សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កាហ្វេ ជាភេសជ្ជៈដែលមានការពេញនិយមទទួលទានជាប្រចាំថ្ងៃ មិនថាចំពោះកន្លែងធ្វើការ ការអង្គុយជជែកគ្នាជាលក្ខណៈអាជីវកម្ម ពាណិជ្ជកម្ម ក៏ដូចជានៅពេលធ្វើដំណើរផ្លូវឆ្ងាយដើម្បីកាត់បន្ថយអាការងងុយដេកជាដើម។ ដោយឡែក សម្រាប់តែកម្ពុជា ទីផ្សារគ្រាប់កាហ្វេក៏មានតម្រូវការច្រើនផងដែរ បើទោះជាមានចំការកាហ្វេនៅតាមបណ្តាខេត្តសក្ដានុពលមួយចំនួនក៏ដោយ ជាស្ដែង ជាប្រចាំឆ្នាំ កម្ពុជាយ៉ាងហោចណាស់មានតម្រូវការគ្រាប់កាហ្វេសរុបប្រមាណ ១៣ ០០០តោនឯណោះ ។
លោក ឌុក ពិសិដ្ឋ ប្រធានសមាគមកាហ្វេ (CCA) បានមានប្រសាសន៍ថា បច្ចុប្បន្ន កម្ពុជាមានតម្រូវការគ្រាប់ហ្វេចន្លោះពី ១០ ០០០តោន ទៅ ១៣ ០០០តោនក្នុងមួយឆ្នាំ ដោយភាគច្រើនត្រូវបាននាំចូលពីក្រៅប្រទេសបន្ថែមពីលើគ្រាប់កាហ្វេដែលមានស្រាប់នៅក្នុងស្រុក ជាពិសេស ប្រទេសវៀតណាម និងប្រទេសឡាវ។ ពោល គឺសម្រាប់ប្រទេសកម្ពុជាអាចមានលទ្ធភាពផ្គត់ផ្គង់គ្រាប់កាហ្វេចន្លោះពី ៥% ទៅ១០% ប៉ុណ្ណោះ ខណៈដែលការនាំចូលមានរហូតដល់ ៩០%។
លោកថា ៖
«នៅក្នុងប្រទេសកម្ពុជា មានការដាំដុះគ្រាប់កាហ្វេរតាមបណ្តាខេត្តផ្សេងៗច្រើនដែរ ដូចជា រតនៈគិរី មណ្ឌលគីរី ត្បូងឃ្មុំ ក្រចេះ កំពង់ចាម អូសោម និងកោះកុង ជាដើម ប៉ុន្តែការដាំដុះនៅមានចំនួនតិច ហើយចំការហ្វេខ្លះអាចប្រមូលផលបានខ្លះៗ និងចំការកាហ្វេខ្លះនៅមិនទាន់អាចប្រមូលផលបាននៅឡើយទេ។ កម្ពុជា មានប្រជាជនចូលចិត្តទទួលទានកាហ្វេកើនឡើងច្រើន ដែលកសិករគួរយកចិត្តទុកដាក់ដាំកាហ្វេឱ្យបានច្រើន សម្រាប់ផ្គត់ផ្គត់ទីផ្សារក្នុងស្រុក និងនាំចេញទៅក្រៅប្រទេស»។
ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានមានប្រសាសន៍ថា ទំហំនៃការនាំចូលកាហ្វេមកកម្ពុជាមានប្រមាណ ១០ ០០០តោនក្នុងមួយឆ្នាំ ដែលទំហំនេះត្រូវការផ្ទៃដីដាំដុះចំនួន ៥ ០០០ហិកតា ខណៈដែលផ្ទៃដី ១ ហិកតាគេអាចប្រមូលទិន្នផលកាហ្វេជាមធ្យមចំនួន ០២តោន ដូច្នេះ កម្ពុជាគួរតែពង្រីកផ្ទៃដីដាំដុះកាហ្វេយ៉ាងហោចណាស់ពី ៥,០០០-១០,០០០ហិកតា ដើម្បីធានាការផ្កត់ផ្គង់ក្នុងស្រុក និងនាំចេញទៅក្រៅប្រទេស។
ឯកឧត្តមបណ្ឌិតក៏បានបញ្ជាក់ផងដែរថា ៖
«ក្នុងបរិបទដែលកម្ពុជាមានជម្លោះព្រំដែនជាមួយប្រទេសថៃ បានផ្តល់ឱកាសដល់កម្ពុជាក្នុងការពង្រឹងសមត្ថភាពផលិតរបស់ខ្លួន ព្រោះបញ្ហានេះបានធ្វើឱ្យប្រជាជនមាននិន្នាការងាកមកគាំទ្រផលិតផលក្នុងស្រុកយ៉ាងផុលផុស ហើយការកែច្នៃផលិតផលក្នុងស្រុកក៏កើនឡើងយ៉ាងគំហុក ដែលនេះជាចំណុចសំខាន់សម្រាប់ការអភិវឌ្ឍប្រទេសប្រកបដោយចីរភាព»។
លោក ស៊ាង លាងហ៊ី អ្នកបច្ចេកទេសដាំកាហ្វេ អារ៉ាប៊ីកា នៅក្នុងខេត្តមណ្ឌលគីរី បានមានប្រសាសន៍ថា កាហ្វេប្រភេទនេះមានរសជាតិឆ្ងាញ់ និងមានឈ្មួញចង់នាំចេញទៅលក់ប្រទេសជប៉ុន ប៉ុន្តែចំការរបស់លោកនៅមិនទាន់អាចផ្គត់ផ្គង់សម្រាប់ការនាំចេញនៅឡើយ ពោលគឺបានត្រឹមការផ្គត់ផ្គង់ក្នុងស្រុកមួយចំនួនប៉ុណ្ណោះ។ លោកថា ពូជកាហ្វេអារ៉ាប៊ីកានេះត្រូវបាននាំចូលពីប្រទេសឡាវ ហើយយកមកដាំដុះក្នុងចំការរបស់លោកក្នុងខេត្តមណ្ឌលគីរី។ សម្រាប់កសិករមានចំណាប់អារម្មណ៍ អាចទំនាក់ទំនងរៀនបច្ចេកទេស និងកម្ម៉ង់ពូជពីចំការរបស់លោកបាន៕
Account
Security
Favourite Content