សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពពី Weforum បានលើកឡើងថា បញ្ហាបម្រែបម្រួលអាកាសធាតុកាន់តែធ្ងន់ធ្ងរបានបង្កជាផលប៉ះពាល់កាន់តែធ្ងន់ធ្ងរដល់ធម្មជាតិដូចជា ភេទរបស់សត្វ ដំណាំកាហ្វេ និងរុក្ខជាតិមួយចំនួនទៀត ជាពិសេសប៉ះពាល់ដល់ការហោះហើរកាន់តែរដិបរដុប រួមជាមួយនឹងការកើតមានហេតុការណ៍រន្ទះបាញ់កាន់តែញឹកញាប់។
ទស្សនាវដ្ដី Smithsonian បានចេញផ្សាយថា សត្វបង្កួយឈ្មោះ Bearded Dragon ដែលមានដើមកំណើតនៅប្រទេសអូស្ត្រាលី នៅពេលដែលអាកាសធាតុកាន់តែក្តៅ កូននៅក្នុងពងវាទំនងជាញី។ គេបានពន្យល់ថា ស៊ុតដែលមានក្រូម៉ូសូមភេទឈ្មោលនឹងវិវត្តន៍ទៅជាញី ប្រសិនបើសំបុកពងវានៅក្រោមសីតុណ្ហភាព ៣២ អង្សារសេ ឬខ្ពស់ជាងនេះ។ បញ្ហានេះកំពុងធ្វើឲ្យអ្នកវិទ្យាសាស្ត្រព្រួយបារម្ភថា ប្រសិនបើសីតុណ្ហភាពបន្តកើនឡើង សត្វឈ្មោលអាចក្លាយទៅជាប្រភេទសត្វកម្រកាន់តែខ្លាំង ដែលប្រឈមនឹងការផុតពូជ ជាពិសេសអំប្រ៊ីយ៉ុងរបស់ពពួកសត្វល្មូនត្រូវបានប៉ះពាល់ដោយសារសីតុណ្ហភាព។ ក្រៅពីសត្វល្មូន សីតុណ្ហភាពក៏មានឥទ្ធិពលដល់ការបង្កកំណើតរបស់ក្រពើ អណ្តើក និងត្រីជាច្រើនប្រភេទផងដែរ។
មួយវិញទៀត សីតុណ្ហភាពក្តៅកំពុងធ្វើឱ្យពពែរស់នៅភ្នំ Alps របស់អ៊ីតាលីកាន់តែមានមាឌតូចជាងមុន ហើយពពែភ្នំ Alpine Chamois ឥឡូវនេះមានទម្ងន់ស្រាលជាង ២៥ ភាគរយបើធៀបនឹងឆ្នាំ១៩៨០។ យោងតាមប្រភពពី Bloomberg កត់សំគាល់ថា សីតុណ្ហភាពខ្ពស់ធ្វើឲ្យសត្វដែលមានឈាមក្តៅអាចស្រកទម្ងន់បាន។ យ៉ាងណាមិញ វាក៏ជាបញ្ហាមួយដែរ ដោយសារវាអាចជះឥទ្ធិពលដល់ប្រព័ន្ធធម្មជាតិផ្សេងទៀត ពីព្រោះពពែតូចៗត្រូវការអាហារតិចជាងមុន ហើយពួកវានឹងចំណាយពេលច្រើនសម្រាក និងចំណាយពេលតិចក្នុងការស្វែងរកចំណីដើម្បីព្យាយាមជៀសវាងពីកំដៅខ្លាំង។
ករណីភ្លើងឆេះព្រៃបានបំផ្លាញចម្ការទំពាំងបាយជូរពីតំបន់ក្នុងប្រទេសអេស្ប៉ាញរហូតដល់ជ្រលង Napa Valley របស់រដ្ឋ California ដែលធ្វើឲ្យរសជាតិរបស់ទំពាំងបាយជូរផ្លាស់ប្តូរបើទោះបីជាពួកវារួចផុតពីកំដៅក៏ដោយ ។ របាយការណ៍របស់ BBC បាននិយាយថា ដើម្បីផលិតស្រាដែលមានគុណភាពខ្ពស់ មុខងារសំខាន់ៗចំនួនបីនៃផ្លែប៊ឺរីត្រូវតែមានតុល្យភាពដូចជា ស្ករ អាស៊ីត និងសមាសធាតុបន្ទាប់បន្សំ។ ដូច្នោះហើយ នៅពេលដែលសីតុណ្ហភាពកាន់តែក្តៅ ទំពាំងបាយជូររឹតតែទុំ ដែលនាំឱ្យវាមានរសជាតិផ្អែមដូចផ្លែទំពាំងបាយជូរក្រៀម។ បញ្ហានេះក៏អាចបង្កើនបរិមាណជាតិអាល់កុលនៅក្នុងស្រា និងកាត់បន្ថយភាពស្រទន់នៃរសជាតិ រួមនឹងក្លិនផងដែរ។
ក្រៅពីនេះ មានការសិក្សាមួយបានបង្ហាញថា គ្រាប់កាហ្វេ គឺងាយរងគ្រោះបំផុតពីផលប៉ះពាល់នៃបម្រែបម្រួលអាកាសធាតុដែលគ្របដណ្តប់លើតំបន់ផលិតសំខាន់ៗ។ គ្រាប់កាហ្វេលូតលាស់បានល្អបំផុតនៅក្នុងតំបន់ដែលមានសីតុណ្ហភាពថេរទាំងថ្ងៃទាំងយប់ ក៏ដូចជាពេញមួយឆ្នាំផងដែរ។ នេះមានន័យថាការផ្លាស់ប្តូរលក្ខខណ្ឌអាកាសធាតុមិនត្រឹមតែអាចនាំឱ្យមានការខ្វះខាតទិន្នផលគ្រាប់កាហ្វេប៉ុណ្ណោះទេ ប៉ុន្តែថែមទាំងគំរាមកំហែងដល់ប្រាក់ចំណូលរបស់មនុស្សរាប់លាននាក់ផងដែរ ជាពិសេសប្រទេសកំពុងអភិវឌ្ឍន៍។ យោងតាមប្រភពដដែលបានបង្ហាញថា ហេតុការណ៍រន្ទះបាញ់បានកើតឡើងមកលើផែនដីប្រហែល ៨ លានដងក្នុងមួយថ្ងៃ ប៉ុន្តែចំនួននេះអាចកើនឡើងទៀតនៅពេលដែលកំដៅផែនដីកើនឡើង។ ការសិក្សាមួយបានប៉ាន់ប្រមាណថា រាល់ការឡើងកំដៅផែនដី ១ អង្សារសេអាចនាំឲ្យរន្ទះបាញ់កើនឡើង ១២ ភាគរយ។ ការប្រែប្រួលអាកាសធាតុកំពុងធ្វើឱ្យខ្យល់កាន់តែក្តៅ ដែលអាចបង្កើនឱកាសនៃព្យុះ ផ្គរ រន្ទះច្រើនជាងមុន។ មិនត្រឹមតែប៉ុណ្ណោះ ផលប៉ះពាល់អាចបង្កឲ្យភ្លើងឆេះព្រៃកាន់តែច្រើន ដោយសាររន្ទះអាចបណ្តាលឱ្យមានភ្លើងឆេះក្នុងចំណោមរុក្ខជាតិស្ងួត និងការខូចខាតដល់បណ្តាញអគ្គិសនីផងដែរ៕
Account
Security
Favourite Content