សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ពិធីបុណ្យចូលឆ្នាំថ្មីរយៈពេល ៣ថ្ងៃ កន្លងទៅនេះ នៅតាមបណ្តាខេត្ត ក្រុង និងរាជធានី បានរៀបចំ «សង្ក្រាន្តឆ្នាំថ្មី» រាប់ទាំងនៅតាមតំបន់រមណីយដ្ឋាន និងទេសចរណ៍នានា ជាពិសេសព្រឹត្តិការណ៍អង្គរសង្ក្រាន្តនៅខេត្តសៀមរាប បានផ្តល់ផលប្រយោជន៍ដល់កំណើនសេដ្ឋកិច្ចរបស់ប្រទេសកម្ពុជា និងវិស័យទេសចរណ៍បានមួយចំណែកធំ ពោលគឺទទួលបានចំនួនទេសចរជាតិ និងអន្តរជាតិសរុបប្រមាណជិត២៤លាននាក់ចេញដើរកម្សាន្ត ដែលក្នុងនោះមានរាជធានី ខេត្តចំនួន៥ មានចំនួនទេសចរច្រើនលើសគេ។ ចំនួននេះបានកើនឡើង ៩,៩% ធៀបនឹងឆ្នាំ២០២៤ (ដែលមានចំនួន ២១.៨១៣.១៣៨ នាក់) ដោយភ្ញៀវជាតិមានចំនួន ២៣.៨៦២.៣៥១ នាក់ និងភ្ញៀវអន្តរជាតិមានចំនួន ១១៥.០៩០ នាក់។
ក្នុងចំណោមបណ្ដាខេត្តដែលប្រារព្ធព្រឹត្តិការណ៍សង្ក្រាន្តដើម្បីអបអរឆ្នាំថ្មីរយៈពេល៣ថ្ងៃនេះ គេសង្គេតឃើញខេត្តចំនួន៥ ដែលមានកំណើនទេសចរច្រើនជាងគេ គឺខេត្តសៀមរាប រាធានីភ្នំពេញ ខេត្តកំពង់ចាម ខេត្តព្រៃវែង និងខេត្តបាត់ដំបង។ ក្នុងនោះ រាជធានីភ្នំពេញឈរនៅលេខរៀងទី១ ដោយទទួលបានភ្ញៀវទេសចរចំនួន ២.៨៦៣.៩២២ នាក់ បន្តដោយខេត្តសៀមរាបចំនួន ២.៧៥២.៨១៨ នាក់ ខេត្តកំពង់ចាមចំនួន ២.៧៤៨.២២៨ នាក់ ខេត្តព្រៃវែងចំនួន ខេត្តព្រៃវែង ២.៣៩៤.៣៤៣ នាក់ និងចុងក្រោយគេគឺខេត្តបាត់ដំបង ដែលទទួលបានភ្ញៀវចំនួន ១.៧៤១.៧៩៥ នាក់។
មូលហេតុនៃការចូលទស្សនានៅតាមបណ្ដារាជធានីខេត្តយ៉ាងកុះករបែបនេះ ក៏ដោយសារតែតាមទីតាំងនីមួយបានរៀបចំនូវព្រឹត្តិការណ៍សង្ក្រាន្ត ដូចជា៖ រាជធានីភ្នំពេញ មានការរៀបចំព្រឹត្តិការណ៍សង្រ្កាន្តវត្តភ្នំ (តំបន់ទឹកអម្រឹត) និងការលេងកម្សាន្តនៅតាមផ្លូវថ្មើរជើងមាត់ទន្លេ។ ខេត្តសៀមរាបមានការរៀបចំមហាព្រឹត្តិការណ៍អង្គរសង្រ្កាន្ត ខេត្តកំពង់ចាមមានការរៀបចំព្រឹត្តិការណ៍សង្រ្កាន្តកំពង់ចាម និងការតាំងបង្ហាញលៀសហាល ៣តានប្រវែង១ពាន់ម៉ែត្រ។ រីឯខេត្តព្រៃវែង មានការរៀបចំព្រឹត្តិការណ៍សង្រ្កាន្តព្រៃវែង និងខេត្តបាត់ដំបងមានការរៀបចំព្រឹត្តិការណ៍សង្រ្កាន្តបាត់ដំបងជាដើម ដោយមានតាំងលម្អរភ្លើងពណ៌នៅតាមដងផ្លូវ តាមមាត់ស្ទឹងយ៉ាងស្រស់ស្អាត។
ទន្ទឹមនឹងនេះ បណ្តាខេត្តផ្សេងៗ ក៏បានរៀបចំឱ្យមានកម្មវិធីសង្រ្កាន្តឆ្នាំថ្មីដូចគ្នា ពិសេសនៅតាមទីប្រជុំជនទីរួមខេត្ត ទីរួមស្រុក តំបន់គោលដៅទេសចរណ៍សំខាន់ៗ វត្តអារាម និងនៅតាមស្រុកភូមិនានា ដែលបានទាក់ទាញឱ្យភ្ញៀវទេសចរ និងបងប្អូនប្រជាពលរដ្ឋដើរកម្សាន្តយ៉ាងច្រើនកុះករ។ ចរន្តភ្ញៀវទេសចរដ៏ច្រើននេះ បានបង្កើតជាផលប្រយោជន៍ដល់សេដ្ឋកិច្ចដ៏ច្រើនទាំងនៅថ្នាក់ជាតិ និងនៅតាមមូលដ្ឋាន។
ជាក់ស្ដែង បើយោងតាមក្រសួងទេសចរណ៍ បណ្តាសណ្ឋាគារ និងសេវាស្នាក់នៅទេសចរណ៍ ភោជនីយដ្ឋាន និងអាហារដ្ឋាន និងរមណីយដ្ឋានទេសចរណ៍នៅស្ទើរគ្រប់ខេត្ត គឺបានទទួលភ្ញៀវស្ទើរពេញ ១០០% តែម្ដង។
ថ្លែងក្នុងពិធីបើកព្រឹត្តិការណ៍អង្គរសង្ក្រាន្តនៅក្នុងខេត្តសៀមរាប កាលពីពេលកន្លងទៅថ្មីៗនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យដឹងថា ព្រឹត្តិការណ៍សង្ក្រាន្ដបានក្លាយទៅជាកត្តាជំរុញដ៏សំខាន់ ដើម្បីទាក់ទាញទេសចរមកទស្សនាកម្ពុជា និងបង្កើតសេដ្ឋកិច្ចនៅតាមមូលដ្ឋាន។
សម្តេចធិបតី ហ៊ុន ម៉ាណែត បានបន្តថ្លែងផងដែរថា៖ ការរៀបចំអង្គរសង្រ្កាន្ត មិនត្រឹមតែផ្សព្វផ្សាយឱ្យឃើញតែភាពសប្បាយរីករាយ សុខសុវត្ថិភាពតែនៅសៀមរាបនោះទេ គឺនៅទូទាំងព្រះរាជាណាចក្រកម្ពុជា ដែលនេះជាការផ្សព្វផ្សាយពីភាពវិជ្ជមាន និងទាក់ទាញភ្ញៀវទេសចរមកកម្ពុជាបន្ថែមទៀត។ ផ្សព្វផ្សាយល្អពីកម្ពុជា ដើម្បីកម្ពុជាទាំងអស់គ្នា៕
Account
Security
Favourite Content