សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កម្មវិធីពន្លឿនអាជីវកម្មកសិកម្មឌីជីថល ត្រូវបានធ្វើឡើងអស់មួយរដូវកាលហើយ និងកំពុងតែចាប់ផ្ដើមអនុវត្តសម្រាប់រដូវកាលទី២បន្តទៀត។ កម្មវិធីនេះ បានផ្ដល់ឱកាសដល់ម្ចាស់អាជីវកម្មក្នុងវិស័យកសិកម្មទាំងឡាយណាដែលប្រើប្រាស់គំនិតនវានុវត្តន៍ និងចង់បានជំនួយហិរញ្ញប្បទានសម្រាប់ដំណើរការអាជីវកម្មនោះ។ ជាមួយគ្នានេះ កម្មវិធីក៏បានលើកទឹកចិត្តដល់ធុរជនដែលមានបច្ចេកវិទ្យាល្អៗ ដើម្បីចូលរួមពង្រឹងសង្វាក់ផលិតកម្មនៃវិស័យកសិកម្មជារួមផងដែរ។
ក្នុងឱកាសពិធីសម្ពោធកម្មវិធីពន្លឿនអាជីវកម្មកសិកម្មឌីជីថល (SAAMBAT) រដូវកាលទី២ កាលពីថ្ងៃដើមសប្ដាហ៍កន្លងទៅ ឯកឧត្តមបណ្ឌិត តាំង ងួនលី នាយកប្រតិបត្តិនៃមជ្ឈមណ្ឌលបណ្ដុះធុរកិច្ចថ្មី «តេជោ» បានថ្លែងថា គម្រោងនេះនឹងបន្តផ្ដល់ហិរញ្ញប្បទានដល់អាជីវកម្មណាដែលផ្ដល់នូវគំនិតអភិវឌ្ឍន៍ថ្មីៗលើវិស័យកសិកម្ម។
ឯកឧត្តមបណ្ឌិតបន្តថា ៖
«យើងចង់ផ្សារភ្ជាប់កសិកម្មប្រពៃណីជាមួយនឹងបច្ចេកវិទ្យា ដើម្បីជំរុញសង្វាក់ផលិតកម្មយើងឱ្យកាន់តែរីកធំធាត់ឡើង ឈានទៅធានាបាននូវសន្តិសុខស្បៀង»។
ក្នុងរដូវកាលទី១កន្លងទៅ កម្មវិធីខាងលើបានផ្ដល់ហិរញ្ញប្បទានដល់ក្រុមជ័យលាភីចំនួន ៤ក្រុម ដែលពួកគេសុទ្ធសឹងតែជាម្ចាស់អាជីវកម្មកសិកម្មឌីជីថល។ តួយ៉ាងដូចជា អាជីវកម្មប្រើប្រាស់ប្រព័ន្ធស្រោចស្រពដំណាំតាមទូរស័ព្ទដៃ និងអាជីវកម្មបង្កើតកម្មវិធី (App) ដាំដុះជាដើម។ មិនត្រឹមតែប៉ុណ្ណោះ អាជីវកម្មជាប់ជ័យលាភីទាំង៤ក្រុម ក៏បានប្រើប្រាស់កញ្ចប់របស់គម្រោងក្នុងការចុះទៅតាមតំបន់មូលដ្ឋាន ដើម្បីបណ្ដុះបណ្ដាលប្រជាកសិករឱ្យចេះប្រើប្រាស់បច្ចេកវិទ្យាសម្រាប់បម្រើឱ្យវិស័យកសិកម្មផងដែរ។
លោក គួង វុត្ថា អ្នកសម្របសម្រួលផ្នែកបច្ចេកវិទ្យាឌីជីថលនៃអនុសមាសភាគ ២.២ នៃមជ្ឈមណ្ឌលបណ្ដុះបណ្ដាលធុរកិច្ចថ្មីតេជោ ក៏បានរៀបរាប់ផងដែរថា ក្នុងការអនុវត្តកម្មវិធីទាំងរដូវកាលទី១ និងទី២នេះ គឺមានគោលដៅបញ្ច្រាបការបណ្ដុះបណ្ដាលឱ្យទៅដល់ប្រជាកសិករចំនួន ១២ ៥០០នាក់ នៅទូទាំងប្រទេស។
មិនត្រឹមតែប៉ុណ្ណោះ កម្មវិធីពន្លឿនអាជីវកម្មកសិកម្មឌីជីថល ដើរស្របទៅនឹងយុទ្ធសាស្ត្របញ្ចកោណរបស់រាជរដ្ឋាភិបាលដំណាក់កាលទី១ ដែលផ្ដោតលើ “ការអភិវឌ្ឍសេដ្ឋកិច្ច និងសង្គមឌីជីថល” ដោយរួមមានកិច្ចការអាទិភាពចំនួន ៥។
ក្នុងនោះ មុំទី២ គឺផ្តោតលើការអភិវឌ្ឍ សេដ្ឋកិច្ច និងធុរកិច្ចឌីជីថល ពាណិជ្ជកម្មតាមប្រព័ន្ធអេឡិចត្រូនិក និងប្រព័ន្ធនវានុវត្តន៍ឌីជីថលតាមរយៈការជំរុញការធ្វើបរិវត្តកម្មឌីជីថលក្នុងវិស័យសេដ្ឋកិច្ច ការបង្កើតធុរកិច្ចឌីជីថលថ្មី ការជំរុញការធ្វើបរិវត្តកម្មឌីជីថលសហគ្រាស ការជំរុញការអភិវឌ្ឍខ្សែច្រវាក់ឌីជីថល និងការជំរុញការកសាង និងការអភិវឌ្ឍប្រព័ន្ធនវានុវត្តន៍ឌីជីថលដើម្បីសម្រួលធុរកិច្ច ក៏ដូចជាជំរុញសន្ទុះកំណើនសេដ្ឋកិច្ច ។
គួរបញ្ជាក់ថា កម្មវិធីពន្លឿនអាជីវកម្មកសិកម្មឌីជីថល (SAAMBAT) ស្ថិតក្រោមការគាំទ្រពីក្រសួងអភិវឌ្ឍន៍ជនបទ ក្នុងគោលបំណងពង្រឹង និងពង្រីកសង្វាក់ផលិតកម្ម ហើយមានក្រសួងសេដ្ឋកិច្ចជាអ្នកអនុវត្តដោយផ្ដោតសំខាន់លើការបង្កើនជំនាញ បច្ចេកវិទ្យា និងសហគ្រិនភាព៕
Account
Security
Favourite Content