សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ត្រឹមមុខរបរលក់ការ៉េមបៀកតាមរទេះចល័ត ស្ដាប់ទៅដូចជាគ្មានអ្វីដែលគួរឱ្យចាប់អារម្មណ៍នោះទេ ត្បិតថា ជាអាជីវកម្មដែលស្ថិតក្នុងវិស័យសេដ្ឋកិច្ចក្រៅប្រព័ន្ធមួយនេះគេតែងឃើញមានច្រើន និងស្ទើរគ្រប់ទីកន្លែងនៅលើដងផ្លូវ។ ផ្ទុយពីការយល់ឃើញបែបនេះ ក្រោមគំនិតច្នៃប្រតិដ្ឋ និងយុទ្ធសាស្ត្រពង្រីកទីផ្សាររបស់ខ្លួន បុរសម្នាក់បានយកអាជីវកម្មប្រចាំគ្រួសារដោយការផលិត និងលក់ការ៉េមបៀកនេះ បញ្ជៀតខ្លួនចូលក្នុងទីផ្សារលក់រាយ និងជាកញ្ចប់ នៅតាមកម្មវិធីតូច-ធំ ដែលអាចរកចំណូលបានខ្ទង់ពាន់ដុល្លារក្នុងមួយខែៗ។
«ការ៉េមដូងខ្មែរ ១៩៩៧» ជាយីហោការ៉េមបៀកបន្តពីគ្រួសារ ដែលផ្ដោតលើប្រភេទការ៉េមដូងមានរសជាតិឈ្ងុយឆ្ងាញ់ អាចអន្ទងចិត្តអតិថិជនបានទាំងក្មេង ទាំងចាស់ ជាពិសេសបណ្តាយុវវ័យជាច្រើន មិនថានៅតាមមូលដ្ឋាន សាលារៀន ឬនៅតាមកម្មវិធីតូច-ធំផ្សេងៗនោះទេ ត្បីតអាជីវកម្មលក្ខណៈគ្រួសារមួយនេះបានពង្រីកទីផ្សាររបស់ខ្លួនបានយ៉ាងទូលាយនៅក្នុងរាជធានីភ្នំពេញ ហើយថែមទាំងអាចរកបានចំណូលប្រចាំខែរហូតដល់ខ្ទង់ពាន់ដុល្លារ។
លោក ប៉ាន់ គីមឆាយ ជាអ្នកគ្រប់គ្រងអាជីវកម្មការ៉េមដូង១៩៩៧ បានប្រាប់ AMS Economy ឱ្យដឹងថា ៖
«ដោយសារមានការគាំទ្រពីសំណាក់អតិថិជនច្រើន បច្ចុប្បន្ននេះ ក្រៅពីលក់នៅទូតាំងជាក់លាក់មួយកន្លែងស្ថិតនៅម្ដុំផ្សារឈូកមាស់ ក្នុងខណ្ឌសែនសុខ រាជធានីភ្នំពេញ យើងខ្ញុំក៏មានផ្តល់សេវាកម្មនៅតាមកម្មវិធីផ្សេងៗផងដែរ ដូចជា កម្មវិធីជប់លៀងនៅតាមសាលារៀនឯកជន កិច្ចប្រជុំ ឬសិក្ខាសាលា កម្មវិធីអាពាហ៍ពិពាហ៍ ឬកម្មវិធីខួបកំណើតនោះទេ ដោយតម្លៃចាប់ពី៣០០ដុល្លារឡើងទៅ»។
លោកបានបន្តឱ្យដឹងទៀតថា ក្រៅពីមានផ្តល់សេវាកម្មដូចបានរៀបរាប់ខាងលើនេះ «ការ៉េមដូងខ្មែរ ១៩៩៧» ក៏មានលក់បោះដុំសម្រាប់អ្នកដែលចង់ទិញយកទៅលក់បន្តផងដែរក្នុងតម្លៃសមរម្យ អាចទទួលបានផលចំណេញទាំងសងខាង ជាមួយនឹងការ៉េមដែលមានរសជាតិច្រើនប្រភេទផ្សេងគ្នា ជាពិសេស ការ៉េមរសជាតិដូងតែម្ដង។ ដោយឡែក សម្រាប់ការលក់នៅទីតាំងប្រចាំថ្ងៃ លោកបើកលក់ពីម៉ោង ១០ព្រឹក ដល់ម៉ោង ១០យប់ ត្បិតចូលដល់រដូវវស្សាក៏ពិតមែន ប៉ុន្តែការលក់នៅតែល្អប្រសើរ ខណៈដែលការទទួលបានកម្មវិធីផ្សេងៗក៏មានជាបន្តបន្ទាប់។ នេះបើតាមអ្វីដែលលោក ប៉ាន់ គីមឆាយ បានលើកឡើង។
គួរជម្រាបដែរថា បច្ចុប្បន្ននេះ «ការ៉េមដូងខ្មែរ ១៩៩៧» ដែលជាអាជីវកម្មបន្តពីគ្រួសារមួយនេះ ត្រូវបានផលិតឡើងមានច្រើនរសជាតិ និងច្រើនប្រភេទ រួមមានដូចជា ប្រភេទការ៉េមដូង ដែលដាក់នៅក្នុងផ្លែដូង មានសាច់ដូងទន់ៗ បន្ថែមជាមួយនឹងបាយដំណើប សណ្ដែកខៀវ និងសណ្ដែកក្រហមជាដើម លក់ក្នុងតម្លៃចាប់ពី ២០០០រៀលឡើងទៅ អាស្រ័យទៅតាមតម្រូវការ ហើយក្រៅពីនេះក៏មានជាប្រភេទការ៉េមបៀកជាមួយនំប៉ុង ឬនំផ្សេងទៀត ជាមួយរសជាតិ ទុរេន ត្រាវ សូកូឡា និងខ្នុរ ដែលអាចតម្រូវតាមចំណង់ចំណូលចិត្តរបស់អតិថិជន។
ដោយឡែក សម្រាប់ថ្ងៃអនាគត ម្ចាស់អាជីវកម្មការ៉េមដូង លោក គីមឆាយ បានតាំងចិត្តបន្តការខិតខំពង្រីកទីផ្សារបន្ថែមទៀត ជាមួយនឹងការស្វែងយល់ពីចំណេះដឹងថ្មីពាក់ព័ន្ធទៅនឹងការផលិតការ៉េមបៀកដែលមានរសជាតិកាន់តែឆ្ងាញ់ដូចគ្នាទៅនឹងការ៉េមដែលមានលក់នៅតាមបណ្តាហាងបរទេសធំៗ ហើយឈានទៅរកការពង្រីកសាខានៅក្នុងតំបន់មូដ្ឋាន ក៏ដូចជាទូទាំងរាជធានីភ្នំពេញផងដែរ៕
Account
Security
Favourite Content