បរទេស ៖ កាលពីថ្ងៃពុធម្សិលមិញនេះ ប្រធានាធិបតីកូរ៉េខាងត្បុងថ្មីដែលទើបតែបានឈ្នះឆ្នោត លោក Lee Jae Myung បានឡើងធ្វើសច្ចាប្រណិធានជាផ្លូវការនៅចំពោះមុខរដ្ឋសភាជាតិ។

លោក Lee ដែលត្រូវបានគេស្គាល់ជាយូរមកហើយថាជាអ្នកនយោបាយដែលកើតចេញពីត្រកូលអ្នកមានជីវភាពក្រលំបាកកាលពីនៅកុមារនោះ គឺតែងតែប្តេជ្ញាចិត្តជានិច្ចចំពោះអ្នកគាំទ្រ និងពលរដ្ឋកូរ៉េខាងត្បូងថា លោកនឹងប្រយុទ្ធប្រឆាំងឲ្យខាងតែបាននូវបញ្ហាវិសមភាពសង្គម និងបញ្ហាអំពើពុករលួយនៅក្នុងប្រទេស។

សូមរំលឹកដែរថា អាណត្តិ ៥ ឆ្នាំរបស់លោក Lee បានចាប់ផ្តើមភ្លាមនៅថ្ងៃពុធសប្ដាហ៍នេះ ពោលគឺត្រឹមតែប៉ុន្មានម៉ោងប៉ុណ្ណោះនៅពេលដែលលទ្ធផលនៃការបោះឆ្នោតជាបន្ទាន់មួយត្រូវបានធ្វើឡើងនៅក្នុងប្រទេសកូរ៉េខាងត្បូង។ ការបោះឆ្នោតដែលធ្វើឡើងភ្លាមៗក្រោយពេលដែលមានការទម្លាក់តំណែងលោក Yoon Suk Yeol កាលពីខែមេសា និងបន្ទាប់ពីអតីតមេដឹកនាំរូបនេះបានបង្កើតភាពចលាចលនៅក្នុងប្រទេសតាមរយៈការដាក់ចេញនូវច្បាប់អាជ្ញាសឹកកាលពីចុងឆ្នាំ២០២៤ ទាំងគួរឲ្យភ្ញាក់ផ្អើល ប៉ុន្តែមិនទទួលបានជោគជ័យនោះឡើយ។

នៅក្នុងសេចក្តីថ្លែងការណ៍នាពិធីឡើងកាន់តំណែង លោក Lee ត្រូវបានគេមើលឃើញថា នឹងត្រូវដាក់អាទិភាពក្នុងការដោះស្រាយបញ្ហានយោបាយធំៗចំនួន៣ ដែលក្នុងនោះរួមមានទាំងការធ្វើឲ្យប្រសើរឡើងវិញនៃគោលនយោបាយទំនាក់ទំនងជាមួយនឹងសម្ព័ន្ធមិត្តដែលមានអាម៉េរិក និងជប៉ុនផងដែរ រួមនឹងគោលនយោបាយធ្វើឲ្យល្អឡើងវិញនូវទំនាក់ទំនងជាមួយនឹងប្រទេសបងប្អូនកូរ៉េខាងជើងដែលបានជាប់គាំងតាំងពីឆ្នាំ២០១៩ ជាពិសេសបញ្ហានយោបាយក្នុងស្រុកដែលជួបបញ្ហាតាំងតែពីចុងឆ្នាំ២០២៤មកនោះផង។

ចំពោះមុខ បញ្ហាដំបូងអំពីប្រទេសកូរ៉េខាងជើង លោក Lee បានលើកឡើងបែបនេះថា៖ រដ្ឋាភិបាលរបស់លោកនឹងរៀបចំផែនការដើម្បីទប់ទល់នឹងការគំរាមកំហែងពីកម្មវិធីអាវុធនុយក្លេអ៊ែររបស់កូរ៉េខាងជើងតាមរយៈការត្រៀមខ្លួនរារាំងដ៏ខ្លាំងក្លាដោយផ្អែកលើសម្ព័ន្ធមិត្តរឹងមាំជាមួយនឹងសហរដ្ឋអាម៉េរិក។ ប៉ុន្តែយ៉ាងណាក្តី លោកបានបង្ហើបថា កូរ៉េខាងត្បូង នឹងនៅតែបើកទ្វារសម្រាប់ការបង្កើតច្រកទាក់ទងគ្នាឡើងវិញជាមួយនឹងកូរ៉េខាងជើងដោយសង្ឃឹមថាសន្តិភាពសម្រាប់ឧបទ្វីបកូរ៉េនៅតែអាចកើតមានឡើងទៅរួច។

