សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របតាមចក្ខុវិស័យ និងផែនការរបស់ក្រសួងរៀបចំដែនដី នគរូបនីយកម្ម និងសំណង់ ដែលគ្រោងនឹងបញ្ចប់ការវាស់វែង និងចុះបញ្ជីដីធ្លីនៅទូទាំងប្រទេសឱ្យចប់រួចរាល់នៅត្រឹមអំឡុងខែមេសាខាងមុខនេះ សកម្មភាពនៅតាមបណ្ដាខេត្តនានាទូទាំងប្រទេសកំពុងពន្លឿនការវាស់វែង និងចុះបញ្ជីដីធ្លីឱ្យបានចប់សព្វគ្រប់តាមផែនការនៅដើមឆ្នាំ២០២៥នេះ ហើយក៏បានរៀបចំបិទផ្សាយជាសាធារណៈសម្រាប់ពលរដ្ឋផ្ទៀងផ្ទាត់ឯកសារជាបណ្តើរៗមុនឈានដល់ការបណ្ណសម្គាល់ម្ចាស់កម្មសិទ្ធិ។
យោងតាមសេចក្ដីប្រកាសព័ត៌មានតាមបណ្ដាខេត្តមួយចំនួន បានបង្ហាញពីភាពសកម្មក្នុងការពន្លឿនការវាស់វែង និងចុះបញ្ជីដីធ្លីមានលក្ខណៈជាប្រព័ន្ធ ជាក់ស្ដែងកាលពីពេលថ្មីៗនេះ រដ្ឋបាលខេត្តបាត់ដំបង បានប្រកាសកំណត់ធ្វើការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធនូវភូមិចំនួន៥ ក្នុងឃុំអរដា ស្រុកកំរៀងខេត្តបាត់ដំបង ។ បើតាមរដ្ឋបាលខេត្តបាត់ដំបង ក៏បានបញ្ជាក់ថា រដ្ឋបាលខេត្តបាត់ដំបង បានត្រៀមខ្លួនរួចជាស្រេចក្នុងការពន្លឿនការវាស់វែង និងចុះបញ្ជីដីធ្លីជូនប្រជាពលរដ្ឋឱ្យបានចប់សព្វគ្រប់នៅក្នុងឆ្នា២០២៥ នេះ ។
ទន្ទឹមនឹងនេះដែរ ក្រសួងរៀបចំដែនដី នគរូបនីយកម្ម និងសំណង់ ក៏បាន និងកំពុងគិតគូរដំណោះស្រាយបញ្ចប់វិវាទដីធ្លី និងការគ្រប់គ្រងដីនៅតំបន់បឹងទន្លេសាបនៃខេត្តកំពង់ឆ្នាំងឱ្យបានត្រឹមត្រូវ ដើម្បីលុបបំបាត់ភាពចម្រូងចម្រាស់ក្នុងសង្គមជាតិ និងជំរុញលើកស្ទួយខឿនសេដ្ឋកិច្ចជាតិឱ្យបានរឹងមាំ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ៖
«នេះគឺជាឱកាសរបស់យើងទាំងអស់គ្នា ក្នុងការរួមគ្នាបញ្ចប់នូវបញ្ហាវិវាទដីធ្លីនៅក្នុងខេត្តកពង់ឆ្នាំង។ ក្នុងក្របខណ្ឌនៃការចុះវាស់វែង ដីធ្លីនៅទូទាំងប្រទេសមកដល់ពេលនេះ យើងវាស់វែងបានប្រមាណជាង៤លានក្បាលដីហើយ ហើយការចុះវាស់វែងដីធ្លីនេះ សម្រាប់មន្ត្រីសុរិយោដីគឺជាការចុះប្រមូលទិន្នន័យព័ត៌មាន ដើម្បីវិនិច្ឆ័យលើក្បាលដីនីមួយៗ តាមបច្ចេកទេសសុរិយោដី ដែលការវាស់វែងក្បាលដីនេះ នឹងអាចបញ្ចប់រួចរាល់នៅមុនពិធីបុណ្យចូលឆ្នាំប្រពៃណីជាតិខាងមុខនេះចូលមកដល់ ។ ចំណែកឯការដោះស្រាយវិវាទដីធ្លីនៅទូទាំងប្រទេស បានដោះស្រាយដោយជោគជ័យជាច្រើនករណី និងនៅសេសត្រឹមប្រមាណក្រោម១ពាន់ករណីប៉ុណ្ណោះនាពេលបច្ចុប្បន្ននេះ» ។
ឯកឧត្តមឧបនាយករដ្ឋមន្ត្រីបានបញ្ជាក់ថា សម្រាប់ខេត្តសៀមរាបក៏បានដោះស្រាយ បញ្ចប់ទាំងស្រុងនូវបញ្ហាវិវាទដីធ្លីរវាងប្រជាជន និងអាជ្ញាធរអប្សរា ។ ដោយឡែកចំពោះបឹងទន្លេសាបដែលត្រូវបានបែងចែកជាបីតំបន់ គឺតំបន់៣ ជាតំបន់ព្រំលិចទឹក, តំបន់២ជាតំបន់អាស្រ័យផល និងតំបន់១ ជាតំបន់លំនៅឋាន ដោយក្នុងនោះក្រុមការងារ និងអាជ្ញាធរបានប្រកាន់យកគោលជំហរជាក់លាក់ ដើម្បីរក្សានូវអាយុជីវិតបឹងទន្លេសាប ពីព្រោះបឹងទន្លេសាប និងទន្លេមេគង្គឱ្យផលដល់ប្រទេសជាតិ និងប្រជាជនក្នុងរង្វង់ប្រមាណ២ពាន់លានដុល្លារក្នុងមួយឆ្នាំ ។
ឯកឧត្តម ម៉ាង ស៊ីណេត អភិបាលខេត្តព្រះសីហនុ ក៏បានអះអាងដែរថា ខេត្តព្រះសីហនុ ជាខេត្តមួយដែលគ្រោងនឹងបញ្ចប់ការវាស់វែង និងចុះបញ្ជីដីធ្លីនៅពេលឆាប់ៗនេះ ដោយបច្ចុប្បន្ននេះ នៅសល់ភូមិតិចតួចប៉ុណ្ណោះ ដែលមិនទាន់បានចុះបញ្ជី ដោយភូមិទាំងនោះជាតំបន់ស្មុគស្មាញ ប៉ុន្តែ មិនយូរទេ ខេត្តព្រះសីហនុនឹងបញ្ចប់ការវាស់វែង និងចុះបញ្ជីដីធ្លីទាំងស្រុងស្របតាមផែនការរបស់ក្រសួងជាក់ជាមិនខាន។
គួរបញ្ជាក់ដែរថា ការបញ្ចប់ការវាស់វែង និងចុះបញ្ជីដីធ្លីទាំងស្រុងនាពេលនេះ គឺជាការសមិទ្ធផលធំធេង និងជាប្រវត្តិសាស្ត្ររបស់រាជរដ្ឋាភិបាលអាណត្តិទី៧ និងអាចបញ្ចប់នូវវិវាទដីធ្លីរវាងរដ្ឋ និងឯកជន និងរវាងឯកជន និងឯកជន ។ មិនតែប៉ុណ្ណោះ ពលរដ្ឋម្ចាស់ដីធ្លី ក៏នឹងទទួលបានកម្មសិទ្ធិស្របច្បាប់ អាចប្រើប្រាស់ប្លង់កម្មសិទ្ធិសម្រាប់កសាងសេដ្ឋកិច្ចគ្រួសារបានទៀតផងដែរ ៕
Account
Security
Favourite Content