សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភព័ត៌មានពី CNN បានរាយការណ៍ថា ក្រុមហ៊ុនផលិតរថយន្តអគ្គិសនីយក្សរបស់ចិន BYD បានកត់ត្រាប្រាក់ចំណូលជាង ១០០ ពាន់លានដុល្លារក្នុងឆ្នាំ២០២៤ នាំមុខក្រុមហ៊ុនអាម៉េរិក Tesla របស់ Elon Musk។
កាលពីថ្ងៃចន្ទក្នុងសប្ដាហ៍នេះ BYD បានរាយការណ៍ថា ការលក់កើនឡើង ២៩ ភាគរយក្នុងឆ្នាំ២០២៤ ជាមួយនឹងកំណត់ត្រាប្រាក់ចំណូល ៧៧៧ ពាន់លានយ័ន (១០៧ ពាន់លានដុល្លារ) ពីការចែកចាយរថយន្តចំនួន ៤,២៧ លានគ្រឿងរួមមាន រថយន្តអគ្គិសនី និងរថយន្តកូនកាត់។ ទន្ទឹមនឹងនោះ ប្រាក់ចំណូលឆ្នាំ ២០២៤ របស់ក្រុមហ៊ុនអាម៉េរិក Tesla មានចំនួន ៩៧,៧ ពាន់លានដុល្លារ ជាមួយនឹងការចែកចាយរថយន្តដែលប្រើថ្មថាមពល ១,៧៩ លានគ្រឿង។ ការចែកចាយរថយន្តប្រចាំឆ្នាំរបស់ Tesla បានធ្លាក់ចុះ ១,១ ភាគរយជាលើកដំបូងកាលពីឆ្នាំមុន។
នៅក្នុងរបាយការណ៍ប្រចាំឆ្នាំចុងក្រោយបំផុតរបស់ BYD នាយកប្រតិបត្តិ Wang Chuanfu លើកឡើងថា ក្រុមហ៊ុនទទួលបានការអភិវឌ្ឍន៍យ៉ាងឆាប់រហ័សកាលពីឆ្នាំមុន ដែលធ្វើឲ្យ BYD បានក្លាយជាក្រុមហ៊ុនឈានមុខគេក្នុងវិស័យឧស្សាហកម្មគ្រប់វិស័យចាប់ពីអាគុយ គ្រឿងអេឡិចត្រូនិក រហូតដល់រថយន្តថាមពល ដែលមានសមត្ថភាពអាចប្រកួតប្រជែងនឹងម៉ាកយីហោបរទេស និងផ្លាស់ប្តូរទិដ្ឋភាពថ្មីនៃទីផ្សារពិភពលោក។ មិនត្រឹមតែប៉ុណ្ណោះ BYD កំពុងប្រកួតប្រជែងជាមួយនឹងក្រុមហ៊ុនអាម៉េរិក Tesla កាន់តែខ្លាំងឡើង។
កាលពីសប្តាហ៍មុន BYD បានបង្ហាញប្រព័ន្ធសាកថ្មលឿនបំផុត ដែលមានសមត្ថភាពសាកថ្មបានចម្ងាយ ២៥០ ម៉ាយ (៤០២ គីឡូម៉ែត) ក្នុងរយៈពេលត្រឹមតែ ៥ នាទីប៉ុណ្ណោះ ដែលលើសពីបច្ចេកវិទ្យាសាកថ្មរបស់ក្រុមហ៊ុន Tesla ។ ឧបករណ៍សាកថ្ម Superchargers របស់ក្រុមហ៊ុន Tesla ចំណាយពេល ១៥ នាទីក្នុងការសាកថ្មសម្រាប់ចម្ងាយ ២០០ ម៉ាយ (៣២១ គីឡូម៉ែត)។ លើសពីនេះ BYD បានចាប់ផ្តើមដំណើការប្រព័ន្ធជំនួយអ្នកបើកបរកម្រិតខ្ពស់សម្រាប់ម៉ូដែលភាគច្រើនរបស់ខ្លួនដោយមិនគិតថ្លៃបន្ថែម។ ក្រុមអ្នកវិភាគ លើកឡើងថា ការធ្វើឱ្យប្រព័ន្ធប្រសើរជាងមុនដោយឥតគិតថ្លៃបន្ថែមរបស់ BYD កំពុងបង្កើនសម្ពាធលើក្រុមហ៊ុន Tesla និងក្រុមហ៊ុនផលិតរថយន្ត EV ផ្សេងទៀតរបស់ចិន។ ផ្ទុយទៅវិញ ប្រព័ន្ធបើកបរដោយខ្លួនឯង (FSD) របស់ក្រុមហ៊ុន Tesla មានតម្លៃ ៩៩ ដុល្លារក្នុងមួយខែ ឬ តម្លៃពេញ ៨ ០០០ ដុល្លារ។
យ៉ាងណាក៏ដោយ ទោះបីជារថយន្ត EV របស់ចិនត្រូវបានរឹតបន្តឹងស្ទើរតែចេញពីទីផ្សារសហរដ្ឋអាម៉េរិកដោយសារតែពន្ធគយក៏ដោយ ប៉ុន្តែ BYD នៅតែជាមានប្រជាប្រិយភាពជាពិសេសក្នុងប្រទេសចិន ដែលជាទីផ្សាររថយន្តដ៏ធំបំផុតរបស់ពិភពលោក។ ក្នុងឆ្នាំ ២០២៤ BYD មានចំណែក ៣២ ភាគរយនៃការលក់រថយន្តសរុបរបស់ប្រទេសចិន ខណៈដែល Tesla មានចំណែកត្រឹមតែ ៦,១ ភាគរយប៉ុណ្ណោះនៅក្នុងទីផ្សារចិន។ ទន្ទឹមនឹងនេះ Tesla ក៏កំពុងជួបការលំបាកនៅក្នុងទ្វីបអឺរ៉ុបផងដែរ ខណៈដែលការលក់បានធ្លាក់ចុះក្នុងរយៈពេលពីរខែជាប់គ្នាបើគិតពីខែកុម្ភៈ៕
Account
Security
Favourite Content