យ៉ាងណាក្តី នៅមិនទាន់មានភាពច្បាស់លាស់នៅឡើយទេថា តើលទ្ធផលបោះឆ្នោតលើកនេះនឹងអាចជះឥទ្ធិពលកម្រិតណាដល់គោលនយោបាយការបរទេសរបស់ទីក្រុងសេអ៊ូល ពីព្រោះថា កន្លងមកលោក Lee តែងតែទទួលបាននូវការរិះគន់ថា ជាបុគ្គលដែលមិនសូវមានទំនោរទៅកាន់អាម៉េរិក និងជប៉ុននោះឡើយ ប៉ុន្តែ ហាក់មានបំណងចង់ជិតស្និទ្ធជាមួយចិន និងកូរ៉េខាងជើងទៅវិញ។ ចំពោះបញ្ហាគោលនយោបាយជាមួយនឹងសម្ព័ន្ធមិត្តអាម៉េរិក និងជប៉ុន លោក Lee បានប្តេជ្ញាម្តងហើយម្តងទៀតនៅក្នងសភាថា នឹងចាប់ផ្តើមធ្វើឲ្យល្អប្រសើរ និងមានភាពរឹងម៉ាំឡើងវិញនៃកិច្ចសហប្រតិបត្តិការត្រីភាគី ហើយធ្វើឲ្យវិបត្តិនានាដែលកំពុងកើតមានឡើងក្លាយទៅជាឱកាសសម្រាប់ទាញយកផលប្រយោជន៍ជូនជាតិមាតុភូមិ។

មកទល់ពេលនេះ ការតែងតាំងគណៈរដ្ឋមន្ត្រីបានចាប់ផ្តើមដំណើរការទាំងប្រធានផ្នែកកិច្ចការងារនយោបាយសំខាន់ បូករួមទាំងនាយករដ្ឋមន្ត្រីផងដែរ ប៉ុន្តែបច្ចុប្បន្ន នយោបាយផ្ទៃក្នុងរបស់កូរ៉េខាងត្បូងនៅតែបន្តមានភាពរកាំរកូសនៅឡើយដែលនេះនឹងក្លាយទៅជាការងារអាទិភាពសំខាន់មួយផ្សេងទៀតសម្រាប់លោក Lee ចូលខ្លួនមកដោះស្រាយ។

ក្នុងនោះដែរ លោក Lee នៅតែសន្យាថា នឹងមានការស៊ើបអង្កេតឱ្យបានហ្មត់ចត់លើករណីជុំវិញការដាក់ច្បាប់អាជ្ញាសឹករបស់លោកអតីតប្រធានាធិបតី Yoon ដោយពណ៌នាថា វាជាការបះបោរដែលដណ្តើមយកអធិបតេយ្យភាពរបស់ប្រជាជនខ្លួនឯងដោយប្រើប្រាស់អាវុធ។

គួរឲ្យដឹងដែរថា មេដឹកនាំធំៗរបស់ពិភពលោកដែលមានការពាក់ព័ន្ធទៅនឹងបញ្ហាខាងលើ បូករួមទាំងអាម៉េរិក ជប៉ុន និងចិនផងដែរនោះ បានផ្ញើសារអបអរសាទរចំពោះការឡើងកាន់តំណែងរបស់លោក Lee ប៉ុន្តែលើកលែងតែភាគីខាងកូរ៉េខាងជើងដែលមកទល់ពេលនេះនៅមិនទាន់មានប្រតិកម្មណាមួយនៅឡើយទេ៕