បរទេស ៖ យោងតាមប្រភពព័ត៌មានពី CNA បានរាយការណ៍ថា ឥណ្ឌូនេស៊ី គ្រោងនឹងទិញយន្តហោះចម្បាំង Chengdu J-10C ដែលផលិតឡើងដោយចិនយ៉ាងហោចណាស់ចំនួន ៤២គ្រឿងស្របទៅតាមផែនការនៃការពង្រឹងសមត្ថភាពយោធារបស់ខ្លួន។

កាលពីថ្ងៃពុធ សប្ដាហ៍នេះ មន្ត្រីការពារជាតិកំពូលរបស់ឥណ្ឌូនេស៊ី លោក Sjafrie Sjamsoeddin បានលើកឡើងថា ទីក្រុងហ្សាការតា គ្រោងនឹងទិញយន្តហោះចម្បាំង Chengdu J-10C ដែលផលិតឡើងដោយចិនដើម្បីពង្រឹងសមត្ថភាព និងធ្វើទំនើបកម្មយោធារបស់ខ្លួន។ យ៉ាងណាមិញ Sjamsoeddin ​បានបដិសេធ​មិន​ផ្តល់​ព័ត៌មាន​លម្អិត​បន្ថែម​អំពី​ការ​ទិញ​នេះ​ទេ។ យ៉ាងណាក៏ដោយ ប្រព័ន្ធផ្សព្វផ្សាយក្នុងស្រុករបស់ឥណ្ឌូនេស៊ីបានរាយការណ៍ថា កងកម្លាំងទ័ពអាកាសឥណ្ឌូនេស៊ី នៅតែពិនិត្យទៅលើលក្ខណៈពិសេសរបស់យន្តហោះចម្បាំងដែលផលិតដោយចិន ដើម្បីអាចធានាថា ការទិញរបស់ពួកគេពិតជាអាចពង្រឹងសមត្ថភាពការពារដែនអាកាសរបស់ប្រទេសប្រកបដោយប្រសិទ្ធភាពខ្ពស់។

ដូចទៅនឹងការលើកឡើងរបស់មន្ត្រីការពារជាតិកំពូលខាងលើនេះ កាលពីថ្ងៃពុធដដែល រដ្ឋមន្ត្រីហិរញ្ញវត្ថុ ឥណ្ឌូនេស៊ី លោក Purbaya Yudhi Sadewa បានបញ្ជាក់ថា ក្រសួងបានអនុម័តថវិកាសម្រាប់ទិញយន្តហោះពីប្រទេសចិន ដែលមានតម្លៃសរុបរហូតដល់ជាង ៩ ពាន់លានដុល្លារ ប៉ុន្តែលោកក៏ត្រូវតែពិនិត្យមើលឡើងវិញដែរថា តើនៅនៅក្នុងកិច្ចសន្យា ពេលណាដែលយន្តហោះទាំងនោះអាចមកដល់ទីក្រុងហ្សាការតា?

គួរកត់សម្គាល់ថា ក្រោមការគ្រប់គ្រងរបស់ប្រធានាធិបតី Prabowo Subianto ឥណ្ឌូនេស៊ី ចាប់ផ្ដើមជំរុញការធ្វើទំនើបកម្មទៅលើឧស្សាហកម្មការពារជាតិ ក៏ដូចជាពង្រឹងគុណភាពផ្នែកឃ្លាំងផ្ទុកអាវុធរបស់របស់ខ្លួនផងដែរ។ ជាបទពិសោធន៍ ប្រធានាធិបតីរូបនេះធ្លាប់ធ្វើជារដ្ឋមន្ត្រីការពារជាតិក្នុងឆ្នាំ២០១៩ និងបានធ្វើដំណើរទៅកាន់ប្រទេសជាច្រើនរួមមាន ចិន បារាំង រុស្ស៊ី តួកគី និងសហរដ្ឋអាម៉េរិក ដើម្បីស្វែងយល់ពីការវិវឌ្ឍផ្នែកសព្វាវុធថ្មីៗ ក៏ដូចជានាំយកនូវយុទ្ធសាស្ត្រក្នុងការពង្រឹងសមត្ថភាពការពារទឹកដីរបស់ខ្លួន។

