បរទេស ៖ កាលពីពេលកន្លងទៅថ្មីៗនេះ ព្រះចៅអធិរាជជប៉ុន Naruhito ទ្រង់បានយាងចុះស្ទូងស្រូវដោយផ្ទាល់ក្នុងពិធីបុណ្យដាំដុះស្រូវប្រចាំឆ្នាំរបស់ជប៉ុននៅដីស្រែដែលស្ថិតនៅក្នុងព្រះរាជវាំង ដែលត្រូវបានគេមើលថែរក្សាយ៉ាងយកចិត្តទុកដាក់ លាតសន្ទឹងលើផ្ទៃក្រឡាប្រមាណជា ២៤០ម៉ែត្រការ៉េ។

កាលពីថ្ងៃទី១៤ ខែឧសភា កន្លងទៅនេះ រាជវាំងជប៉ុន បានរៀបចំពិធីបុណ្យប្រពែណីមួយសម្រាប់ការដាំដុះស្រូវដែលជាពិធីត្រូវបានចាត់ទុកថាមានអត្ថន័យសំខាន់ តំណាងឲ្យវិស័យកសិកម្ម ក៏ដូចជាជំនឿនិងប្រពៃណី វប្បធម៍របស់ប្រទេសជប៉ុនផងដែរ។

កម្មវិធីដែលបានរៀបចំប្រចាំឆ្នាំនេះដូចទៅនឹងពិធីដែលបានរៀបចំជារៀងរាល់ឆ្នាំដែរ ដោយក្នុងនោះព្រះចៅអធិរាជជប៉ុន Naruhito បានយាងចុះស្ទូងស្រូវដោយផ្ទាល់ព្រះអង្គជាមួយនឹងដើមស្រូវតូចៗចំនួន២០គុម្ពដែលមានប្រភពមកពីពូជស្រូវផ្សេងៗគ្នាជាច្រើន ដូចជា Nihonmasari variety និង Mangetsumochi variety ជាដើម។

តាមការរំពឹងទុក ដំណាំស្រូវដែលបានស្ទូង និងដាំទាំងនោះនឹងអាចប្រមូលផលបាននៅខែកញ្ញាខាងមុខ ហើយនិងប្រើប្រាស់ទិន្នផលដែលប្រមូលបានដើម្បីចូលរួមក្នុងពិធីបុណ្យសាសនារបស់ជាតិមួយទៀតគឺ Niiname-sai ដែលជាពិធីក្នុងសាសនា Shinto ។

សូមរំលឹកដែរថា ពិធីដាំដុះស្រូវប្រចាំឆ្នាំដោយព្រះចៅអធិរាជជប៉ុនបានចាប់ផ្តើមលើកដំបូងចាប់តាំងតែពីអតីតព្រះចៅអធិរាជជប៉ុន Showa ដែលត្រូវជាព្រះអយ្យកោរបស់ព្រះចៅអធិរាជនាពេលបច្ចុប្បន្ន។ បន្ថែមពីនេះ គេក៏បានដឹងដែរថា ពិធីបុណ្យដាំដុះស្រូវប្រចាំឆ្នាំនៅរាជវាំងជប៉ុន ក្រៅតែពីប្រារព្ធឡើងក្នុងគោលបំណងសំខាន់ផ្សារភ្ជាប់រវាងសាសនា​ Shinto ដែលប្រកាន់យ៉ាងខ្ជាប់ខ្ជួនដោយវង្សត្រកូលមហាក្សត្រជប៉ុនហើយនោះ វាក៏បានបង្ហាញអំពីលើកកម្ពស់វិស័យកសិកម្មដែលភ្ជាប់ទៅនឹងវប្បធម៍ដ៏យូរលុង ក៏ដូចជាជំនឿរបស់ពលរដ្ឋជប៉ុនទៅលើការដាំដុះស្រូវប្រចាំឆ្នាំរបស់ខ្លួនផងដែរ។

ប្រទេសជប៉ុន គឺជាប្រទេសផលិតអង្ករធំជាងគេទី៩នៅលើពិភពលោក ដោយជាទូទៅរដូវធ្វើស្រែស្រូវនៅភាគខាងជើងប្រទេសជប៉ុនចាប់ពីខែឧសភា ឬមិថុនា រហូតដល់ខែកញ្ញា និងតុលា ដោយឡែក នៅភាគកណ្តាលប្រទេសជប៉ុនគឺចាប់ពីខែមេសា ឬឧសភា ទៅដល់ខែសីហា ឬខែតុលា។ សម្រាប់នៅខេត្តនៅភាគខាងត្បូងប្រទេសជប៉ុន រដូវធ្វើស្រែស្រូវគឺចាប់ពីខែមេសា ឬឧសភា ទៅដល់ខែសីហា ឬខែកញ្ញា ហើយក្នុងនោះពូជស្រូវ japonica ថ្មី គឺជាពូជដែលដាំដុះនៅស្ទើរតែគ្រប់ខេត្តទាំងអស់ក្នុងប្រទេស។

គួរបញ្ជាក់ដែរថា អង្ករគឺជាអាហារចម្បងដែលប្រើប្រាស់នៅក្នុងប្រទេសជប៉ុនដោយមានមុខម្ហូបជាច្រើនបង្កើតឡើងដោយផ្សារភ្ជាប់ជាមួយនឹងគ្រាប់អង្ករទាំងនោះ។ ជាងនេះទៅទៀត អង្ករមានប្រវត្តិយូរលង់ណាស់មកហើយនៅក្នុងប្រទេសជប៉ុន ហើយត្រូវបានចាក់ឫសយ៉ាងជ្រៅនៅក្នុងវប្បធម៌ក្នុងនាមជាផលិតផលកសិកម្មដ៏មានតម្លៃ និងធ្លាប់ត្រូវបានប្រើជារូបិយវត្ថុថែមទៀតផង៕