បរទេស ៖ ការសម្រេចចិត្តដំឡើងពន្ធដ៏ធ្ងន់ធ្ងរជាមួយមហាយក្សចិន និងគោលនយោបាយថ្មីៗរបស់រដ្ឋាភិបាលក្រុងវ៉ាស៊ិនតោនកំពុងធ្វើឲ្យមានការរំខានយ៉ាងខ្លាំងដល់ប្រតិបត្តិការជួញដូរនៃក្រុមហ៊ុនបច្ចេកវិទ្យាបន្ទះឈីបដ៏ល្បីរបស់អាមេរិក Nvidia ដោយភ្លាមៗនោះ ស្ថាបនិកលោក Jensen Huang ត្រូវបានគេរាយការណ៍ថាបានធ្វើដំណើរទៅដល់ទីក្រុងប៉េកាំងហើយនៅសប្តាហ៍នេះដើម្បីរៀបចំផែនការដោះស្រាយបញ្ហាឧបសគ្គទាំងនេះ។

កាសែតញូវយ៉កថាម New York Times បានសរសេរថា អាមេរិកមានគោលដៅសំខាន់មួយក្នុងចំណោមគោលដៅផ្សេងទៀតដែលត្រូវតែដំឡើងពន្ធគយទាំងនេះ។ អាមេរិកសង្ឃឹមថាវានឹងអាចក្លាយជារបាំងដ៏មានប្រសិទ្ធភាពក្នុងការរារាំងមិនឲ្យ Nvidia អាចនាំចេញបន្ទះឈីបទំនើបម៉ូដេល H20 ទៅកាន់ប្រទេសចិនទៀតឡើយខណៈដែលរដ្ឋាភិបាលក្រុងប៉េកាំងបានចាត់ទុកថាផលិតផលបច្ចេកវិទ្យានេះគឺជាយុទ្ធសាស្ត្រស្នូលក្នុងការអភិវឌ្ឍបច្ចេកវិទ្យា និងប្រកួតប្រជែងទីផ្សារបច្ចុប្បន្ន។

បច្ចុប្បន្ន ក្រុមហ៊ុន Nvidia កំពុងរងការចោទប្រកាន់ និងស្ថិតនៅក្រោមការស៊ើបអង្កេតយ៉ាងតឹងរ៉ឹងពីសំណាក់សភាអាមេរិកចំពោះប្រតិបត្តិការចែកចាយ និងលក់បន្ទះឈីបរបស់ខ្លួននៅទូទាំងទីផ្សារអាស៊ីដែលក្នុងនោះផ្តោតសំខាន់ទៅលើទំនាក់ទំនងពាណិជ្ជកម្មជាមួយនឹងក្រុមហ៊ុនបច្ចេកវិទ្យា​ AI ថ្មីរបស់ចិនគឺ DeepSeek ដែលគាំទ្រដោយរដ្ឋាភិបាលក្រុងប៉េកាំង។ កន្លងមកអាមេរិកថែមទាំងបានរកឃើញថា DeepSeek បានស្តុកទុកបន្ទះឈីបទំនើបរបស់ Nvidia ក្នុងចំនួនដល់ទៅរាប់ពាន់គ្រឿងទៀតផង។

ការអនុវត្តគោលការណ៍ពាណិជ្ជកម្មថ្មីរបស់អាមេរិកភ្លាមៗបែបនេះបានបណ្តាលឲ្យផែនការរកប្រាក់ចំណេញរបស់ Nvidia ខាតបង់ដល់ទៅ ៥,៥ពាន់លានដុល្លារ ហើយភាគហ៊ុនរបស់ Nvidia បានបន្តធ្លាក់ចុះ ៧ភាគរយកាលពីថ្ងៃពុធ និង ៣ភាគរយទៀតនៅថ្ងៃព្រហស្បតិ៍សប្តាហ៍នេះ។

យ៉ាងណាក្តី ដំណើរទស្សនកិច្ចរបស់លោក Huang មកដល់ទីក្រុងប៉េកាំង ស្ថាបនិករូបនេះបានជួបជាមួយនឹងមន្ត្រីតំណាងរបស់រដ្ឋាភិបាលចិនទទួលបន្ទុកកិច្ចការងារផ្សព្វផ្សាយពាណិជ្ជកម្មអន្តរជាតិជាច្រើននាក់ និងបានធ្វើការប្តេជ្ញាចិត្តយ៉ាងខ្លាំងចំពោះទីផ្សារប្រទេសចិនដោយអះអាងថានឹងបន្តធ្វើការផ្គត់ផ្គង់ដែលអនុលោមទៅទាំងលក្ខខណ្ឌជាក់ស្តែងក្នុងគ្រាដ៏លំបាកនេះ។

គួរឲ្យដឹងដែរថា ទីផ្សារចិនកាលពីឆ្នាំកន្លងទៅបានបញ្ជាទិញបន្ទះឈីបរបស់ Nvidia ដែលមានតម្លៃដល់ទៅ ១៧ពាន់លានដុល្លារ ឬត្រូវជា១៩ភាគរយនៃប្រាក់ចំណូលសរុបរបស់ក្រុមហ៊ុន ដូច្នេះក្នុងតំណាក់កាលនេះ ដំណើរទស្សនកិច្ចរបស់លោក Huang គឺត្រូវធ្វើឡើងដោយមានភាពប្រុងប្រយ័ត្នបំផុតដើម្បីអាចគេចចេញពីការចោទប្រកាន់បន្ថែមដោយអាមេរិក ប៉ុន្តែក៏មិនអាចបោះបង់ចោលទីផ្សារដែលមានតម្លៃរាប់ពាន់លានដុល្លារមួយនេះនោះទេ៕