សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី CNBC បានរាយការណ៍ថា មេដឹកនាំបណ្តាប្រទេសមួយចំនួនបានប្រកាសនូវកិច្ចព្រមព្រៀងផ្លូវដែក និងកំពង់ផែពហុភាគីដែលតភ្ជាប់មជ្ឈឹមបូព៌ា និងអាស៊ីខាងត្បូងក្រៅកិច្ចប្រជុំ G20 នៅទីក្រុងញូវដេលីកាលពីថ្ងៃសៅរ៍ចុងសប្ដាហ៍កន្លងទៅនេះ។
លោក Jon Finer ទីប្រឹក្សាសន្តិសុខជាតិរងរបស់សហរដ្ឋអាមេរិកបានលើកឡើងថា កិច្ចព្រមព្រៀងនេះនឹងផ្តល់អត្ថប្រយោជន៍ដល់ប្រទេសដែលមានចំណូលទាប និងមធ្យមនៅក្នុងតំបន់ ហើយផ្តល់តួនាទីសំខាន់ដល់មជ្ឈឹមបូព៌ាក្នុងពាណិជ្ជកម្មសកល។ លើសពីនេះ កិច្ចព្រមព្រៀងនេះមានគោលបំណងតភ្ជាប់បណ្តាប្រទេសនៅមជ្ឈឹមបូព៌ាតាមរយៈផ្លូវដែក ដោយតភ្ជាប់ពួកគេទៅកាន់ប្រទេសឥណ្ឌាតាមកំពង់ផែ។ ការតភ្ជាប់នេះនឹងជួយសម្រួលដល់លំហូរថាមពល និងពាណិជ្ជកម្មពីតំបន់ឈូងសមុទ្រទៅកាន់អឺរ៉ុប ដោយកាត់បន្ថយពេលវេលាដឹកជញ្ជូន ថ្លៃដើម និងការប្រើប្រាស់ប្រេងឥន្ធនៈ។
តាមទស្សនៈរបស់សហរដ្ឋអាមេរិក យល់ឃើញថា ការផ្សារភ្ជាប់តំបន់សំខាន់ៗទាំងនេះ គឺជាឱកាសដ៏ធំមួយ ខណៈដែលសហរដ្ឋអាមេរិកកំពុងពង្រឹងកិច្ចខិតខំប្រឹងប្រែងសម្រាប់កិច្ចព្រមព្រៀងការទូតដ៏ទូលំទូលាយមួយនៅមជ្ឈឹមបូព៌ា ដែលអាចនឹងធ្វើឱ្យអារ៉ាប៊ីសាអូឌីតទទួលស្គាល់អ៊ីស្រាអែល។ លើសពីនេះ កិច្ចព្រមព្រៀងនេះអាចនឹងជួយបន្ថយសម្ពាធនៅទូទាំងតំបន់ និងដោះស្រាយជម្លោះ។
កិច្ចព្រមព្រៀងនេះកើតឡើងក្នុងពេលដ៏សំខាន់មួយ ខណៈដែលប្រធានាធិបតីសហរដ្ឋអាមេរិក Joe Biden មានបំណងចង់ប្រឆាំងនឹងការជំរុញគោលនយោបាយខ្សែក្រវាត់ និងផ្លូវរបស់ចិនលើហេដ្ឋារចនាសម្ព័ន្ធពិភពលោក ដោយដាក់ឱ្យទីក្រុងវ៉ាស៊ីនតោនជាដៃគូជំនួស និងអ្នកវិនិយោគសម្រាប់ប្រទេសកំពុងអភិវឌ្ឍន៍នៅក្នុងក្រុម G20 ។ លោក Biden បាននិយាយថា វាគឺជាកិច្ចព្រមព្រៀងដ៏ធំមួយដែលនឹងតភ្ជាប់កំពង់ផែឆ្លងកាត់ទ្វីបទាំងពីរ ដែលឆ្ពោះទៅរកស្ថិរភាព ភាពរីកចម្រើន និងការរួមបញ្ចូលគ្នាជាមួយនឹងមជ្ឈឹមបូព៌ា។ មិនត្រឹមតែប៉ុណ្ណោះ វានឹងបើកឱកាសគ្មានទីបញ្ចប់សម្រាប់ថាមពលស្អាត អគ្គិសនីស្អាត និងការដាក់ខ្សែកាបដើម្បីតភ្ជាប់តំបន់។
នាយករដ្ឋមន្ត្រី Narendra Modi ដែលជាម្ចាស់ផ្ទះកិច្ចប្រជុំកំពូលឥណ្ឌាបាននិយាយដែរថា ៖ ថ្ងៃនេះ នៅពេលដែលយើងចាប់ផ្តើមគំនិតផ្តួចផ្តើមការតភ្ជាប់ដ៏ធំបែបនេះ យើងកំពុងសាបព្រួសគ្រាប់ពូជសម្រាប់ក្តីសុបិនមនុស្សជំនាន់ក្រោយឱ្យកាន់តែធំ។
គួរឲ្យបញ្ជាក់ដែរថា អនុស្សរណៈយោគយល់គ្នាសម្រាប់កិច្ចព្រមព្រៀងនេះត្រូវបានចុះហត្ថលេខាដោយសហភាពអឺរ៉ុប ឥណ្ឌា អារ៉ាប៊ីសាអូឌីត អេមីរ៉ាតអារ៉ាប់រួម សហរដ្ឋអាមេរិក និងដៃគូ G20 ផ្សេងទៀត។ យ៉ាងណាមិញ គេមិនមានព័ត៌មានលម្អិតបញ្ជាក់អំពីតម្លៃនៃកិច្ចព្រមព្រៀងនោះទេ៕
Account
Security
Favourite Content