សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ភ្នំពេញ គឺជាតំបន់ដែលមានសក្ដានុពលក្នុងការទាក់ទាញការវិនយោគ ហើយភ្នំពេញក៏ទទួលបានគម្រោងវិនិយោគច្រើនជាងគេផងដែរក្នុងចំណោមបណ្ដារាជធានីខេត្តនានាទូទាំងប្រទេស។ជាក់ស្ដែងក្នុងរយៈពេល៥ឆ្នាំចុងក្រោយនេះ រាជធានីភ្នំពេញសម្រេចបាននូវគម្រោងវិនិយោគថ្មីៗចំនួន១៩៥គម្រោង ។ នេះបើតាមរបាយការណ៍របស់ក្រុមហ៊ុនអចលនទ្រព្ យCBRE Cambodia ចេញផ្សាយនៅពេលថ្មីៗនេះ ។
របាយការណ៍បានបង្ហាញថា ក្នុងឆ្នាំ២០១៨ ភ្នំពេញមានគម្រោងវិនិយោគដែលបានបញ្ចប់ចំនួន ១២៧គម្រោង ក្នុងនោះខុនដូមានចំនួន ៦២គម្រោង អគារការិយាល័យមានចំនួន ៥៤គម្រោង និងគម្រោងទីតាំងលក់រាយ ឬផ្សារទំនើបមានចំនួន១១គម្រោង ។ រហូតមកដល់ឆ្នាំ២០២៣គម្រោងដែលបានបញ្ចប់សរុបទាំងអស់បានកើនឡើងរហូតដល់ចំនួន ៣២២គម្រោង ក្នុងនោះខុនដូមានចំនួន ១៣៨គម្រោង អគារការិយាល័យមានចំនួន ១១៧គម្រោង និងគម្រោងទីតាំងលក់រាយ(ផ្សារទំនើប ) មានចំនួន៦៧គម្រោង ។
បើតាមអ្នកនាង គឹម គិនកេសា អគ្គនាយិការងក្រុមហ៊ុនអចលនទ្រព្យ CBRE Cambodia បានលើកឡើងក្នុងបទបង្ហាញពីនិន្នាការទីផ្សារអចលនទ្រព្យរយៈពេល១៥ឆ្នាំចុងក្រោយកាលពីថ្ងៃទី៦ ខែកញ្ញា ២០២៣ឱ្យដឹងថា មកដល់បច្ចុប្បន្ននេះទីផ្សារនៃអចលនទ្រព្យមួយចំនួនបានឆ្អែតទៅហើយ ជាក់ស្ដែងសម្រាប់ផ្សារទំនើប ឬ Retail បានបង្ហាញថា ការផ្គត់ផ្គង់មានច្រើនជាងគេ ដូច្នេះក្នុងរយៈពេលប៉ុន្មានឆ្នាំទៅមុខ បើអាចមិនគួរអភិវឌ្ឍន៍ផ្សារទំនើបទៀតនោះទេ ព្រោះបច្ចុប្បន្ន មានអគារផ្សារទំនើបដែលបានសង់ហើយ ប៉ុន្តែនៅមិនទាន់ដំណើរការទាំងអស់នៅឡើយ ឬមានដែរតែសកម្មភាពតិចតួច ។
អ្នកនាងបន្តថា ផ្សារទំនើបដែលសង់រួចរាល់តែមិនមានសកម្មភាពអាចកែប្រែអគារនោះឱ្យមានសកម្មភាពដូចជារៀបចំជាកន្លែងកម្សាន្ត កន្លែងហាត់ប្រាណ ឬការិយាល័យបណ្ដោះអាសន្នសិន តែបើសិនជារង់ចាំដល់ស្ថានភាពនៃសេដ្ឋកិច្ចប្រសើរឡើងនោះនឹងអាចខាតបង់ថវិកាច្រើនបន្តទៀត ។
របាយការណ៍របស់ក្រុមហ៊ុន CBRE Cambodia បានបង្ហាញថា នៅពេលអនាគត និន្នាការនៃការអភិវឌ្ឍអចលនទ្រព្យក្នុងរាជធានីភ្នំពេញអាចជាសណ្ឋាគារដែលមានមាកយីហោល្បីៗ ជាអចលនទ្រព្យដែលគាំទ្រដល់វិស័យទេសចរណ៍ស្របនឹងទេសចរបរទេសចាប់ផ្ដើមចូលមកកម្ពុជាកើនឡើងវិញជាបន្តបន្ទាប់។ ដោយសម្រាប់ខុនដូប្រណីតៗ ត្រូវរង់ចាំបន្តទៀត ប៉ុន្តែម្ចាស់គម្រោងអាចផ្លាស់ប្តូរនូវយុទ្ធសាស្ត្ររបស់ខ្លួន ដោយងាកមកអភិវឌ្ឍន៍ខុនដូដែលមានតម្លៃសមរម្យដើម្បីបំពេញទៅតាមទីផ្សារបច្ចុប្បន្នវិញ ។
គួររម្លឹកថា បើក្រលេកមើលពីស្ថានភាពនៃការអភិវឌ្ឍអចលនទ្រព្យក្នុងរាជធានីភ្នំពេញឃើញថាមានការរីករាលដាលកាន់តែខ្លាំងទៅកាន់តំបន់ជាយក្រុងក្នុងនោះរួមមានទំនើប អគារពាណិជ្ជកម្មធំៗ ក៏ដូចជាអគារខុនដូតម្លៃសមរម្យ និងការអភិវឌ្ឍទៅលើបុរីលំនៅឋានផងដែរ៕
Account
Security
Favourite Content