ភ្នំពេញ៖ យោងតាមស្ថិតិទេសចរណ៍ក្នុងរយៈពេល១១ខែ ឆ្នាំ២០២៥ នេះ កម្ពុជា ទទួលបានភ្ញៀវទេសចរអន្តរជាតិសរុបជិត ៥,២ លាននាក់ ដែលក្នុងនោះ ភ្ញៀវទេសចរមកពីចិន មានចំនួនច្រើនជាង ១,១ (មួយលានមួយសែន) នាក់ កើនឡើងជិត៤៤% ធៀបនឹងរយៈពេលដូចគ្នាក្នុងឆ្នាំ២០២៤។

ជាមួយនឹងការទទួលបានកំណើនដូចបានបង្ហាញជូនខាងលើនេះ ក្រសួងទេសចរណ៍កម្ពុជាបានបង្ហាញពីក្ដីរំពឹងថា ទេសចរចិននឹងមកកម្សាន្តនៅកម្ពុជាកាន់តែច្រើនបន្ថែមទៀតក្រោយពេលអនុវត្តសាកល្បងលើការលើកលែងទិដ្ឋការ (VISA) ក្នុងរដូវកាលបៃតងឆ្នាំ២០២៦ខាងមុខ (ចាប់​ពី​ខែឧសភា ដល់ខែតុលា)។ ការលើកលែងទិដ្ឋាការចំពោះពលរដ្ឋចិនក្នុងរយៈពេល៤ខែ នៅឆ្នាំ២០២៦ គឺជាលទ្ធផលជាប្រវត្តិសាស្ត្រ នៅក្នុងក្របខណ្ឌឆ្នាំទេសចរណ៍កម្ពុជា-ចិន ២០២៥-​២០២៦ ដែលអាចជួយទ្រទ្រង់សេដ្ឋកិច្ចជាតិកម្ពុជាឱ្យកាន់តែមានសន្ទុះងើបឡើងវិញ។

បន្ថែមពីនេះ ក្នុងគោលបំណងទាក់ទាញទេសចរ និងការវិនិយោគលើវិស័យទេសចរណ៍ កម្ពុជា បានរៀបចំ «វេទិកាជំនួបផ្គូផ្គងធុរកិច្ចទេសចរណ៍អន្តរជាតិ កម្ពុជា-ចិន» កាលពីរសៀលថ្ងៃទី​២០ ​ខែធ្នូ ឆ្នាំ២០២៥ នៅសណ្ឋាគារសុខា រ៉េស៊ីដង់​ រាជធានីភ្នំពេញ ដោយមានប្រមាណ ៦៣ក្រុមហ៊ុនទេសចរណ៍ធំៗចូលរួម ក្នុងនោះរួមមានពីខេត្តក្រុង១៤ និងរដ្ឋធានីប៉េកាំងនៃប្រទេសចិន ប្រទេសម៉ាឡេស៊ី និងប្រទេស​វៀតណាម ហើយអ្នកលក់សេវាដែលជាការីទេសចរណ៍កម្ពុជាធំៗ មានជាង ៧៥​ក្រុមហ៊ុន​ រាប់ចាប់ពីក្រុមហ៊ុនអាកាសចរណ៍ជាតិ Air Cambodia និងសណ្ឋាគារម៉ាកអន្តរជាតិល្បីៗជាច្រើន ជាមួយ​នឹងការរំពឹងទុកលើលទ្ធផលចុះកិច្ចសន្យាទិញកញ្ចប់ទស្សនកិច្ចចាប់ពី ៧៥%ឡើងទៅ។

ក្នុងឱកាសនោះ ឯកឧត្តម ហួត ហាក់ បានថ្លែងថា៖ កម្ពុជា ត្រូវតែត្រៀមលក្ខណសម្បត្តិឱ្យគ្រប់គ្រាន់ និងរួចរាល់ក្នុងការទទួលស្វាគមន៍ការត្រលប់មកវិញនូវភ្ញៀវទេសចរ និងវិនិយោគិនចិន តាមរយៈការសម្រួលបរិយាកាសទទួលបដិសណ្ឋារកិច្ចដល់ភ្ញៀវទេសចរ និងវិនិយោគិនរបស់មិត្តចិននៅកម្ពុជា ជាពិសេសលើការលើកលែងទិដ្ឋាការដល់ប្រជាជនចិនដែលធ្វើដំណើរមកកាន់ប្រទេសកម្ពុជា អាចស្នាក់នៅកម្ពុជាបានចំនួន១៤ថ្ងៃ ក្នុងដំណាក់កាលសាកល្បងដំបូង ដែលមានរយៈពេល ៤ខែ គិតចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ក្នុងរដូវកាលបៃតងខាងមុខ។ តាមន័យនេះ ក្នុងរយៈពេល៤ខែខាងលើ ប្រជាជនចិនទាំងអស់ដែលកាន់លិខិតឆ្លងដែនសញ្ជាតិចិន ធ្វើដំណើរផ្ទាល់ពីប្រទេសចិន ឬ ពីប្រទេសដទៃផ្សេងទៀត អាចមកកម្ពុជាដោយពុំចាំបាច់មានការស្នើសុំទិដ្ឋាការជាមុន និងពុំមានបង់កម្រៃអ្វីឡើយ គឺតម្រូវឱ្យបំពេញត្រឹមតែ E-arrival card ប៉ុណ្ណោះ។ 

ជាមួយគ្នានេះ ឯកឧត្តមរដ្ឋមន្រ្តី ក៏បានស្នើគ្រប់ភាគីទាំងអស់ ត្រូវបន្តជួយផ្សព្វផ្សាយសក្តានុពលទេសចរណ៍កម្ពុជា កាលានុវត្តភាពវិនិយោគ ពិសេសគឺការលើកលែងទិដ្ឋាការដល់ប្រជាជនចិននាឆ្នាំ២០២៦ ខាងមុខនេះឱ្យបានទូលំទូលាយ និងដល់ភ្ញៀវទេសចររបស់ក្រុមហ៊ុន ដើម្បីបង្កើនចំនួនភ្ញៀវទេសចិនមកទស្សនាកម្ពុជាឱ្យកាន់តែច្រើនឡើងបន្ថែមទៀត៕