សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ សេចក្តីប្រកាសមួយដោយរដ្ឋាភិបាលឥណ្ឌាកាលពីថ្ងៃអង្គារបានឲ្យដឹងថា រដ្ឋមន្ត្រីក្រសួងការពារជាតិ លោក Rajnath Singh បានចុះហត្ថលេខារួចរាល់ហើយអនុញ្ញាតឲ្យមានការចាប់ផ្តើមកម្មវិធីអភិវឌ្ឍទៅលើបច្ចេកវិទ្យាយន្តហោះប្រយុទ្ធម៉ូដែល Advanced Medium Combat Aircraft (AMCA) ដែលនឹងក្លាយទៅជាយន្តហោះចម្បាំងជំនាន់ទី៥របស់ខ្លួន។
គម្រោងវិនិយោគដែលមានទឹកប្រាក់ដំបូងប្រមាណជា១៧៥លានដុល្លារនឹងត្រូវគ្រប់គ្រងដោយទីភ្នាក់ងារអភិវឌ្ឍបច្ចេកវិទ្យាអាកាសចរណ៍ ឬ Aeronautical Development Agency និងមានការចូលរួមដេញថ្លៃជាមួយនឹងក្រុមហ៊ុនដៃគូអាជីវកម្មឯកជន និងរដ្ឋនានាផងដែរ។
តាមប្រភពដដែលបានឲ្យដឹងទៀតថា AMCA គឺជាគម្រោងអភិវឌ្ឍយន្តហោះក្នុងស្រុករបស់ឥណ្ឌាដើម្បីអាចទទួលបាននូវបច្ចេកវិទ្យាយន្តហោះចម្បាំងដ៏ទំនើបដែលមានសមត្ថភាពប្រយុទ្ធច្រើនមុខងារ ក៏ដូចជាមុខងារហោះហើរលឿនជាងសម្លេងសម្រាប់យកទៅដាក់ឲ្យប្រតិបត្តិការកងកម្លាំងទ័ពជើងទឹក និងកងទ័ពអាកាសរបស់ឥណ្ឌា។
នៅក្នុងគម្រោងការអភិវឌ្ឍនេះផងដែរ សម្រាប់ឳកាសដេញថ្លៃនឹងត្រូវផ្តល់ឲ្យដោយមានតម្លាភាពបំផុត ទាំងក្រុមហ៊ុនឯកជន និងក្រុមហ៊ុនដែលគ្រប់គ្រងដោយរដ្ឋដើម្បីប្រកួតប្រជែងគ្នាដែលក្នុងនោះអ្នកចូលរួមអាចដេញថ្លៃដោយឯករាជ្យ ឬក្នុងលក្ខខណ្ឌបណ្តាក់ទុនរួមគ្នា ឬជាផ្នែកមួយនៃសម្ព័ន្ធក្រុមហ៊ុន ហើយបើមិនមានអ្វីប្រែប្រួលទេនោះ យន្តហោះជំនាន់៥របស់ឥណ្ឌានេះនឹងមានកន្លែងអង្គុយសម្រាប់តែពីឡុតម្នាក់ប៉ុណ្ណោះ ឬ Single Seat ជាមួយនឹងម៉ាស៊ីនភ្លោះ ដែលមានមុខងារអាចវាយប្រហារគ្រប់ប្រភេទទីតាំងរួមទាំងការវាយប្រហារលើអាកាស ការវាយប្រហារលើទីតាំងផ្ទាល់ដី និងការការពារដែនអាកាស ព្រមទាំងការធ្វើសង្គ្រាមបែបអេឡិចត្រូនិកផងដែរ។
គួរឲ្យដឹងដែរថា កម្មវិធីអភិវឌ្ឍយន្តហោះចម្បាំងនេះ បានទទួលការអនុម័តជាគោលការណ៍ពីគណៈកម្មាធិការនៃខុទ្ទកាល័យទទួលបន្ទុកកិច្ចការងារសន្តិសុខ ដែលដឹកនាំដោយនាយករដ្ឋមន្ត្រី Narendra Modi កាលពីឆ្នាំមុនមកម្ល៉េះ។
កងទ័ពអាកាសរបស់ឥណ្ឌាជាយូរមកហើយគឺបានពឹងផ្អែកតែទៅលើយន្តហោះចម្បាំងដែលរចនាដោយប្រទេសរុស្ស៊ី រួមទាំងយន្តហោះចម្បាំង Su-30MKI និង MiG-29 ប៉ុណ្ណោះ ប៉ុន្តែក្រោយមកប្រទេសឥណ្ឌាបានផលិត Su-30MKI កាលពីឆ្នាំ២០០៤ ក្រោមអាជ្ញាប័ណ្ណរបស់រុស្ស៊ី។ Hindustan Aeronautics Limited គ្រប់គ្រងដោយរដ្ឋបានផលិតយន្តហោះនេះប្រមាណជាជាង២០០គ្រឿង ហើយបច្ចុប្បន្ននេះវាគឺជាឆ្អឹងខ្នងដ៏សំខាន់នៃកងទ័ពអាកាសឥណ្ឌា។
ឥណ្ឌាមានបំណងចង់ឲ្យសម្រេចបាននូវគំរូដើមដំបូងរបស់ AMCA នៅត្រឹមឆ្នាំ២០២៧ ដែលនឹងត្រូវដាក់ឱ្យប្រើប្រាស់សាកល្បងទាំងបច្ចេកវិទ្យា និងការបំពាក់អាវុធ រួចរាល់មុននឹងចាប់ផ្តើមផលិតកម្មនៅឆ្នាំ២០៣៥។ កងកម្លាំងអាកាសឥណ្ឌាមានបំណងបញ្ជាទិញយន្តហោះចម្បាំងជំនាន់ថ្មីនេះយ៉ាងហោចណាស់១២៥គ្រឿងនៅក្នុងដំណាក់កាល២ផ្សេងគ្នា៕
Account
Security
Favourite Content