សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងរយៈពេល ៥ឆ្នាំ គិតចាប់ពីថ្ងៃទី១៥ ខែមិថុនា ឆ្នាំ២០២០ ដល់ថ្ងៃទី៣១ ខែឧសភា ឆ្នាំ២០២៥ ចំនួនពាក្យស្នើសុំចុះបញ្ជីអាជីវកម្មអនុម័តសរុបមានចំនួន ៤៦ ៧៧៦ ក្នុងនោះ ម្ចាស់អាជីវកម្មដែលជាស្រ្តីមានចំនួន ១៧២៤០នាក់។ ទំហំដើមទុនចុះបញ្ជីសរុបប្រហែល ៧៤.៧២ ទ្រីលានរៀល ស្មើនឹងប្រមាណ ១៨.២៣ ពាន់លានដុល្លារអាម៉េរិក។ នេះបើយោងតាមសេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះ។
យោងតាមប្រភពដដែលបានឱ្យដឹងថា កម្មវត្ថុអាជីវកម្ម ៦ ដែលទទួលបានទុនវិនិយោគច្រើនជាងគេ គឺ ៖ ទី១-សកម្មភាពសេវាកម្មស្នាក់នៅប្រហែល ៦.៣៨ ទ្រីលានរៀល ស្មើប្រមាណ១.៥៦ ពាន់លានដុល្លារអាម៉េរិក) ទី២- សកម្មភាពអចលនទ្រព្យ ដោយប្រើអចលនទ្រព្យផ្ទាល់ខ្លួន ឬ ជួលពីគេប្រហែល ៦.០០ ទ្រីលានរៀល ស្មើប្រមាណ ១.៤៦ ពាន់លានដុល្លារអាម៉េរិក ទី៣-ការសាងសង់អគារប្រហែល ៥.៨៤ ទ្រីលានរៀល ស្មើប្រមាណ ១.៤២ ពាន់លានដុល្លារអាម៉េរិក ទី៤-កម្មន្តសាលសម្លៀកបំពាក់ លើកលែងសម្លៀកបំពាក់ធ្វើពីរោមសត្វប្រហែល៣.៦៦ទ្រីលានរៀល ស្មើប្រមាណ ៨៩២ លានដុល្លារអាម៉េរិក, ទី៥-សកម្មភាពពិគ្រោះយោបល់ផ្នែកគ្រប់គ្រងប្រមាណ ៣.៦៣ទ្រីលាន ស្មើប្រមាណ ៨៨៤ លានដុល្លារអាម៉េរិក និង ទី៦-កម្មវត្ថុអាជីវកម្មផ្សេងទៀតប្រមាណ ៤៩.២២ ទ្រីលានរៀលស្មើប្រមាណ ១២.០១ ពាន់លានដុល្លារអាម៉េរិក។
ប្រភពពីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា៖ គិតត្រឹមថ្ងៃទី១៥ ខែមិថុនា ឆ្នាំ២០២៥ ប្រព័ន្ធចុះបញ្ជីអាជីវកម្មតាមថ្នាលឌីជីថល ឬបច្ចេកវិទ្យាព័ត៌មាន (ប្រព័ន្ធ Online Business Registration Service-OBR) ត្រូវបានដាក់ឱ្យប្រើប្រាស់ជាផ្លូវការបានរយៈពេល ៥ឆ្នាំមកហើយ។ ប្រព័ន្ធនេះ បានជួយសម្រួលដល់នីតិវិធីនៃការចុះបញ្ជីអាជីវកម្មរបស់ធុរជន រួមទាំងបានចូលរួមចំណែកក្នុងការលើកកម្ពស់បរិយាកាសធុរកិច្ច និងសេដ្ឋកិច្ចឌីជីថលក្នុងប្រទេសកម្ពុជាផងដែរ។ ប្រព័ន្ធ OBR ក៏បានបន្តពង្រឹង និងពង្រីកការដ្ឋានជាបន្តបន្ទាប់ ដែលគ្របដណ្ដប់ដល់សេវាអេឡិចត្រូនិកសម្រាប់ធុរកិច្ច (E-Services for Business-ESB) ជាច្រើនទៀត។
ប្រព័ន្ធ OBR ដែលត្រូវបានដាក់ឱ្យប្រើប្រាស់ជាផ្លូវការលើកដំបូងកាលពីថ្ងៃទី១៥ ខែមិថុនា ឆ្នាំ២០២០ ជាការចុះបញ្ជីជាខ្សែច្រវ៉ាក់(Single Portal)ដោយធុរជនអាចស្នើសុំចុះបញ្ជីអាជីវកម្មជាកញ្ចប់រួមមានជាមួយនឹងការចុះបញ្ជីពាណិជ្ជកម្មដោយក្រសួងពាណិជ្ជកម្ម, ការរៀបចំបញ្ជីពន្ធដារដោយអគ្គនាយកដ្ឋានពន្ធដារ និងការប្រកាសសេចក្ដីជូនដំណឹងបើកសហគ្រាសដោយក្រសួងការងារ និងបណ្ដុះបណ្ដាលវិជ្ជាជីវៈតែម្ដង (ហើយកាលពីពាក់កណ្ដាលឆ្នាំ២០២៣ ប្រព័ន្ធបានបន្ថែមការចុះបញ្ជីកាសហគ្រាស-គ្រឹះស្ថានដោយបេឡាជាតិសន្តិសុខសង្គមមួយទៀត)។ ប្រព័ន្ធនេះបានផ្ដល់អត្ថប្រយោជន៍ជាច្រើនដល់ធុរជន ដោយកាត់បន្ថយនីតិវិធី ពេលវេលា និងកម្រៃសេវាមួយចំនួនផងដែរ ហើយអនុញ្ញាតឱ្យអ្នកស្នើសុំចុះបញ្ជីអាជីវកម្មបានដោយជោគជ័យក្នុងរយៈពេលត្រឹមតែ ៨ថ្ងៃនៃថ្ងៃធ្វើការ ប្រសិនបើអ្នកស្នើសុំបានផ្ដល់ព័ត៌មាន និងឯកសារភ្ជាប់ត្រឹមត្រូវ និងពេញលេញ។ ការរៀបចំប្រព័ន្ធនេះ ត្រូវបានពង្រីកបន្ថែមជាបន្តបន្ទាប់ ដោយគ្របដណ្ដប់ដល់ការស្នើសុំអាជ្ញាបណ្ណ វិញ្ញាបនបត្រ និងលិខិតអនុញ្ញាតជំនាញពីក្រសួង-ស្ថាប័នពាក់ព័ន្ធ ដែលរហូតមកដល់បច្ចុប្បន្ន មានក្រសួង ស្ថាប័នចំនួន ២១ ចូលរួម និងបានបញ្ចូលសេវាសាធារណៈគោលចំនួន ៣៣ មកក្នុងប្រព័ន្ធអេកូឡូស៊ីនៃការផ្ដល់សេវាសាធារណៈសម្រាប់ធុរកិច្ច៕
Account
Security
Favourite Content