សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងរយៈពេលប៉ុន្មានឆ្នាំចុងក្រោយនេះ អាជីវកម្មរ៉ែមាសអនាធិបតេយ្យនៅក្នុងប្រទេសកម្ពុជា ជាពិសេសនៅក្នុងខេត្តមណ្ឌលគីរី បានចាប់ផ្ដើមកម្រើកឡើងវិញ បើទោះបីជាក្រសួងរ៉ែ និងថាមពល បានប្រកាសបិទមិនឱ្យធ្វើអាជីវកម្មលើរ៉ែមាសអនាធិបតេយ្យបន្តទៀតក៏ដោយ ។ ក្រសួងរ៉ែ និងថាមពល បានប្រកាសថា នឹងចាត់វិធានការតឹងរ៉ឹង និងធ្ងន់ធ្ងរទៅលើអ្នកដែលធ្វើអាជីវកម្មរ៉ែមាសអនាធិបតេយ្យ ។
យោងតាមសេចក្ដីប្រកាសព័ត៌មានរបស់ក្រសួងរ៉ែ និងថាមពល បានឱ្យដឹងថា ក្រសួងរ៉ែ និងថាមពល បានបន្តចាត់វិធានការបង្ក្រាបសកម្មភាពធ្វើអាជីវកម្មរ៉ែអនាធិបតេយ្យ ស្ថិតនៅក្នុងភូមិសាស្ត្រតំបន់មេសំ ឃុំចុងផ្លាស់ ស្រុកកែវសីមា ខេត្តរតនគីរី។ ការបើកប្រតិបត្តិការបង្ក្រាបនេះ បានចាប់ផ្ដើមអនុវត្តកាលពីថ្ងៃទី៣ ខែវិច្ឆិកា ឆ្នាំ២០២៤ ដែលមានមន្ទីររ៉ែ និងថាមពល ខេត្តមណ្ឌលគីរី ជាសេនាធិការដោយមានកិច្ចសហការជាមួយរដ្ឋបាលខេត្តមណ្ឌលគិរី មន្ទីរបរិស្ថានខេត្ត មន្ទីររៀបចំដែនដី នគរូបនីយកម្ម និងសំណង់ និងសុរិយោដីខេត្ត ក្រោមកិច្ចសម្របសម្រួលរបស់ស្ថាប័នអយ្យការអមសាលាដំបូងខេត្តមណ្ឌលគិរី និងមានការចូលរួមអង្កេតការដោយអង្គភាពប្រឆាំងអំពើពុករលួយ ។
នៅក្នុងសន្និសីទសារព័ត៌មានកាលពីព្រឹកថ្ងៃទី ៦ ខែវិច្ឆិកា ឆ្នាំ២០២៤ នាទីស្ដីក្រសួងរ៉ែ និងថាមពល ឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែបានមានប្រសាសន៍ថា អាជីវកម្មរ៉ែមាសបែបលក្ខណៈគ្រួសារបានកើតឡើងនៅក្នុងតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគីរី តាំងពីឆ្នាំ១៩៨៧មកម្ល៉េះ ដែលមានប្រជាពលរដ្ឋប្រកបរបរជីកយក និងរែងមាសដោយដៃតាមលក្ខណៈគ្រួសារ ។ ប៉ុន្តែនៅប៉ុន្មានឆ្នាំចុងក្រោយនេះ មានការប្រែប្រួលពីលក្ខណៈគ្រួសារដែលធ្វើដោយដៃ និងឧបករណ៍សាមញ្ញ ទៅជាការប្រើគ្រឿងចក្រ រំសេវជាតិផ្ទុះ និងសារធាតុគីមី ដោយមានការជីករូងជាអណ្ដូងរ៉ែក្រោមដី ។
ឯកឧត្តមបានបញ្ជាក់ថា ៖
«ការធ្វើអាជីវកម្មរ៉ែមាសបែបអនាធិបតេយ្យបែបនេះ នឹងបង្កជាហានិភ័យខ្ពស់ចំពោះកម្មកររ៉ែមាស បរិស្ថាន នៅតំបន់ជុំវិញ ដោយកំទេចរ៉ែ និងសារធាតុគីមីចេញពីអណ្ដូងរ៉ែ អាចបង្ករផលប៉ះពាល់ទាំងផ្ទាល់ និងដោយប្រយោលដល់ពលរដ្ឋនៅតំបន់នោះ ។ ដូច្នេះ ដើម្បីទប់ស្កាត់ការធ្វើអាជីវកម្មរ៉ែមាសអនាធិបតេយ្យនេះបន្តទៅទៀត ក្រសួងនឹងដាក់ចេញនូវវិធានការតឹងរ៉ឹង ដោយមិនត្រឹមតែបិទអណ្ដូងរ៉ែប៉ុណ្ណោះទេ តែនឹងឱ្យម្ចាស់អាជីវកម្មជាអ្នកចេញថ្លៃ បិទការដ្ឋានអណ្ដូងរ៉ែ រួចហើយបញ្ជូនម្ចាស់អណ្ដូងរ៉ែទៅកាន់តុលាការទៀតផង ព្រោះថាអាជីវកម្មអណ្ដូងរ៉ែដែលមានប្រើរំសេវបំផ្ទុះយករ៉ែនេះ មិនមានជាពលរដ្ឋសាមញ្ញក្នុងតំបន់នេះធ្វើទេ តែជារបស់អ្នកមានលុយ មានទ្រព្យធន ដែលជួលកម្មករចុះជីកយករ៉ែ និងជួលពលរដ្ឋរ៉ែងមាស»។
ឯកឧត្តម អ៊ឹង អៀង រដ្ឋលេខាធិការក្រសួងរ៉ែ និងថាមពល បានមានប្រសាសន៍ថា ដោយសារតែអណ្ដូងរ៉ែមាសអនាធិបតេយ្យទាំងនេះបង្កផលប៉ះពាល់ធ្ងន់ធ្ងរដល់អាយុជីវិតពលរដ្ឋ កម្មករ និងបរិស្ថាននៅក្នុងតំបន់ជុំវិញនេះ ទើបក្រសួងរ៉ែ និងថាមពល បានដាក់ចេញនូវវិធានការតឹងរ៉ឹងសម្រាប់ជនទាំងឡាយណាដែលធ្វើអាជីវកម្មលើរ៉ែមាស ។
គួរបញ្ជាក់ថា អាជីវកម្មរ៉ែមាសនៅតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគិរី ត្រូវបានក្រសួងសម្រេចបិទបញ្ចប់អាជីវកម្មនេះតាំងពីឆ្នាំ២០១៨មកម្ល៉េះ ដោយសារតែសហគមន៍ចុងផ្លាស់មិនគោរពតាមលក្ខខណ្ឌ និងបានធ្វើសកម្មភាពកាន់តែគ្រោះថ្នាក់ទៅៗដោយការជីកយករ៉ែមាសជម្រៅរហូតដល់ជាង១០០ម៉ែត្រ និងបានប្រើសារធាតុចម្រាញ់យករ៉ែយ៉ាងអនាធិបតេយ្យ ៕
Account
Security
Favourite Content