សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទឹកគឺជាអាទិភាពមួយក្នុងចំណោមអាទិភាពទាំងប្រាំនៃយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលហើយការផ្តល់សេវាផ្គត់ផ្គង់ទឹកស្អាតត្រូវឈរលើលក្ខខណ្ឌគោលចំនួន៤ គឺទឹកស្អាតត្រូវមានគុណភាព សុវត្ថិភាព និរន្តរភាព និងតម្លៃសមរម្យ។ ទឹកស្អាត មានសារៈសំខាន់ផ្នែកសេដ្ឋកិច្ច និងមានតួនាទីសំខាន់ក្នុងជីវភាពរស់នៅប្រចាំថ្ងៃ និងសម្រាប់ជំរុញការអភិវឌ្ឍវិស័យសេដ្ឋកិច្ចនានា ពិសេសតំបន់ សហគ្រាស ធុនតូច និងមធ្យម, តំបន់ប្រមូលផ្តុំឧស្សាហកម្ម, និងតំបន់សេដ្ឋកិច្ចពិសេស ដើម្បីគាំទ្រកំណើនសេដ្ឋកិច្ចបន្ថែមទៀត។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងដូច្នេះក្នុងពិធីប្រកាសសមាសភាពប្រធានក្រុមប្រឹក្សាភិបាលសហគ្រាសសាធារណៈចំនួន៦គឺ រដ្ឋាករទឹកស្វយ័តក្រុងភ្នំពេញ រដ្ឋាករទឹកស្ទឹងត្រែង រដ្ឋាករទឹកបាត់ដំបង រដ្ឋាករទឹកពោធិ៍សាត់ រដ្ឋាករទឹកកំពត និងរដ្ឋាករទឹកក្រុងស្ទឹងសែនកាលពីថ្ងៃទី១០ ខែមិថុនា ឆ្នាំ២០២៤។
ឯកឧត្តមរដ្ឋមន្ត្រីបានបញ្ជាក់ថា៖ ការកែសម្រួលសមាសភាពលើកនេះ គឺយោងទៅលើភាពចាំបាច់ក្នុងការកែតម្រូវស្ថានភាពរបស់ក្រុមប្រឹក្សាភិបាល ក៏ដូចជាពង្រឹងយន្តការប្រតិតុល្យការ និងភាពជាតំណាងរបស់ប្រធាន។ឯកឧត្តមបានផ្តល់អនុសាសន៍ដល់រដ្ឋាករទឹកទាំងអស់ឱ្យយកចិត្តទុកដាក់លើគណនេយ្យភាព ដោយផ្តល់បច្ចុប្បន្នភាពលទ្ធផលឱ្យបានទៀតទាត់ និងអនុវត្តឱ្យបានខ្ជាប់ខ្ជូននូវនីតិវិធីប្រតិបត្តិស្តង់ដារ។
ឯកឧត្តមបានលើកទឹកចិត្តឱ្យរដ្ឋាករទឹកទាំងអស់ខិតខំពង្រឹងធនធានមនុស្ស ប្រសិទ្ធភាពប្រតិបត្តិការ និងនិរន្តរភាពសហគ្រាសរបស់ខ្លួន ដោយផ្តោតលើការបង្កើតផែនការមេ គម្រោងវិនិយោគ និងការលើកកម្ពស់ការលក់ទឹកដុំនៅក្នុងតំបន់ដែលមិនទាន់ទទួលសេវា។
គួរជម្រាបថា ៖ ក្នុងពិធីប្រកាសសមាសភាពនេះ ឯកឧត្តម ឯក សុនចាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានថ្មីនៃក្រុមប្រឹក្សាភិបាលរដ្ឋាករទឹកស្វយ័តក្រុងភ្នំពេញ តំណាងប្រធានក្រុមប្រឹក្សាភិបាលនៃរដ្ឋាករទឹកទាំងអស់ បានធ្វើការប្តេជ្ញាលើកកម្ពស់អភិបាលកិច្ច និងធ្វើឱ្យមានការរីកចម្រើនជាដុំកំភួនក្នុងវិស័យទឹកស្អាត។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងសិក្សាលទ្ធភាពរៀបចំរដ្ឋាករទឹកស្វយ័តកម្ពុជា និងនិយ័តករទឹកស្អាត ដើម្បីពង្រឹងតួនាទីយុទ្ធសាស្ត្ររបស់រដ្ឋក្នុងការផ្គត់ផ្គង់ទឹកស្អាត និងបទប្បញ្ញត្តិវិស័យនេះ។ សមាគមអ្នកផ្គត់ផ្គង់ទឹកស្អាតកម្ពុជា តំណាងវិស័យឯកជន ក៏ត្រូវបានជំរុញឱ្យពង្រឹងសមត្ថភាពរបស់ខ្លួន ដោយស្វែងរកការគាំទ្របច្ចេកទេស និងកិច្ចសហការពីរដ្ឋាករទឹកផងដែរ។
តាមស្ថិតិរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ការផលិតនិងការផ្គត់ផ្គង់ទឹកស្អាតសរុប ទាំងដោយរដ្ឋាករទឹក និងប្រតិបត្តិករឯកជន បានកើនដល់ជាង ៥០លានម៉ែត្រគូបក្នុងខែឧសភា ឆ្នាំ២០២៤។ ចំនួនតំណបានកើនឡើងដល់ ១.៣៦៣.០៣២ ដែលបម្រើប្រជាពលរដ្ឋចំនួន ២.៨៥៥.៥៦៥ គ្រួសារ ហើយប្រវែងនៃបណ្តាញចែកចាយទឹកស្អាតសរុបបានកើនឡើងដល់ ៣២.៨៩២ គីឡូម៉ែត្រនៅទូទាំងប្រទេស៕
Account
Security
Favourite Content