សូមបញ្ជាក់ដែរថា រហូតមកដល់ពេលបច្ចុប្បន្ននេះ កងទ័ពអាកាសឥណ្ឌូនេស៊ី មានយន្តហោះចម្បាំងដែលមានប្រភពមកពីប្រទេសនានាជាច្រើន ដូចជា អាម៉េរិក រុស្ស៊ី និងអង់គ្លេស ខណៈដែលកាលពីពេលកន្លងទៅថ្មីៗនេះ ប្រធានាធិបតីតួកគី លោក Recep Tayyip Erdogan បានប្រកាសពីផែនការនាំចេញយន្តហោះចម្បាំង KAAN ចំនួន ៤៨ គ្រឿងទៅកាន់ឥណ្ឌូនេស៊ី។ ក្រៅពីយន្តហោះចម្បាំងរបស់ប្រទេសតួកគី កាលពីឆ្នាំ២០២៤ កន្លងទៅ ឥណ្ឌូនេស៊ី ក៏ទើបតែសម្រេចកិច្ចព្រមព្រៀងបញ្ជាទិញយន្តហោះចម្បាំងបារាំង Dassault Rafale ចំនួន ៤២ គ្រឿងបន្ថែមទៀត ដោយការដឹកជញ្ជូនលើកដំបូងត្រូវបានរំពឹងថានឹងអាចធ្វើឡើងនៅដើមឆ្នាំ២០២៦។ បន្ថែមពីនេះ ឥណ្ឌូណេស៊ីថែមទាំងបានប្រកាសទិញនាវាមុជទឹកបារាំង Scorpene Evolved ចំនួនពីរគ្រឿង និងរ៉ាដាស្ទាក់ចាប់ Thales ចំនួន ១៣ គ្រឿងផងដែរ។

យ៉ាងណាមិញ អ្នកវិភាគវិស័យការពារជាតិមកពីវិទ្យាស្ថាន ឥណ្ឌូនេស៊ី លោក Beni Sukadis បានបង្ហាញពីក្តីបារម្ភថា ទោះបីជាមិនមាននិន្នាការនយោបាយក៏ដោយ ប៉ុន្តែរដ្ឋាភិបាលមិនគួរមើលស្រាលពីផលប៉ះពាល់ផ្នែកភូមិសាស្ត្រនយោបាយក្រោយពេលសម្រេចចិត្តទិញយន្តហោះចម្បាំងពីប្រទេសចិននោះឡើយ ខណៈដែលជាច្រើនទសវត្សរ៍មកនេះខ្លួនតែងពឹងផ្អែកទៅលើបណ្តាប្រទេសនៅប៉ែកអឺរ៉ុប។ ការបញ្ជាទិញយន្ដហោះចម្បាំងពីប្រទេសចិនក្នុងចំនួនដ៏ច្រើននេះ អាចក្លាយជាចំណុចរស៊ើបដែលគេអាចគិតថា ឥណ្ឌូនេស៊ី កំពុងចង់ងាកទៅចាប់ដៃជាមួយចិន ចំពេលដែលឥទ្ធិពលយោធា និងការទូតចិនកំពុងកើនឡើងនៅក្នុងតំបន់អាស៊ីអាគ្នេយ៍។ មិនត្រឹមតែប៉ុណ្ណោះ វា​អាច​បង្ក​ឱ្យ​មាន​ភាព​រសើប​ក្នុង​តំបន់ ជាពិសេសពាក់ព័ន្ធនឹងជម្លោះសមុទ្រ​ចិន​ខាងត្បូងដែលនៅបន្តមានភាពតានតឹងនៅឡើយ​៕