ជកម្មហ្គាសរាវ LNG ជាសកលបានកើនឡើងខ្ពស់ទ្វេដងដល់ទៅ ៤៥០ ពាន់លានដុល្លារបើធៀបនឹងឆ្នាំ២០២១ ហើយប្លុកអឺរ៉ុបគឺជាកត្តាជំរុញចម្បងនៅពីក្រោយការកើនឡើងនៃតម្រូវការហ្គាស LNG នេះ។
IEA ក៏បាននិយាយដែរថា ចិនអាចជាប្រទេសដែលមានឥទ្ធិពលខ្លាំងនៅឆ្នាំនេះ ដោយសារការបើកសេដ្ធកិច្ចប្រទេសឱ្យទូលាយជាងមុន ដែលនឹងនាំឲ្យតម្រូវការហ្គាសរាវកើនឡើង។ ប្រសិនបើតម្រូវការ LNG សកលត្រឡប់ទៅកម្រិតមុនពេលមានវិបត្តិ នោះវានឹងធ្វើឱ្យការប្រកួតប្រជែងកាន់តែខ្លាំងនៅលើទីផ្សារពិភពលោក ហើយនឹងជំរុញឱ្យតម្លៃឡើងថ្លៃម្តងទៀតដោយជៀសមិនរួច។ មិនត្រឹមតែប៉ុណ្ណោះ ខាងសហភាពអឹរ៉ុបនឹងប្រឈមភាពលំបាកខ្លាំងជាងគេ ដោយសារការកាត់បន្ថយការផ្គត់ផ្គង់ឧស្ម័នរបស់រុស្ស៊ី និងការឡើងថ្លៃតម្លៃថាមពល។
ទោះជាយ៉ាងណាក្តី បើទោះបីជាតម្លៃហ្គាសធម្មជាតិបានធ្លាក់ចុះក្នុងរយៈពេលប៉ុន្មានខែថ្មីៗនេះ បន្ទាប់ពីការឡើងថ្លៃខ្លាំងកាលពីឆ្នាំមុនក៏ប៉ុន្តែតម្រូវការហ្គាសរាវ LNG បានកើនឡើងនៅក្នុងអាស៊ី ជាពិសេសេប្រទេសចិនបន្ទាប់ពីទីក្រុងប៉េកាំងបានលុបចោលការរឹតបន្តឹងកូវីដ-១៩។ គេបានប៉ាន់ប្រមាណថាតម្រូវការហ្គាសរាវ LNG របស់ប្រទេសចិនអាចកើនឡើង ១០ ភាគរយនៅឆ្នាំនេះ ខណៈដែលតម្រូវការនៅក្នុងប្រទេសអាស៊ីអាចកើនឡើងមានកម្រិតខ្ពស់រហូតដល់ ៣៥ ភាគរយប្រសិនបើតម្លៃនៅតែបន្តធ្លាក់ចុះ និងជំរុញសកម្មភាពសេដ្ឋកិច្ចទាំងមូលងើបឡើងវិញយ៉ាងឆាប់រហ័ស៕
Account
Security
Favourite Content