សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ របត់នៃការធ្វើការងារពីចម្ងាយ ឬធ្វើការពីក្រៅការិយាល័យបានផ្ទុះឡើងខ្លាំងចាប់តាំងតែពីពេលដំបូងនៃសម័យកាលវិរុសកូវីដ ហើយវាបានធ្វើឲ្យមនុស្សជាច្រើនជឿជាក់ថា ទៅជាអនាគត របត់បែបនេះនឹងអាចក្លាយទៅជារបៀបធ្វើការងាររបស់ពិភពលោកជាមិនខាន ដោយសារតែមានការបូករួមបញ្ចូលគ្នាជាមួយបច្ចេកវិទ្យាបែបឆ្លាតវ៉ៃ ឬបញ្ញាសិប្បនិម្មិត AI កាន់តែខ្លាំងក្លា។
ទោះបីជាយ៉ាងណាក្តី ប្រធានបទដ៏មានភាពដេញដោលគ្នាមួយនេះត្រូវបានក្រុមអ្នកជំនាញជាច្រើនជជែកវែកញ៉ែកនៅក្នុងកិច្ចប្រជុំ Good Work Alliance នៃវេទិកាសេដ្ឋកិច្ចពិភពលោក WEFORUM កាលពីពេលថ្មីៗ ដោយធ្វើការសន្និដ្ឋានរួមគ្នាសាជាថ្មីថា នៅពេលអនាគតដ៏ខ្លីខាងមុខនេះ របៀបធ្វើការងារពីចម្ងាយនៅមិនទាន់អាចមានភាពច្បាស់លាស់១០០ភាគរយនៅឡើយ ខណៈដែលនៅពេលបច្ចុប្បន្ននេះ មានបុគ្គលិកមួយចំណែកធំនៅតែប្រកាន់យករបៀបធ្វើការងារនៅការិយាល័យ ឬក្រុមហ៊ុននៅឡើយ។
មានកត្តាជាច្រើនដែលក្រុមអ្នកជំនាញបានធ្វើការអះអាងស្រដៀងគ្នាដោយក្នុងកិច្ចប្រជុំថា ៖ ដំបូងបំផុតពួកគេជឿជាក់ថា ការធ្វើការពីចម្ងាយមិនមែនជាជម្រើសរបស់មនុស្សគ្រប់គ្នាឡើយ។ កន្លែងការងារខ្លះ ប្រហែលជាមិនបានផ្តល់ផាសុកភាពគ្រប់គ្រាន់ដល់មជ្ឈដ្ឋានធ្វើការងារឡើយ ទើបបណ្តាលឲ្យមានបុគ្គលិកចង់ធ្វើការពីចម្ងាយជាង ប៉ុន្តែបច្ចុប្បន្ន មានអាជីវកម្ម និងក្រុមហ៊ុនជាច្រើនបានព្យាយាមតុបតែងរៀបចំកន្លែងធ្វើការងារដ៏មានភាពទាក់ទាញ និងបន្ថែមនូវបទពិសោធថ្មីជាមួយនឹងសេវាកម្ម ព្រមទាំងបច្ចេកវិទ្យាមួយចំនួនទៀត។
អ្នកជំនាញម្នាក់ក្នុងចំណោម៤នាក់បានលើកឡើងថា នាពេលអនាគតរបៀបនៃការធ្វើការងារពីចម្ងាយសម្រាប់អ្នករស់នៅទីក្រុងគឺមិនមែនជាជម្រើសល្អឡើយ ពីព្រោះថា ទីកន្លែងរស់នៅ (Living Space) សម្រាប់មនុស្សទូទៅកាន់តែចង្អៀត ហើយពេលខ្លះសមាជិកគ្រួសារច្រើនពេកមិនអំណោយផលសម្រាប់បំពេញការងារឡើយ ប៉ុន្តែបែរជានៅតាមការិយាល័យវិញមានទីធ្លាទូលាយ និងរួមមានទាំងសេវាកម្មកំសាន្តច្រើនជាងមុន ជាពិសេសវាអាចផ្តល់នូវរសជាតិថ្មី និងមានភាពបត់បែនជាងមុន ទាំងទីតាំងអង្គុយ និងទីតាំងលំហែ។ ប៉ុន្តែ ប្រសិនបើទីកន្លែងការងារនោះអាចផ្តល់នូវការងារដែលមានសេរីភាពជាងមុន ដូចជាការបំពេញការងារនៅការិយាល័យ៣ថ្ងៃ និងនៅក្រៅការិយាល័យ ២ ឬ ៣ថ្ងៃវិញ នោះវាពិតណាស់នឹងអាចទាក់ទាញមនុស្សជំនាន់ Gen Z ជាងអ្វីៗទាំងអស់ ពីព្រោះពួកគេត្រូវការមានទំនាក់ទំនងជាមួយនឹងមិត្តភ័ក្ត និងមនុស្សជុំវិញឲ្យមានភាពស្និទ្ធស្នាល ស្មើភាពគ្នាដែលទាំងនេះគេអាចហៅថា ជារបៀបធ្វើការកូនកាត់ ឬ Hybrid ។
ដោយឡែក សម្រាប់លោក Manny Maceda ប្រធានប្រតិបត្តិនៃក្រុមហ៊ុន Bain & Company Inc បានបង្ហាញអំពីការស្ទាបស្ទង់របស់ក្រុមហ៊ុននៅក្នុងទីផ្សារសកលថា ទាំងរបៀបនៃការធ្វើការពីចម្ងាយ និងធ្វើការងារបែបកូនកាត់ស្ថិតនៅចំណាត់ថ្នាក់លេខ៣ដូចគ្នាបើគិតពីចំនួនបុគ្គលិកដែលចង់បានពីកន្លែងការងារ ប៉ុន្តែអ្វីដែលជារឿងសំខាន់បំផុត
ប្រសិនបើឲ្យពួកគេធ្វើការងារនៅកន្លែងការងារ នោះក្រុមហ៊ុនត្រូវប្រាកដថា ពួកគេនឹងទទួលបានប្រាក់សំណង និងលើកទឹកចិត្តគ្រប់គ្រាន់ ឬ Compensation ។
ដូច្នេះ អ្នកជំនាញទាំងអស់នៅក្នុងកម្មវិធីប្រជុំដ៏ធំខាងលើនេះ បានធ្វើការផ្តល់មតិរួមជាចុងក្រោយថា អ្វីដែលអាចកំណត់បានគឺវាអាស្រ័យទៅលើក្រុមហ៊ុនដែរ ថាតើបើពួកគេចង់បានបុគ្គលិកធ្វើការងារនៅកន្លែង ឬយ៉ាងណា? ដូច្នេះ វាទាមទារឲ្យមានការយកចិត្តទុកដាក់ខ្ពស់ទៅលើការកែច្នៃ និងអភិវឌ្ឍបរិយាកាសកន្លែងការងារឲ្យសមស្របនឹងការចង់បានរបស់បុគ្គលិកដែលជាក្រុមមនុស្សជំនាន់ថ្មី ឬត្រូវធានាឲ្យបានច្បាស់ថា ក្រុមហ៊ុនអាចផ្តល់អត្ថប្រយោជន៍ផ្នែកហិរញ្ញវត្ថុគ្រប់គ្រាន់ដើម្បីទាក់ទាញយកធនធានមនុស្សឱ្យបានគ្រប់គ្រាន់តាមតម្រូវការ៕
Account
Security
Favourite Content